އުރީދޫ ސާފް ޗެމްޕިއަންޝިޕްގައި އިންޑިއާ ގައުމީ ޓީމު ކުޅުނު ފުރަތަމަ މެެޗުގެ ނަތީޖާގެ ސަބަބުން، ސޯޝަލް މީޑިއާގައި ކިތަންމެ ވަރަކަށް ފާޑުކިއުންތައް އަމާޒުކުރުވިޔަސް، އެކަމަށް ސަމާލުކަމެއް ނުދޭނެ ކަމަށް އިންޑިއާގެ ކޯޗު އީގޯ ސްޓިމަކް ބުނެފި އެވެ.
މުބާރާތުގައި އިންޑިއާ ކުޅުނު ފުރަތަމަ މެޗުގައި ބަންގްލަދޭޝްއާ 1-1 އިން އެއްވަރުވިއިރު، މެޗުގައި ފުރަތަމަ ލީޑު ނެގީ އިންޑިއާ އިންނެވެ. އަދި ބަންގްލަދޭޝުން މެޗުގެ ނަތީޖާ އެއްވަރުކުރީ އެ ޓީމުގެ ކުޅުންތެރިޔަކަށް ރަތްކާޑު ދައްކައި، 10 ކުޅުންތެރިންނަށް އެ ޓީމު މަދުވެފައިވަނިކޮށެވެ. ފަހު 40 މިނިޓް ބަންގްލަދޭޝް އިން ކުޅުނީ ކުޅުންތެރިއަކު މަދުކޮށެވެ.
އެ މެޗަށް ފަހު، އިންޑިއާގެ ޓީމާއި، 2019 ވަނަ އަހަރު އެ ޓީމުގެ ކޯޗުކަމާ ހަވާލުވި ސްޓިމަކް އަށް ގިނަ ފާޑުކިއުންތަކެއް ވަނީ އަމާޒުވެފަ އެވެ.
މި މުބާރާތުގައި މާދަމާ ހަވީރު ސްރީލަންކާއާ ދެކޮޅަށް އިންޑިއާ ކުޅޭ މެޗުގެ ކުރިން މިއަދު ހަވީރު އޮތް ނޫސްވެރިންގެ ބައްދަލުވުމުގައި ސްޓިމަކް ބުނީ ފާޑުކިއުންތަކުން އޭނާ އަށް ޕްރެޝަރުގެ އަސަރެއް ނުކުރާނެ ކަމަށެވެ. އަދި ސޯޝަލް މީޑިއާގައި ބަޔަކު ކިޔާ އެއްޗަކަށް، "ސީރިއަސް މީހުން" އަޅާނުލާނެ ކަމަށެވެ.
"ޕްރެޝަރާމެދު ނުވިސްނަން. އަދި އެ ޕްރެޝަރު އަހަރެންގެ ކުޅުންތެރިންނާ ހަމައަށް ދިޔަކަ ނުދޭނަން. މި މަގާމާ އަހަރެން ހަވާލުވީ އިންޑިއާގެ ފުޓްބޯޅަ އަށް އެހީވާން،" ކްރޮއޭޝިއާ އަށް ނިސްބަތްވާ ސްޓިމަކް ބުންޏެވެ.
"ކާމިޔާބުތަކަށް ވާސިލްވާނެ ޓީމެއް ބިނާކުރުން އަހަންނާ ހަވާލުކުރި މަސައްކަތަކީ. އެކަމަށް ވަގުތު ނަގާނެ. އެންމެ ފުރަަތަމަ ދުވަހުން ފެށިގެން، ސޯޝަލް މީޑިއާގައި ފާޑުކިޔާ މީހުން އެކަން ފަށައިފި. އެކަމަކު އަހަންނަށް އެނގޭ ކަމަކީ ޓީމަށް ކުޅުންތެރިން އަދި ކޯޗު ވެސް ނަގާނީ ސޯޝަލް މީޑިއާއަކުން ނޫންކަން. އެމީހުން ބޭނުން އެއްޗެއް ލިޔަންވީ. އެކަމަކު ސީރިއަސް މީހުން އެކަމާ ނުވިސްނާނެ."
ލަންކާގެ ކުޅުމަށް ސްޓިމަކްގެ ތައުރީފްް
ސްރީލަންކާ މި މުބާރާތުގައި މިހާތަނަށް ކުޅުނު ދެ މެޗުން ބަލިވިޔަސް، އެ ދެ މެޗުގައި ވެސް އެ ޓީމު ވަނީ ރަނގަޅު ވާދައެއްކޮށްފަ އެވެ. ލަންކާއާ ދެކޮޅަށް މިހާތަނަށް ކުޅުނު ބަންގްލަދޭޝާއި ނޭޕާލްގެ ކޯޗުން ވެސް ލަންކާގެ "ފިޒިކަލް ފުޓްބޯޅަ"ގެ ވާހަކަ ދެއްކި އެވެ. އަދި ހާއްސަކޮށް، ނޭޕާލްގެ ކޯޗު އަބްދުﷲ އަލް މުތައިރީ ވަނީ ލަންކާ ޓީމުގެ ފައުލް ގިނަކަން ފާހަގަކޮށްފަ އެވެ.
އެކަމަކު، ލަންކާ ޓީމާ ގުޅޭގޮތުން ސްޓިމަކްއާ މިއަދު ސުވާލުކުރުމުން، އޭނާ ވަނީ ލަންކާގެ ޓީމުގެ ކުޅުމަށް ތައުރީފްކޮށްފަ އެވެ. ސްޓިމަކް ލަންކާގެ ޓީމު ސިފަކުރީ މަސައްކަތުގެ ރޭޓު ރަނގަޅު، ހިތްވަރު ގަދަ ޓީމެއްގެ ގޮތުގަ އެވެ.
"ސްރީލަންކާ އަކީ ވަރަށް ހިތްވަރުކުރާ ޓީމެއް. ފަހު ވަގުތާ ހަމައަށް ވެސް މަސައްކަތް ކުރޭ. އެމީހުން މޮޅުވާން އެ ކުޅެންޖެހޭ ގޮތަކަށް އެ ކުޅެނީ. އެއީ މައްސަލައެއް ނޫން. ސްރީލަންކާއާ ދެކޮޅަަށް ކުޅެން ފަސޭހައެއް ނުވާނެ. އަހަރަމެން ޖެހޭނީ ވަރަށް ބޮޑަށް ކެތްތެރިވެ، ލިބޭ ފުރުސަތުތަކުގެ ބޭނުން ހިފަން،" ސްޓިމަކް ބުންޏެވެ.
އިންޑިއާ އާއި ސްރިލަންކާ މިހާތަނަށް 16 ފަހަރު ބައްދަލުކޮށްފައިވާއިރު، އިންޑިއާ ވަނީ ނުވަ މެޗު ކާމިޔާބުކޮށްފަ އެވެ. ލަންކާ މޮޅުވެފައިވަނީ ތިން މެޗުންނެވެ.
އިންޑިއާ އަތުން ލަންކާ އެންމެ ފަހުން މޮޅުވީ 2000 ވަނަ އަހަރު ދިވެހިރާއްޖޭގައި އޮތް ގޯލްޑަން ޖުބުލީ މުބާރާތުގަ އެވެ.
ސްޓިމަކް ބުނީ ބަންގްލަދޭޝާ ދެކޮޅަށް ކުޅުނު މެޗަށް ނެރުނު ފުރަތަމަ 11 އަށް ބަދަލުތަކެއް އައިސްދާނެ ކަމަށެވެ. އެކަމަކު ކުޅުންތެރިންގެ ހާލަތު މުޅިން އެނގޭނީ މިއަދު އޮންނަ ފަރިތަކުރުންތަކަށް ފަހު ކަމަށެވެ.
އިންޑިއާ އާއި ލަންކާ ބައްދަލުކުރާ މެޗު ފަށާނީ މާދަމާ ހަވީރު 16:00ގަ އެވެ.
