ރާއްޖޭގެ ޕެންޝަން އޮފީހުގެ ޗީފް އެގްޒެކެޓިވް އޮފިސަރު (ސީއީއޯ)ގެ މަގާމަށް މިދިޔަ އަހަރުގެ ފަހުކޮޅު އައްޔަން ކުރި އިނގިރޭސި ރައްޔިތެއް ކަމަށްވާ ޖޯން ގްރިންޑަލް، އެ އޮފީހުގެ ސްލޫކީ މިންގަނޑުން ބޭރުވުމުން ވަޒީފާއިން ވަކިކޮށްފި އެވެ.
ޕެންޝަން އޮފީހުގެ ޕަބްލިކް ރިލޭޝަން މެނޭޖަރު، އައިޝަތު ފަޒްނާ ވަނީ އެ އޮފީހުގެ ސީއީއޯ އިއްޔެގެ ވަގުތެއްގައި ވަޒީފާއިން ވަކިކޮށްފައިވާކަން މި ނޫހަށް ކަށަވަރުކޮށް ދެއްވާފަ އެވެ.
އިންޝުއަރެންސާއި ޕެންޝަންގެ ދާއިރާގައި 25 އަހަރު ތަޖުރިބާ ހޯއްދަވާފައިވާ ގްރިންޑަލް ވަޒީފާއިން ވަކިކޮށްފައިވާއިރު, އޭނާގެ މައްޗަށް ޖިންސީ ފުރައްސާރައިގެ ތުހުމަތުތަކެއް ކުރެވި އެ މައްސަލަ މީޑިއާއަށް ތިލަވި އެވެ.
ނަމަވެސް, އޭރު ވެސް ޕެންޝަން އޮފީހުން އެކަން ދޮގުކުރި އެވެ.
ގްރިންޑަލް ވަޒީފާއިން ވަކިކުރީ ސުލޫކީ ކޮން މިންގަނޑަކާ ހިލާފުވެގެން ކަމެއް އެ އޮފީހުން ހާމައެއް ނުކުރި އެވެ. ނަމަވެސް ފަޒްނާ ވިދާޅުވި ގޮތުގައި ގްރިންޑަލް ވަޒީފާއިން ވަކިކުރީ ޖިންސީ ފުރައްސާރައިގެ މައްސަލައެއްގައި ނޫނެވެ.
ފަޒްނާ އިތުރަށް ވިދާޅުވީ ޕެންޝަން އޮފީހުގެ ބޯޑުން ވެސް ދެ ބޭފުޅަކު އިސްތިއުފާވެސް ދެއްވާފައިވާ ކަމަށެވެ. އެ ބޭފުޅުން އިސްތިއުފާ ދެއްވި ސަބަބު ވިދާޅުވެފައިނުވާ ކަމަށް ފަޒްނާ ވިދާޅުވި އެވެ.
އިސްތިއުފާ ދެއްވާފައިވަނީ އަބްދުﷲ އަލީ އަދި އައިޝަތު ލުއުލުއާ އެވެ.
ދިވެހިރާއްޖޭގެ ޕެންޝަނާ ބެހޭ ގާނޫނުގެ ދަށުން ޕެންޝަން އޮފީހެއް އުފެދުނީ 2009 ވަނަ އަހަރު އެވެ. އެ އޮފީހުގެ ސީއީއޯ މަގާމުގައި އެންމެ ފަހުން ހުންނެވީ އެސްޓީއޯގެ މެނޭޖިން ޑިރެކްޓަރުކަން ވެސް ކުރިން ކުރެއްވި މުހައްމަދު ހުސައިން މަނިކު އެވެ.
