ޒަރަންޖް، އަފްގާނިސްތާން (އޮކްޓޯބަރު 9) - މީގެ ދެ މަހެއްހާ ދުވަސް ކުރިން އަފްގާނިސްތާނުގެ ވެރިކަމަށް ތާލިބާނުން އައުމާއެކު އިރާނުގެ ބޯޑަރު ކައިރިއަށް ޖަމާވާ އަފްގާނިސްތާނު ރައްޔިތުންގެ އަދަދު ވަރަށް ބޮޑު ތަނުން އިތުރުވެއްޖެ އެވެ.
އޯގަސްޓު 15 ވަނަ ދުވަހު ތާލިބާނުން ވެރިކަމަށް އައުމުގެ ކުރިން ކޮންމެ މަހަކު ވެސް 1000-2000 އާ ދެމެދުގެ އަދަދަކަށް މީހުން ހުޅަނގު ދެކުނު ނިމްރޯޒް ޕްރޮވިންސްގެ ޒަރަންޖް ބޯޑަރު ސްޓޭޝަން މެދުވެރިކޮށް އިރާނަށް އެތެރެވެ އެވެ.
ނިމްރޯޒް ޕްރޮވިންސްގެ ބޯޑަރު ކޮމާންޑަރު މުހައްމަދު ހާޝިމް ހަންޒަލީ ވިދާޅުވީ އޭގެ ފަހުން އަފްގާނިސްތާނު ދޫކޮށް އިރާނަށް އެތެރެވާން މަސައްކަތް ކުރާ މީހުންގެ އަދަދު ކޮންމެ ދުވަހަކު 3000-4000 އަށް މިހާރު އަރާފައިވާ ކަމަށެވެ.
އިރާނަށް އެތެރެވާން މަސައްކަތް ކުރާ އަފްގާނިސްތާނު ރައްޔިތުންގެ އަދަދު އިތުރުވެފައި މި ވަނީ އިގްތިސާދީ އަދި އިންސާނީ ކާރިސާއެއް ކުރިމަތިވެފައި ވަނިކޮށެވެ. އަފްގާނިސްތާނުގެ އާބާދީގެ ތިންބައިކުޅަ އެއްބައި މީހުންނަށް ބަނޑުހައި ހޫނުކަމާ ކުރިމަތިވެފައިވާ ކަމުގެ އިންޒާރު އދ. އިން ވަނީ ދީފަ އެވެ.
ނަމަވެސް ހަންޒަލީ ވިދާޅުވީ ގައުމު ދޫކޮށް ދާން ބޭނުންވާ ލިޔެކިޔުންތައް ހިފައިގެން އަންނަނީ ވަރަށް މަދު އަދަދެއްގެ މީހުން ކަމަށެވެ.
އޭނާ ވިދާޅުވީ ވިޔަފާރިވެރިންނާއި، ރެޒިޑެންސް ވިސާ އަދި ސިއްހީ ފަރުވާ ހޯދަން ބޭނުންވާ ވިސާ ހިފައިގެން އަންނަ މީހުން "އިރާނުގެ ފައުޖުތަކުން ނުހުއްޓުވާނެ" ކަމަށެވެ. އެގޮތުން ކޮންމެ ދުވަހަކު ގިނަވެގެން 600 މީހުން އިރާނަށް އެތެރެވާން ހުއްދަދޭ ކަމަށް ފާހަގަކުރެއްވި އެވެ.
ލިޔެކިޔުންތައް ނެތި ބޯޑަރު ކައިރިއަށް ޖަމާވާ މީހުންނަށް އިރާނުގެ ބޯޑަރު ސެކިއުރިޓީން އަނިޔާކުރާ ކަމަށް އެ މީހުން ބުނެ އެވެ. އޭގެ އިތުރުން ބޯޑަރު ފާރުގެ މަތިން ވަގަށް އަރައިގެން އިރާނަށް އެތެރެވާން އުޅޭ މީހުންގެ ގަޔަށް ބަޑި ވެސް ޖަހަ އެވެ.
ނަމަވެސް ބޯޑަރު ކައިރިއަށް ތޮއްޖެހިފައިވާ ގިނަ މީހުން އިރާނަށް އެތެރެވާން ކުރާ މަސައްކަތް ހުއްޓައެއް ނުލަ އެވެ. ލިޔެކިޔުން ނެތް ނަމަވެސް، އިރާނުގެ ގާޑުންނަށް ސިއްރުން ބޯޑަރު ހުރަސް ކުރެވޭތޯ އެކި ދުވަސް މަތިން އެ މީހުން މަސައްކަތް ކުރާ ކަމަށް ރިޕޯޓުތައް ބުނެ އެވެ.
