ނިއުކާސަލް (އޮކްޓޫބަރު 13) - ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ދާދި ފަހުން ގަތް ނިއުކާސަލް ޔުނައިޓެޑުން އާ ކޯޗެއް ހޯދަން ޝޯޓްލިސްޓުކުރި ކޯޗުންގެ ތެރޭގައި ޗެލްސީގެ ކުރީގެ ކޯޗު ފްރޭންކް ލަމްޕާޑާއި މިހާރު ރޭންޖާސްއާ ހަވާލުވެ ހުރި ކޯޗު ސްޓީވެން ޖެރާޑް ހިމެނޭ ކަމަށް ރިޕޯޓްތައް ބުނެފި އެވެ.
ޖެރާޑް މި ވަގުތު ހުރީ ރޭންޖާސްއާ ހަވާލުވެ އެވެ. ދާދިފަހުން ޖެރާޑް ވަނީ 2024 ވަނަ އަހަރަށް ރޭންޖާސްގެ ކޮންޓްރެކްޓް އާ ކޮށްފަ އެވެ. ލަމްޕާޑް ހުރީ މި އަހަރު ޖެނުއަރީ މަހު ޗެލްސީގެ ކޯޗުކަމުން ވަކިކުރި ފަހުން ޓީމަކާ ހަވާލުނުވެ އެވެ. ޗެލްސީގެ ކޯޗުކަމުގައި 18 މަސް ދުވަހު ހުރި ލަމްޕާޑް ވަނީ އެ ޓީމާ ހަވާލުވުމުގެ ކުރިން ޑާބީ ކައުންޓީ އަށް ކޯޗުކޮށްދީފަ އެވެ.
މި ސީޒަން ފެށުމުގެ ކުރިން ލަމްޕާޑަށް ވަނީ ކްރިސްޓަލް ޕެލަސްގެ ކޯޗުކަމާ ހަވާލުވާން ހުށަހެޅުމެއް ލިބިފަ އެވެ. އެކަމަކު، ލަމްޕާޑް ބޭނުންވާ ބައެއް ކަންތައްތައް ފުރިހަމަނުވާތީ އޭނާ އެ ހުށަހެޅުން ދޫކޮށްލީ އެވެ. ފަހުން ކްރިސްޓަލް ޕެލަސް އިން އެ ޓީމު ހަވާލުކުރީ ޕެޓްރިކް ވިއޭރާއާ އެވެ.
ނިއުކަސަލްގެ ކޯޗަކަށް ހުރި ސްޓީވް ބްރޫސް އަށް މަގާމުގައި ދެމިހުރެވޭނެ ކަމުގެ ޔަގީންކަމެއް ނެތެވެ.
ރިޕޯޓްތައް ބުނާގޮތުން ނިއުކާސަލްގެ އާ ބޯޑުން މިހާރު އަންނަނީ ބްރޫސްގެ ކޮންޓްރެކްޓް އުވާލަން ކުރަން ޖެހޭ މަޝްވަރާތައް ކުރިއަށް ގެންދަމުންނެވެ. އެއީ ޖެނުއަރީ މަހުގެ ޓްރާންސްފާ މާކެޓްގައި ޓީމު ވަރުގަދަ ކުރަން ހަރަދުކުރަން ވިސްނާއިރު، މިހާރުން ފެށިގެން ކްލަބްގެ ބޯޑުން ބޭނުންވާ ކޯޗެއް ބެހެއްޓުމުގެ ބޭނުމުގަ އެވެ.
ނިއުކާސަލްއާ އާ މެނޭޖްމަންޓަކުން ހަވާލުވިއިރު، ކްލަބް މާލީ ގޮތުން ރަނގަޅު ހާލަތެއްގައި އޮތުމުން ޕްރިމިއާ ލީގުގެ ޓީވީ ރައިޓްސްގެ އާމްދަނީ އަންދާޒާކޮށް ލިބޭނެ ވަރަކަށް ބަލައި ރަނގަޅު އަދަދެއް ހަރަދުކުރަން ލިބޭނެ އެވެ. އެ އުސޫލުން ބަލާކަމަށްވާނަމަ ޖެނުއަރީ މަހުގެ ޓްރާންސްފާ މާކެޓްގައި ނިއުކާސަލް އަށް 272 މިލިއަން ޑޮލަރު ހަރަދުކުރުމުގައި އެއްވެސް ހުރަހެއް ނެތެވެ.
ޖެނުއަރީ ޓްރާންސްފާ މާކެޓްގައި ނިއުކާސަލް އިން ފާރަލާނެ ކުޅުންތެރިންގެ ތެރޭގައި ބާސެލޯނާގެ ކްލެެމެންޓް ލޯންގްލޭ އާއި ފިލިއްޕޭ ކުޓީނިއޯ ހިމެނެ އެވެ.
