އުއްތަމަ ފަނޑިޔާރު އަހުމަދު މުއުތަސިމް އަދުނާން ދިރިއުޅުއްވާ ގެކޮޅަށް މީހަކު ވަދެ، ތަކެއްޗަށް ގެއްލުން ދެވުނު މައްސަލަ ރައްޔިތުންގެ މަޖިލީހަށް މިއަދު ހުށަހަޅައިފި އެވެ.
ފޮނުދޫ ދާއިރާގެ އެމްޑީޕީ މެމްބަރު މޫސާ ސިރާޖު މިއަދުގެ ޖަލްސާއަށް ހުށަހެޅުއްވި މައްސަލައިގައި ބުނެފައިވަނީ، އުއްތަމަ ފަނޑިޔާރުގެ ގެކޮޅަށް މީހަކަށް ވަދެވުމަކީ މުޅި ގައުމުގެ ސެކިޔުރިޓީ އާ މެދު ސުވާލު އުފެދޭ ބިރުވެރި ކަމެއް ކަމަށެވެ.
އަދި ރައްޔިތުންގެ މަޖިލީހުގެ ރައީސް، ކުރީގެ ރައީސް މުހައްމަދު ނަޝީދު ދިރިއުޅުއްވާ ގެކޮޅު ކައިރިން ބޮމެއް ގޮއްވާލައިގެން އެމަނިކުފާނު އަވަހާރަކޮށްލަން ޓެރަރިސްޓު ހަމަލާއެއް ދީފައިވާ ދަނޑިވަޅެއްގައި، ދައުލަތުގެ އަނެއް ބާރުގެ އެންމެ އިސްވެރިޔާގެ ގެއަށް މީހަކު ވަދެވުމަކީ ކަންބޮޑުވާންޖެހޭ ކަމެއް ކަމަށެވެ.
އެހެންކަމުން، އެ ހާދިސާ ސީރިއަސްކޮށް ތަހުގީގުކުރަން އެ މައްސަލައިގައި ދައުލަތުގެ ކަމާބެހޭ އިދާރާތަކަށް ވަނީ ގޮވާލައިފަ އެވެ.
މޫސާ ސިރާޖު ހުށަހެޅުއްވި މައްސަލަ، ބަހުސްކުރަން މަޖިލީހުގެ ތަޅުމުން ބަލައިގެންފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 28 މެމްބަރުންގެ އިއްތިފާގުންނެވެ.
އެ މީހާ ވަނީ ހައްޔަރުކޮށްފައި
އެ މައްސަލަ މިއަދު މަޖިލީހަށް ބައިގެންފައިވާއިރު، އުއްތަމަ ފަނޑިޔާރުގެ ގެކޮޅަށް ވަތް މީހާ ވަނީ ހައްޔަރުކޮށްފަ އެވެ.
މުއުތަސިމް އެމަނިކުފާނުގެ އާއިލާގެ މެމްބަރުންނާއެކު ދިރިއުޅުއްވާ ގެކޮޅަށް މިދިޔަ ބުރާސްފަތި ދުވަހު މީހަކު ވަން މައްސަލައިގައި ފުލުހުން ހައްޔަރުކޮށްފައި ވަނީ މ. ސީވިންޑް، ފާތިހް ޝާކިރު، 46، އެވެ. އޭނާގެ ބަންދުގެ މުއްދަތު ޖަހަން ކޯޓަށް ގެންދިއުމުން ހަތް ދުވަހު ޖަލުގައި ބެހެއްޓުމަށް ވަނީ އަމުރުކޮށްފަ އެވެ.
ކްރިމިނަލް ކޯޓުގައި ފާތިހު އިއްޔެ ވަނީ އޭނާގެ ކުށަށް އިއުތިރާފުވެފަ އެވެ. ނަމަވެސް ބުނެފައި ވަނީ މުއުތަސިމްގެ ގެކޮޅަށް ވަދެ ގެއްލުން ދިނީ އާދަޔާ ހިލާފް މިންވަރަކަށް ބާރުގަދަ މަސްތުވާއެއްޗެއް ކަމަށްވާ "ވާނުވާ" ބޭނުންކޮށްގެން ކަމަށެވެ.
ފާތިހު ބުނީ އޭނާ މަސްތުވެގެން ހުރި ވަގުތު ހިނގާ ކަންތައް އެއްވެސް މިންވަރަކަށް އޮޅުން ނުފިލާ ކަމަށެވެ. އެގޮތުން މުއުތަސިމްގެ ގެކޮޅަށް ވަދެވުނު އިރު ވެސް ކުރެވުނު ކަންތައް ނޭނގޭ ކަމަަށް ފާތިހު ބުންޏެވެ. ނަމަވެސް ގެކޮޅަށް ވަންނަ ސީސީޓީވީ ފުޓޭޖުން ފެންނަނީ އޭނާ ކަމަށް ފާތިހު ވަނީ އިއުތިރާފުވެފަ އެވެ.
މުއުތަސިމްގެ ގެކޮޅަށް ވަދެ ގެއްލުންދިން މައްސަލަ ތަހުގީގު ކުރުމަށް ފުލުހުންނަށް ހުށަހަޅާފައި ވަނީ އެމަނިކުފާނަށް ސެކިއުރިޓީ ފޯރުކޮށްދޭ ސިފައިންގެ ފަރާތުންނެވެ. އެ ހާދިސާއާއެކު ސިފައިން މުއުތަސިމަށް ފޯރުކޮށް ސަލާމަތީ ހިދުމަތް ވަރުގަދަ ކުރުމަށް ބައެއް ފަރާތްތަކުން ވަނީ ގޮވާލައިފަ އެވެ.
