އޭޝިއަން ޓޭބަލް ޓެނިސް ޔޫނިއަންގެ ކައުންސިލް މެމްބަރު ކަމަށް ރާއްޖޭގެ ޓޭބަލް ޓެނިސް އެސޯސިއޭޝަން (ޓީޓީއޭއެމް)ގެ ރައީސް އަލީ ރަޝީދު (އައްޔަ) އިންތިހާބު ކޮށްފި އެވެ.
މީގެ އިތުރުން ރާއްޖޭގެ ޓޭބަލް ޓެނިސް އެސޯސިއޭޝަންގެ ނައިބު ރައީސް ކުރީގެ ކުޅުންތެރިޔާ އިބްރާހިމް ޝިއުރީ ވަނީ އޭޝިއާގެ ޓީޓީ ޔޫނިއަންގެ މީޑިއާ ކޮމިޓީ އަށް އިންތިހާބުކޮށްފަ އެވެ.
އައްޔަ އާއި ޝިއުރީ މަގާމުތަކަށް އިންތިހާބުކުރީ މިއަދު ބޭއްވި އޭޝިއަން ޓޭބަލް ޓެނިސް ޔޫނިއަންގެ ކޮންގްރެސްގަ އެވެ. ކޮންގްރެސް ކުރިއަށްދިޔައީ މިހާރު ގަތަރުގެ ދޯހާގައި ބާއްވާ އޭޝިއަން ޓޭބަލް ޓެނިސް ޗެމްޕިއަންޝިޕްގެ ތެރެއިން މިއަދު ކުރިއަށްދިޔަ ކޮންގްރެސްގަ އެވެ.
އޭޝިއަން ޓޭބަލް ޓެނިސް ޔޫނިއަންގެ އާ ރައީސަކީ ގަތަރުގެ ހަލީލް އަލް މޮހަނާދީ އެވެ. ޑެޕިއުޓީ ރައީސުންނަކީ ޗައިނާގެ ޒޫ ޝީން އާއި ދެކުނު ކޮރެއާގެ ކިމް ޓައެ ސޫ އެވެ. އަދި ސެކްރެޓަރީ ޖެެނެރަލަކަށް އީރާންގެ އަފްޝީން ބަދްއީ އައްޔަންކުރިއިރު، ހަޒާންދާރަކަށް ހޮވީ އޮމާންގެ މުހައްމަދު ބާގިރު ސަޖަދު އެވެ.
ރާއްޖޭގެ ގިނަ ކުޅިވަރު އެސޯސިއޭޝަންތަކުގެ ރައީސުންނާއި ނައިބު ރައީސުން ވަނީ އޭޝިއާ އާއި ދުނިޔޭގެ ފެޑެރޭޝަންތަކުގެ އިސް އެކި މަގާމުތައް ފުރުއްވައިފަ އެވެ. ޓީޓީ އެެސޯސިއޭޝަންގެ ރައީސް އައްޔަ އާއި ނައިބު ޝިއުރީ އަށް މިއަދު މި ލިބުނު މަގާމުތަކުގެ ސަބަބުން ޓީޓީ އަށް ރަނގަޅު ފުރުސަތުތަކެއް ފަހިވާނެ އެވެ.
ބައިނަލްއަގުވާމީ މުބާރާތްތަކުގައި ޓީޓީން އަންނަނީ ފަހަކަށް އައިސް ގިނަ ކާމިޔާބީތަކެއް ހޯދަމުންނެވެ.
އައްޔަ، ޓީޓީ އެސޯސިއޭޝަންގެ ރައީސަކަށް ދެ ވަނަ ދައުރަކަށް އިންތިހާބުވެވަޑައިގަތީ މިދިޔަ އަހަރު ސެޕްޓެމްބަރު މަހު ބޭއްވި އިންތިހާބު ކާމިޔާބު ކޮށްގެންނެވެ. އޭގެ ފަހުން އޭނާ އަންނަނީ ޓީޓީ ކުރިއަރުވަން ޕްލޭންތަކެއް ހަދައި ގިނަ މަސައްކަތްތަކެއް ކުރަމުންނެވެ.
