އަންކާރާ، ތުރުކީ (އޮކްޓޯބަރު 14) - އަފްގާނިސްތާނަށް ދިމާވެފައިވާ އިންސާނީ ކާރިސާ އިން އަރައިގަތުމަށް އެހީތެރިކަން ފޯރުކޮށްދިނުމަށް ތުރުކީ އިން ތައްޔާރަށް އޮތް ނަމަވެސް ތާލިބާނުންގެ ވެރިކަން ބަލައިނުގަނެވޭނެ ކަމަށް ބުނެފި އެވެ.
ބައިނަލްއަގްވާމީ މުޖުތަމައުގެ ރުހުން ހޯދުމަށް ތާލިބާނުން މަސައްކަތް ކުރަމުން ދާއިރު ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ އާއި ތާލިބާން ސަރުކާރުގެ ފޮރިން މިނިސްޓަރު އާމިރް ހާން މުއްތަގީ ބުރާސްފަތި ދުވަހު ތުރުކީގައި ބައްދަލުކުރި އެވެ.
މުއްތަގީ ތުރުކީ އަށް ދިޔައީ ގަތަރުގެ ދޯހާގައި އެމެރިކާ އާއި ޔޫރަޕިއަން ޔޫނިއަން (އީޔޫ) ގެ އޮފިޝަލުންނާ ބައްދަލުކުރެއްވުމަށް ފަހު އެވެ. އެ ބައްދަލުވުމުގައި މުއްތަގީ ބުނީ އަފްގާނިސްތާނާ ދެކޮޅަށް ދަތިކުރުމުގެ ފިޔަވަޅު އެޅުމަކީ ސެކިއުރިޓީ ހާލަތު ގޯސްވާ ސަބަބެއް ކަމަށެވެ.
ތުރުކީގެ އަންކާރާގައި މުއްތަގީ އާއި ކަވުސޮގްލޫ ބޭއްވި ބައްދަލުވުމަށް ފަހު ތުރުކީ އިން ވެސް ވަނީ މުއްތަގީގެ އެ ވާހަކައާ އެއްބަސްވެފަ އެވެ.
"މިހާރު މި އޮތް ތާލިބާން ސަރުކާރާ އެކު ކުރިއަށް ދިޔުމުގެ މުހިއްމުކަމާ ގުޅޭ ގޮތުން ބައިނަލްއަގްވާމީ މުޖުތަމައުއާ ވާހަކަ ދެކެވިއްޖެ. ތާލިބާން ސަރުކާރު ބަލައިގަތުމާއި އެކުގައި މަސައްކަތް ކުރުމަކީ މުޅިން ތަފާތު ދެ ކަންތައް،" ކަވުސޮގްލޫ ވިދާޅުވި އެވެ.
"އަފްގާން އިގްތިސާދު ހުއްޓިގެން ނުވާނެ. އެހެންވީމަ، ބޭރުގައި ހުރި އަފްގާނިސްތާނުގެ އެކައުންޓުތައް ފްރީޒް ކުރި ގައުމުތަކުން މިހާރަށް ވުރެ ދޫދީގެން އަމަލުކޮށް، ރައްޔިތުންގެ މުސާރަ ފޯރުކޮށްދެވޭނެ ގޮތް ތަނަވަސްކޮށްދޭން ޖެހޭ."
މިދިޔަ އޯގަސްޓު މަހު ތާލިބާނުން ވެރިކަމަށް އައުމާއެކު ވޯލްޑު ބޭންކުން ވަނީ އަފްގާނިސްތާނަށް ފޯރުކޮށްދޭ ފަންޑުތައް ހިފަހައްޓާފަ އެވެ.
ކަވުސޮގްލޫ ވިދާޅުވީ އަންހެން ކުދިންނަށް ތައުލީމް ލިބިގަތުމަށް ހުރަސް ނޭޅުމަށާއި އަންހެނުން ވަޒީފާ އަށް ދިޔުން މަނާ ނުކުރުމަށް ތާލިބާނުންނަށް ބާރު އެޅުއްވި ކަމަށެވެ.
