އުރީދޫ ސާފް ޗެމްޕިއަންޝިޕްގައި ނޭޕާލް ކުޅުނު ފުރަތަމަ ދެ މެޗުން މޮޅުވުމުން މިހާރު ޕްރެޝަރު އޮތީ ދެން ހުރި ޓީމުތަކަށް ކަމަށާއި މުބާރާތް ކުރިއަށްދާ ވަރަކަށް އަދިވެސް ސަޕްރައިޒްތަކެއް ފެނިދާނެ ކަމަށް ނޭޕާލްގެ ކޯޗު އަބްދުﷲ އަލް މުތައިރީ ބުނެފި އެވެ.
ނޭޕާލުން ވަނީ މި ފަހަރުގެ މުބާރާތުގެ ފުރަތަަމަ މެޗުން ރާއްޖެ އަތުން 1-0 އިން މޮޅުވެފަ އެވެ. ރޭ ދެ ވަނަ މެޗުން ސްރީ ލަންކާ އަތުން 3-2 އިން މޮޅުވިއިރު، ނޭޕާލް އޮތީ ކުޅުނު ދެ މެޗު ކާމިޔާބު ކޮށްގެން ލީގު ބުރުގެ އެއް ވަނައިގަ އެވެ. ފަސް ޓީމު ކުޅޭ މި މުބާރާތުގެ ފައިނަލަށް ހޮވޭނީ އެންމެ ގިނަ ޕޮއިންޓް ހޯދާ ދެ ޓީމެވެ.
ރޭ ލަންކާއާ ދެކޮޅަށް ކުޅުނު މެޗަށް ފަހު އޮތް ނޫސްވެރިންގެ ބައްދަލުވުމުގައި މުތައިރީ ބުނީ މުބާރާތެއްގައި އެންމެ މުހިއްމު ކަމަކީ ޕޮއިންޓް ހޯދުން ކަމަށެވެ. އަދި ދެ މެޗުން ހޯދޭނެ ޖުމްލަ އަދަދު، ހަ ޕޮއިންޓް ނޭޕާލަށް ލިބިފައި އޮތުމުން އޭނާ ދެކެނީ ނޭޕާލް މި އޮތީ ފައިނަލަށް ކޮލިފައިވުމުގެ "އެއް ޕަސެންޓް ހާސިލްވެފައި" ކަމަށް މުތައިރީ ބުންޏެވެ.
ދެ މޮޅާ އެކު ތާވަލުގެ ކުރީގައި އޮތް ނަމަވެސް މުތައިރީ ވަނީ ނޭޕާލްގެ ކުޅުންތެރިންނާއި ސަޕޯޓަރުން އަދި އެންމެންގެ ކިބައިން އަދި ހަމަޖެހިގެން މާ ބޮޑަށް އުފާފާޅުުނުކުރަން އެދިފަ އެވެ.
"މިހާރު ޕްރެޝަރު އޮތީ އެހެން ޓީމުތަކަށް. އަހަރެމެން 7 އޮކްޓޫބަރަށް މަޑުކުރާނަން. އެހެން ސަޕްރައިޒްތަކެއް ވެސް ހިނގާފާނެ،" މުތައިރީ ބުންޏެވެ.
"އަހަރެންގެ ނަަޒަރުގައި އެއްވެސް މެޗެއް ޔަގީނެއް ނުކުރެވޭނެ. ނުބުނެވޭނެ މި މެޗުން މޮޅުވާނަމޭ މި މެޗުން ބަލިވާނަމޭ. މި މެޗު އެއްވަރުކުރާނަމޭ. ތިން ދުވަސް ފަހުން ވަރަށް ބައިވަރު އަހަރެމެންނަށް ގަބޫލުކުރަން ދަތި ސަޕްރައިޒްތަކެއް ވެސް ފެނިދާނެ. މިހާރު އިންޑިއާ އަށް ޕްރެޝަރު އޮންނާނެ. ބަންގްލަދޭޝާ އެއްވަރުވެ، ދެ ޕޮއިންޓް ގެއްލުނީމަ،"
ރޭގެ މެޗަށް ފަހު މުތައިރީ (ވ) ލަންކާ ކުޅުންތެރިއަކު ގައިގައި ބައްދައިގެން.-- ފޮޓޯ: ހުސެއިން ވަހީދު/ އަދަދު
މުތައިރީ ބުނީ މީޑިއާގައި ދައްކަން ޖެހޭ ހުރިހާ ވާހަަކައެއްގެ ޒިންމާ އޭނާ ނަގާނެ ކަމަށާއި ކުޅުންތެރިންނަށް އެއްވެސް ޕްރެޝަރެއް ނުދޭނެ ކަމަށެެވެ. ސަބަބަކީ ފުޓްބޯޅަ އަކީ ވަރަށް ބޮޑަށް އެ ގެންގުޅޭ ވިސްނުމަކާ ގުޅިފައި އޮތް ކުޅިވަރަކަަށް ވާއިރު، ކުޅުންތެރިން ތިބެން ޖެހޭނީ ޕްރެޝަރާ ދުރުގައި ކަމަށް އޭނާ ދެކޭތީ އެވެ.
"އަހަރެން އެހެންވެ ކުޅުންތެރިން ވަށައިގެން ބޮޑު ފާރެއް ބައިންދައިގެން މި އުޅެނީ. އަހަރެން ޖެހޭ އަހަރެމެންގެ ޕްލޭޔަރުން ޕްރެޝަރާ ދުރުގައި ބަހައްޓަން،" މުތައިރީ ބުންޏެވެ.
މުތައިރީ ބުނީ ނޭޕާލް ކޯޗުކަމާ ހަވާލުވިއިރު އޭނާ ހާސިލް ކުރަން ބުނީ ތިން ކަމެއް ކަމަށެވެ. އޭގެ ތެރެއިން ދެ ކަމެއް ކުރެވުނުއިރު، މި ފަހަރުގެ މުބާރާތުގައި ތިން ވަނަ ކަންތައް ވެސް ހާސިލްކުރެވެމުން އަންނަ ކަމަށެވެ. އެއީ މުބާާރާތްތަކުގައި މޮޅަށް ކުޅުމަށް ވުރެ ނަތީޖާ ނެރުމާއި ޕޮއިންޓް ހޯދުން މުހިއްމު ކަމަށެވެ.
"ރަހުމަތްތެރިކަމުގެ މެޗުތައް ކުޅޭނަަމަ ކުޅުމަށް ވިސްނަންވީ. އެއީ މެޗުން ނަތީޖާ ނެރެން އެ ކުޅުން މުހިއްމުވާނެތީ. ދެން މެޗަށް ނުކުމެފައި ނަތީޖާ ނުނެރެ ބޯޅަ ހިފެހެއްޓުމުގެ މާނައެއް ނެތް. ފަހަރެއްގައި މީހުން ހިތްހަމަނުޖެހިދާނެ މިރޭ (ރޭ) އާއި ރާއްޖެ މެޗުގައި އަހަރެމެން ކުޅުނު ގޮތުން. އެ ކަމަކު ކީއްވެ އެކަމާ އަހަރެން ދެރަވާންވީ އަހަރެން އަތުގައި ދެ މެޗުން ލިބެންޖެހޭ ހަ ޕޮއިންޓް އެބައޮތް،" މުތައިރީ ބުންޏެވެ.
ލަންކާ އިން ރޭ ތަފާތު ދެއްކީ ޖަރުމަނު ދެ ވަނަ ޑިވިޝަނުގައި ކުޅުނު ވަސީމް ރަޒީކް އާއި އިނގިރޭސި ސްޓޭޓް ޑިިވިޝަނުގައި ކުޅޭ މާވިން ހަމިލްޓަން އަދި ކިއުޕީއާރް 23 އަހަރުން ދަށުގެ ޓީމަށް ކުޅޭ ޑިލޯން ޑި ސިލްވާ އެވެ. މިއީ ދާދި ފަހުން އެ ޓީމުން ފުރުސަތު ދިން ކުޅުންތެރިންނެވެ.
މުތައިރީ ބުނީ އެ ގޮތަށް އެހެން ގައުމުތަކުގައި ތިބި އެ ގައުމަކަށް ނިސްބަތްވާ ކުޅުންތެރިންނަށް ފުރުސަތު ދިނުމަކީ ރަނގަޅު ކަމެއް ކަމަށެެވެ.
"އެ ގައުމެއްގެ ލޭ ހިނގަންޏާ ހަމަ ކުޅެންވީ،" މުތައިރީ ބުންޏެވެ.
މުތައިރީ ނޭޕާލްގެ ކޯޗުކަމާ ހަވާލުވެ، އިޓަލީގައި އުޅޭ ނޭޕާލް ކުޅުންތެރިއެއް އެ ޓީމަށް ގެންނަން މަސައްކަތް ކުރި އެެވެ. އެކަމަކު، އެ ފުރުސަތު ފަހި ނުވީ ދެ ޕާސްޕޯޓް ގެންގުޅޭ ކުޅުންތެރިންނަށް ގައުމު ތަމްސީލް ކުރުމުގެ ފުރުސަތު ނޭޕާލްގައި ނޯންނާތީ އެވެ.
މުތައިރީ ބުނީ އެ ފުރުސަތު އޮންނަ ނަމަ ނޭޕާލް ވެސް އެހެން ގައުމުތަކުގައި ތިބި ގިނަ ކުޅުންތެރިން ގެނެސްގެން ވަރުގަދަ ކުރެވޭނެ ކަމަށެެވެ.
ސަރަހައްދުގެ ހުރިހާ ގައުމީ ޓީމެއްގެ ހަބަރުތައް މީޑިއާތަކުން ބަލާކަމަށް މުތައިރީ ވަނީ ބުނެފަ އެވެ. އެހެންވެ، އޭނާ އަށް ނޭނގޭ ވާހަކައެއް ނުދައްކާ ކަމަށާއި އެ ގޮތުން ލަންކާގެ ކޯޗު އާމިރް އަލަގިޗަށް މަގާމުގައި ދެމި ނުހުރެވޭކަން އެނގުނީ ލަންކާ ފުޓްބޯޅަ ޓީމުގެ ސޯޝަލް މީޑިއާ އިން ކަމަށް ބުންޏެވެ.
ނޭޕާލް ދެން ކުޅޭ މެޗުގައި އަންނަ އާދިއްތަ ދުވަހުގެރޭ ކުޅޭނީ އިންޑިއާއާ އެވެ. ފަހު މެޗުގައި އަންނަަ ހަފްތާގައި ބަންގްލަދޭޝްއާ ބައްދަލުކުރާނެ އެވެ.
