މަގުތަކުގެ މައްސަލަ ހައްލުކުރަން މާލެ ސިޓީ ކައުންސިލުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ ހަވާލުކޮށްގެން ކުރިޔަށް ގެންދާ "މާލޭ ސްޓްރީޓްސްކޭޕިން ޕްރޮޖެކްޓް"އަށް ބަދަލުގެނެސް، ބައެއް މަގުތަކުގައި ތާރުއަޅާ ގޮތަށް މިއަދު ހަމަޖައްސައިފި އެވެ.
މާލޭގެ މަގުތަކުގެ ފެންވަރު ދަށްވެ، ހިނގާބިނގާވެ އުޅުމަށާއި ދުއްވާއެއްޗިއްސަށް ދަތިވެފައިވާ މައްސަލަ ހައްލުކުރަން ހިންގާ މި ޕްރޮޖެކްޓު އޭރުގެ ސިޓީ ކައުންސިލުން 2019 ގައި އާރްޑީސީއާ ހަވާލުކުރީ ހުރިހާ މަގެއްގައި ގާ އަތުރާ ގޮތަށެވެ.
އޭރު ކައުންސިލުން މަގުތަކުގައި ތާރު ނާޅާ ގޮތަށް ޕްރޮޖެކްޓު ހަވާލުކުރީ، ޑީވޯޓަރިން މައްސަލަ ހައްލުވީމާ އެ މަސައްކަތް ފަށަން ކަމަށް ބުނެ އެވެ. އަދި ޕްރޮޖެކްޓު "އެއްކޮށް" ނިމޭއިރު މަގުތަކުގައި ތާރު އަޅާ ނިމޭނެ ކަމަށް ކުރީގެ މޭޔަރު ޝިފާ މުހައްމަދުއާ ހަވާލާދީ މީޑިއާތަކުން ރިޕޯޓުކޮށްފައި އެބަހުއްޓެވެ.
އެކަމަކު މާލެ ސިޓީ ކައުންސިލުގެ މި ދައުރުން ވަނީ މި ޕްރޮޖެކްޓަށް ބަދަލު ގެނެސް މި ޕްރޮޖެކްޓަށް ބޮޑު ބަދަލެއް ގެނެސްފަ އެވެ.
މާލެ ސްޓްރީޓްސްކޭޕިން ޕްރޮޖެކްޓަށް ގެނައި ބަދަލުތައް
- ބޭރު މަގާއެކު 16 މަގެއްގައި ތާރު އެޅުން
- މާލޭގެ 105 މަގެއް ޒަމާނީ ފެންވަރަށް ތަރައްގީކުރުން
- ނޯތު ހާބަރާ ދިމާލުން ތޮށިގަނޑު ފެޔަށް ޖައްސާ މަގު ފުޅާކުރުން
- ސެގްމަންޓްތަކަށް ބަހާލުމުގެ ބަދަލުގައި އެއްފަހަރާ ޕްރޮޖެކްޓް ކުރިޔަށް ގެންދިޔުން
މި އެއްބަސްވުމުގައި ސޮއިކުރަން ހޮޓެލް ޖެންގައި ބޭއްވި ރަސްމިއްޔާތުގައި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ ޕްރޮޖެކްޓަށް ބަދަލު ގެނައި މައިގަނޑު ސަބަބަކީ ޕްރޮޖެކްޓު އަވަސްކުރުން ކަމަށެވެ. އަދި ކުރިން ސެގްމެންޓްތަކަށް ބަހާލައިގެން ޕްރޮޖެކްޓު ކުރިޔަށް ގެންދާތީ ދިގުލައިގެން ދިޔުމުގެ މައްސަލަ މިހާރު ދިމާ ނުވާނެ ކަމަށް އޭނާ ވިދާޅުވި އެވެ.
މުއިއްޒު ވިދާޅުވީ މި ބަދަލުތަކުގެ ސަބަބުން ރައްޔިތުންނަށް ތަކުލީފުތަކެއް ދިމާވެދާނެ ކަމަށް ގަބޫލުކުރައްވާ ކަމަށެވެ. އެކަމަކު ކުރު މުއްދަތެއްގެ ތެރޭގައި ޕްރޮޖެކްޓު ނިންމުމުގެ މަންފާ މާ ބޮޑު ކަމަށް އޭނާ ފާހަގަކުރެއްވި އެވެ.
"ބޭނުންވަނީ ބާރަށް އަވަސް ސްޕީޑެއްގައި މަޝްރޫއުގެ މަސައްކަތް ކުރިޔަށް ގެންގޮސް ރައްޔިތުން ބޭނުންވާ ޒަމާނީ މަގުތަކެއް ކުރު މުއްދަތެއްގެ ތެރޭގައި ފޯރުކޮށްދިނުން" މުއިއްޒު ވިދާޅުވި އެވެ.
މާލޭ ސިޓީ ކައުންސިލުގެ ސްޓްރެޓެޖިކް ޕްލޭނުގައި އެންމެ އިސްކަން ދީފައިވާ ކަންކަމުގެ ތެރޭގައި ވެސް "ހިތްފަސޭހަ މަގުމަތި" ހިމެނެ އެވެ. މި ސްޓްރީޓްސްކޭޕިން ޕްރޮޖެކްޓަކީ އެކަން ހާސިލުކުރުމުގެ އެންމެ މުހިންމު ކޮމްޕޯނަންޓެވެ.
މި ރަސްމިއްޔާތުގައި އާރްޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ވަނީ ސިޓީ ކައުންސިލުގެ ބަދަލުތަކަށް މަރުހަބާ ވިދާޅުވެފަ އެވެ. އަދި ރައްޔިތުންގެ މަންފާއަށް ކުރާ ކަންކަމުގައި އާރްޑީސީން އެއްބާރުލުން ލިބޭނެ ކަމަށް ވެސް އޭނާ ވިދާޅުވި އެވެ.
ގާތްގަނޑަކަށް 462 މިލިއަން ރުފިޔާ ހަރަދު ވާނެ ކަމަށް ބެލެވޭ މި ޕްރޮޖެކްޓުގެ ދަށުން މިހާރު ވެސް ބައެއް މަގުތަކުގައި މަސައްކަތްތައް ކޮށް ނިމި، އަނެއް ބައި މަގުތަކުގައި މަސައްކަތްތަށް ވަނީ ފަށާފަ އެވެ. އެގޮތުން މިހާރު މޮބިލައިޒްކޮށްގެން އުޅޭ ޕްރޮޖެކްޓު ސެގްމެންޓުގެ ދަށުން ހެންވޭރުގައި ވަނީ މަސައްކަތް ފަށާފަ އެވެ.
