ވޮޝިންޓަން، އެމެރިކާ (އޮކްޓޯބަރު 11) - އަފްގާނިސްތާނުގެ ސެކިއުރިޓީ އާއި އިންސާނީ ހައްގުތަކުގެ ހާލަތާ ގުޅޭ ގޮތުން މަޝްވަރާ ކުރުމަށް އެމެރިކާގެ އޮފިޝަލުން ތާލިބާނުންގެ އިސް މަންދޫބުންނާ ގަތަރުގައި ބައްދަލުކޮށްފި އެވެ.
ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވީ އެމެރިކާގެ އިންޓައެޖެންސީ ވަފުދެއް ދޯހާ އަށް ދަތުރު ކުރީ ހޮނިހިރު ދުވަހާއި އާދީއްތަ ދުވަހު އޮތް ބައްދަލުވުންތަކަށް ކަމަށެވެ.
މަޝްވަރާތައް އަމާޒު ކުރީ "ސެކިއުރިޓީ އާއި ޓެރަރިޒަމްއާ ގުޅޭ ކަންބޮޑުވުންތަކާއި އެމެރިކާ އާއި އެހެން ގައުމުތަކުގެ މީހުންނަށް ރައްކާތެރިކަމާއެކު އަފްގާނިސްތާން ދޫކޮށް ދެވޭނެކަން ކަށަވަރު ކުރުމަށް" ކަމަށް އޭނާ ވިދާޅުވި އެވެ.
އޭގެ އިތުރުން އިންސާނީ ހައްގުތަކާއި މުޖުތަމައުގެ ހުރިހާ ކަމެއްގައި އަންހެނުންގެ ބައިވެރިވުން ޔަގީން ކުރުމާ ގުޅޭ ގޮތުން ވެސް މަޝްވަރާ ކުރި ކަމަށް ޕްރައިސް ނެރުނު ބަޔާނެއްގައި ވިދާޅުވި އެވެ.
"އަފްގާން ރައްޔިތުންނަށް އެމެރިކާ އިން ފޯރުކޮށްދޭ އިންސާނީ އެހީއާ ގުޅޭ ގޮތުން ވެސް ދެ ފަރާތުން މަޝްވަރާކުރި،" ބަޔާނުގައި ވެ އެވެ.
އެމެރިކާ އިން ތާލިބާނުންނާ މެދު ގޮތް ނިންމާނީ ދައްކާ ވާހަކައިގެ ބަދަލުގައި އަމަލުތަކަށް ބެލުމަށް ފަހު ކަމަށް އަނެއްކާ ވެސް ތަކުރާރުކޮށް ޕްރައިސް ވިދާޅުވި އެވެ.
އޯގަސްޓް މަހު ވެރިކަމަށް އައި ތާލިބާނުން ބޭނުން ވަނީ ބައިނަލްއަގްވާމީ މުޖުތަމައިން އެ މީހުން ބަލައިގަންނާށެވެ. އޭގެ އިތުރުން އަފްގާނިސްތާނަށް ދިމާވެފައިވާ އިންސާނީ އަދި އިގްތިސާދީ ކާރިސާ އިން އަރައިގަތުމަށް ބޭރުގެ އެހީ ވެސް ބޭނުންވެ އެވެ.
