ނޫސްވެރިކަމުގެ އެވޯޑް ދޭން މޯލްޑިވްސް މީޑިއާ ކައުންސިލް (އެމްއެމްސީ) އިން މިރޭ ބާއްވާ ޖަލްސާ ހުއްޓުވުމުގެ ވަގުތީ އަމުރެއް ނެރެދިނުމަށް އެދި 20 ނޫސްވެރިން ފަރާތުން ސިވިލް ކޯޓަށް ހުށަހަޅާފައިވާ މައްސަލަ ނުބައި ސެކްޝަނަކަށް ހުށަހަޅާފައިވާ ކަމަށް ބުނެ އެ މައްސަލަ ކޯޓުން ބޭރުކޮށްފި އެވެ.
މި މައްސަލަ ބެއްލެވި ގާޒީ، އަބްދުއް ނާސިރު ޝަފީގު ދެންމެ ކުރި ހުކުމުގައި ވަނީ އަވަސް ނިޔާގެ މައްސަލަތައް ބަލާ ސެކްޝަނަށް އެ މައްސަލަ ބެލުމުގެ އިހްތިސާސް ނުލިބޭކަން ފާހަގަކުރައްވައިފަ އެވެ. ގާޒީ ހަވާލާދިނީ 2015 ވަނަ އަހަރު ސުޕްރިމް ކޯޓުން ނެރެފައިވާ ސާކިއުލާއަށެވެ.
އޭގައި ވަނީ ސިވިލް ކޯޓުގެ ހިންގުން ހަރުދަނާ ކުރުމަށްޓަކައި ފަަސް ޑިވިޝަނެއް ކަނޑައަޅާފައިވާ ކަމަށެވެ. އެގޮތުން އެ ޑިވިޝަންތަކުގެ ތެރެއިން މި މައްސަލަ ބެލޭނީ އިދާރީ މައްސަލަތައް ބަލާ ޑިވިޝަނުން ކަމަށް ގާޒީ ނިންމެވި އެވެ. އަދި އެ މައްސަލަ ކޯޓުގައި ބާއްވައިގެން އެހެން ސެކްޝަނަކަށް ނުފޮނުވޭނެ ކަމަށް ވެސް ވިދާޅުވި އެވެ.
ގާޒީ އިތުރަށް ވިދާޅުވީ މި މައްސަލަ އެ ސެކްޝަނަށް ހުށަހަޅައިގެން ކުރިއަށް ގެންދެވޭނެ ކަމަށް 20 ނޫސްވެރިން ތަމްސީލު ކުރި ވަކީލް މަރިޔަމް ޝުނާނާ ވަކާލާތު ކުރެއްވީ މައްސަލައިގެ ބާވަތުގެ އަސްލު އޮޅޭ ގޮތަށް ކަމަށެވެ.
އެހެންކަމުން އެ މައްސަލަ އިތުރަށް ކުރިއަށް ގެންދާނަމަ ޖެހޭނީ އެ މައްސަލައިގެ ބާވަތާއި ގުޅޭ ސެކްޝަނަށް އަލުން ހުށަހަޅާށެވެ. އެއީ ދައުވާ ފޯމަށް ބަދަލު ގެންނަން ޖެހޭތީ އެވެ.
މީޑިޔާ ކައުންސިލާއި ދެކޮޅަށް ހުށަހަޅާފައިވާ މި މައްސަލާގައި އެދިފައި ވަނީ މިރޭ ބާއްވަން ތާވަލްކޮށްފައިވާ ނޫސްވެރިންނަށް އެވޯޑް ދިނުމުގެ ޖަލްސާ ފަހުގެ ތާރީހަކަށް ލަސްކޮށްދިނުމަށް އެދި އަމުރެއް ނެރެދިނުމަށެވެ. އެއީ އެވޯޑު ދިނުމުގައި މީޑިޔާ ކައުންސިލުން އެކުލަވާލައިފައިވާ އުސޫލާއި ހިލާފަށް އަމަލުކޮށްފައިވާ ކަމަށް ބުނެއެވެ. އަދި އުސޫލާއި އެއްގޮތަށް އިންސާފުވެރި ފަނޑިޔާރުންގެ ޕެނަލެއް އެކުލަވާލުމަށް އެދިފައިވެ އެވެ.
ޝުނާނާ ފާހަގަކުރެއްވި ގޮތުގައި މިރޭ އިނާމު ދިނުމުގެ ޖަލްސާ ބާއްވައިފިނަމަ, އެތައް ނޫސްވެރިއެއްގެ ހައްގު ގެއްލިގެން ދާނެ އެވެ. އެހެންނަމަވެސް, އެމްއެމްސީން ބުނީ އެ ހަފްލާ ކުރިއަށް ގެންދަން ގިނަ ހަރަދުތަކެއް ކޮށްފައިވާ ކަމަށާއި، ސަރުކާރުގެ އިސްވެރިންގެ އިތުރުން ރައީސް އިބްރާހިމް މުހައްމަދު ސޯލިހަށް ވެސް ދައުވަތު އަރުވާފައިވާ ކަމަށެވެ. އަދި މިރޭ ޖަލްސާ ނުބޭއްވި ލަސްވެއްޖެނަމަ އިއާދަނުކުރެވޭ ބޮޑު ގެއްލުމެއް ދައުލަތަށް ލިބިގެން ދާނެ ކަމަށެވެ.
ޝުނާނާ ވިދާޅުވީ އެ ނިންމުން ހައިކޯޓުގައި އިސްތިއުނާފް ކުރާނެ ކަމަށެވެ.
