އުރީދޫ ސާފް ޗެމްޕިއަންޝިޕްގައި ބުދަ ދުވަހު ކުޅެން ހަމަޖެހިފައިވާ ރާއްޖެ އާއި އިންޑިއާ ބައްދަލުކުރާ މެޗުގެ ޓިކެޓް ވިއްކަން މާދަމާ ފަށާއިރު، މީހަކަށް ގިނަވެގެން ވިއްކާނީ ދެ ޓިކެޓު ކަމަށް އެފްއޭއެމުން ހަމަޖައްސައިފި އެވެ.
މި މުބާރާތުގައި ރާއްޖެ ކުރިން ކުޅުނު ތިން މެޗުގައި ވެސް ޓިކެޓު ނުލިބުމުގެ ޝަކުވާތައް ބަންޑުންވެފައިވާއިރު، އެފްއޭއެމްގެ ރައީސް ބައްސާމް އަދީލް ޖަލީލް މިއަދު ވިދާޅުވީ ރާއްޖެ-އިންޑިއާ މެޗަށް އާންމުންނަށް ވިއްކަން ހަމަޖެހިފައިވަނީ ޖުމްލަ 3،000 ޓިކެޓު ކަމަށެވެ.
އެގޮތުން، މާދަމާ ހެނދުނު 10:00 ގައި ސޯޝަލް ސެންޓަރުގައި ޓިކެޓް ވިއްކަން ފަށާއިރު، ކޮންމެ މީހަކަށް ވިއްކާނީ ގިނަވެގެން ދެ ޓިކެޓު ކަމަށް ބައްސާމް ވިދާޅުވި އެވެ.
ޓިކެޓު ވިއްކުމަށް ސޯޝަލް ސެންޓަރުގައި ތިން ޓިކެޓު ކައުންޓަރު އެފްއޭއެމުން ވަނީ ގާއިމުކޮށްފަ އެވެ.
އެ މެޗަށް ވަންނަން ބޭނުންވާ އިންޑިއާ ސަޕޯޓަރުންނަށް 200 ޓިކެޓު ކަނޑައަޅާފައިވާއިރު، އެ ޓިކެޓު ގަންނަންޖެހޭނީ ގަލޮޅު ދަނޑުން ކަމަށް ބައްސާމް އިތުރަށް ވިދާޅުވި އެވެ.
ރާއްޖެ އާއި ސްރީ ލަންކާ ކުޅުނު މެޗަށް އާއްމުކޮށް ވިއްކަން ހުޅުވާލި ޓިކެޓުތައް ކުޑަވަގުތު ކޮޅެއްގެ ތެރޭގައި ވިކި ހުސްވުމުން ކިޔޫގައި އެތައް އިރެއް ވަންދެން ތިބި މީހުންނަށް ވެސް ޓިކެޓް ނުލިބުނެވެ. އެކަމާ ގިނަ ސަޕޯޓަރުންތަކެއް ހިތްހަމަނުޖެހިގެން ދަނޑުތެރެއަށް ވެސް ވަނެވެ. އަދި މަގުމަތީގައި ނުރުހުމުގެ ޝުއޫރުތައް ވެސް ފާޅުކުރި އެވެ.
އެ ހުރިހާ ކަމަކަށް ބަލައި އެފްއޭއެމުން ވަނީ އިންޑިއާ އާއި ލަންކާގެ މެޗުގެ ހާއްސަ ކެޓަގަރީން 1000 ޓިކެޓް ސަޕޯޓަރުންނަށް ވިއްކައިފަ އެވެ. އެއީ ސްޕޮންސަރުންނާއި ކުޅުންތެރިންގެ އާއިލާ އަށް ހާއްސަކުރި ޓިކެޓްތަކުގެ ތެރެއިންނެވެ. އެ ޓިކެޓްތައް ސަޕޯޓަރުންނަށް ވިއްކީ ސޯޝަލް ސެންޓަރުގަ އެވެ.
ޔޫތު މިނިސްޓަރު އަހުމަދު މަހުލޫފް ވަނީ އެފްއޭއެމާ ވާހަކަ ދައްކައިގެން ޓިކެޓް ވިއްކުމަށް ރަނގަޅު އިންތިޒާމެއް ހަމަޖައްސައިދޭނެ ކަމަށް ވިދާޅުވެފަ އެވެ.
ކޮވިޑް-19ގެ ސަބަބުން އަޅާފައިވާ ފިޔަވަޅުތަކާއި ގަލޮޅު ދަނޑުގެ ސީޓީން ކެޕޭސިޓީއަށް ބަލާއިރު، މި ފަހަރުގެ މުބާރާތުގެ ކޮންމެ މެޗަކަށް ވެސް ގިނަ ވެގެން ދަނޑަށް ވަދެވޭނީ 5000 މީހުންނަށެވެ.
ސާފް ޗެމްޕިއަންޝިޕްގައި ދެން ބާކީ އޮތީ ތިން މެޗެވެ. އެއީ ލީގު ބުރުގެ ފަހު ދެ މެޗާއި ފައިނަލް މެޗެވެ. ލީގު ބުރުގެ ފަހު ދެ މެޗުގެ ތެރެއިން ބުދަ ދުވަހު ހަވީރު ކުޅޭނީ ބަންގްލަދޭޝް އާއި ނޭޕާލް އެވެ. އަދި އެރޭ ކުޅޭ މެޗުގައި ބައްދަލުކުރާނީ ރާއްޖެ އާއި އިންޑިއާ އެވެ. މިހާރު އޮތް ގޮތުން މި ދެ މެޗުން މޮޅުވާ ޓީމެއް ފައިނަލަށް ދާއިރު، ދެ މެޗު ވެސް އެއްވަރުވެއްޖެނަމަ ފައިނަލް ކުޅޭނީ ރާއްޖެ އާއި ނޭޕާލް އެވެ.
