ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް ރާއްޖޭން މަރުހަބާ ދަންނަވަން ރައީސް އިބްރާހިމް މުހައްމަދު ސޯލިހު އެއާޕޯޓަށް ވަޑައިގަތުމަށް ހަމަޖެހިއްޖެ އެވެ.
ނަޝީދަށް ދިން ޓެރަރިސްޓު ހަމަލާއާ ގުޅިގެން ލިބިވަޑައިގެންނެވި ޒަހަމްތަކަށް ރާއްޖޭން ބޭރުގައި ފަރުވާ ހޯއްދަވަން ހަތަރު މަހަށް ވުރެ ގިނަ ދުވަހު ހުންނެވުމަށްފަހު، އެމަނިކުފާނު އެނބުރި މިއަދު މާލެ ވަޑައިގަންނަވަނީ ދުބާއީ މަގުން މެންދުރުފަހުގެ ވަގުތެއްގަ އެވެ.
ދުބާއީ އެކްސްޕޯގައި ބައިވެރިވެވަޑައިގެންނެވުމަށް މިވަގުތު ޔޫއޭއީގައި ހުންނެވި ނަޝީދު މާލެ ވަޑައިގަންނަވާނީ ކުޑަ ދުވަސްކޮޅަކަށް ކަމަށްވެ އެވެ.
"އަދަދު"އަށް އެނގިފައިވާ ގޮތުގައި ނަޝީދަށް މަރުހަބާ ދެންނެވުމަށް މިއަދު ރައީސް ސޯލިހު އެއާޕޯޓަށް ވަޑައިގަންނަވާނެ އެވެ. މީގެކުރިން ކުރީގެ ރައީސް އަބްދުالله ޔާމީންގެ ވެރިކަން ނިމުމުން ނަޝީދު ރާއްޖެ ވަޑައިގެންނެވި ދުވަހު ވެސް މަރުހަބާ ދެންނެވީ ރައީސް ސޯލިހެވެ.
ހަތަރު މަހަށްފަހު, ދެ ބޭފުޅުން މިއަދު ބައްދަލުވާއިރު ސިޔާސީ ގޮތުން ދެ ބޭފުޅުންގެ ގުޅުން ހީނަރުވެފައިވާ ކަމަށް ވަނީ ވިދާޅުވެފަ އެވެ. ނަޝީދު ވަނީ ސިޔާސީ ގޮތުން ރައީސް ސޯލިހާއެކު އިތުރަށް ހުރެވެން ނެތް ކަމަށް ވެސް ވިދާޅުވެފަ އެވެ.
އޭގެފަހުން އެމްޑީޕީގެ ގައުމީ މަޖިލީހުގެ އިންތިހާބަށް ދެ ރައީސުން ވެސް ކެންޑިޑޭޓުން ނެރުނެވެ. އެ އިންތިހާބުން ގިނައިން ކާމިޔާބު ހޯދީ ރައީސް ސޯލިހުގެ ކެންޑިޑޭޓުން ކަމަށް ވަނީ ދައުވާކޮށްފަ އެވެ.
ރައީސާއި ނަޝީދާ ދެމެދު އެންމެ ބޮޑު ހިޔާލު ތަފާތުވުމެއް އޮތީ ވެރިކަމުގެ ނިޒާމް ބަރުލަމާޒީ ނިޒާމަކަށް ބަދަލުކުރުމާ ގުޅޭ ގޮތުންނެވެ. ނަޝީދު ބޭނުން ވަނީ ނިޒާމް ބަދަލުކޮށް އަންނަ ރިޔާސީ އިންތިހާބު ނުބާއްވައި, ބޮޑުވަޒީރެއް އައްޔަން ކުރުމެވެ.
ނަމަވެސް, ރައީސް ސޯލިހަށް އެކަމަށް ތާއިދެއް ނުކުރައްވަ އެވެ. އަދި, ކޯލިޝަންގެ އެހެން ޕާޓީތައް އެކަމާ ސީދާ ދެކޮޅެވެ.
ހަރުކަށި ފިކުރުގެ ބަޔަކު ނަޝީދަށް 2019 ވަނަ އަހަރުން ފެށިގެން ފާރަލައި ބޮމެއް ގޮއްވާލައިގެން ދެ ފަހަރަށް ދޭން އުޅުނު ހަމަލާ ނާކާމިޔާބުވުމުން ތިން ވަނަ ހަމަލާ އަމާޒުކުރީ މިދިޔަ މެއި މަހުގެ ހަ ވަނަ ދުވަހުގެ ރެ އެވެ.
ސައިކަލެއްގައި ހަރުކޮށްގެން ބޮން ގޮއްވާލީ ކެނެރީގެއިން ނުކުމެވަޑައިގެން މަޖީދީމަގުގައި އޮތް ކާރުކޮޅަށް އަރާވަޑައިގަންނަވަން އުޅުއްވަނިކޮށެވެ. އެ ހަމަލާ އިން އެމަނިކުފާނުގެ ފުރާނަ ސަލާމަތްވީ ކިރިޔާ ކަމަށް އޭޑީކޭގެ ޑޮކްޓަރުން ވިދާޅުވެފައިވެ އެވެ.
