އުރީދޫ ސާފް ޗެމްޕިއަންޝިޕްގައި މިރޭ ސްރީލަންކާ އަތުން 3-2 އިން މޮޅުވެ، ނޭޕާލް ތާވަލްގެ އެއް ވަނަ އަށް ޖެހިލައިފި އެވެ.
މި މުބާރާތުގައި ކުޅުނު ފުރަތަމަ މެޗުގައި ރާއްޖެ އަތުން ވެސް މޮޅުވި، ނޭޕާލް ވަނީ ދެ މެޗުން ހަ ޕޮއިންޓް ހަމަކޮށްފަ އެވެ. ތާވަލްގެ ދެ ވަނައިގައި އޮތީ ހަތަރު ޕޮއިންޓާ އެކު ބަންގްލަދޭޝެވެ. އިންޑިއާ އެއް ޕޮއިިންޓާ އެކު އޮތްއިރު، ސްރީ ލަންކާ އާއި ރާއްޖެ އަށް އަދި ޕޮއިންޓެއް ނުލިބެ އެވެ. ފަސް ގައުމުން ވާދަކުރާ މުބާރާތުގެ ފައިނަލަށް ދާނީ ލީގު ބުރުގެ އެއް ވަނަ އާއި ދެ ވަނަ ޓީމެވެ.
މި މެޗުގެ ނަތީޖާއާއެކު، ލަންކާ އަށް ވަނީ މުބާރާތުގެ ފައިނަލަށް ދިއުމުގެ އަމިއްލަ ބާރު ގެއްލިފަ އެވެ.
މުބާރާތުގައި ކުޅިުނު ފުރަތަމަ މެޗުގައި ބަންގްލަދޭޝް އަތުން ބަލިވެފައި އޮތުމާއެކު، މިރޭގެ މެޗުން މޮޅެއް ހޯދުމަށް ލަންކާ އަށް އޮތީ މުހިންމުވެފަ އެވެ. އެހެންކަމުން، ލަންކާ އިން މެޗު ފެށީ އެޓޭކަށް ވިސްނައި، ނޭޕާލަށް ވަރަށް ބޮޑަށް ޕްރެސްކޮށްގެނެވެ.
ލަންކާ އަށް މާ ނުރައްކާތެރި ހަމަލާއެއް ނުއުފެއްދެނީސް، ނޭޕާލުން ފުރަތަމަ ހާފުގައި ފޮނުވާލި ދެ ހަމަލާއެއް ލަންކާގެ ގޯލްކީޕަރު ސުޖަން ޕެރޭރާ ވަނީ ދިފާއުކޮށްފަ އެވެ. އެކަމަކު ސުޖަން އަށް ވެސް ނޭޕާލްގެ ހަމަލާތައް ހިފެހެއްޓުނީ މެޗުގެ 31 ވަނަ މިނިޓާ ހަމައަށެވެ.
ލަންކާގެ ޕެނަލްޓީ އޭރިޔާ ތެރެއިން ނޭޕާލްގެ ކުޅުންތެރިއެއް ފޮނުވާލި ބާރު ޝޮޓެއް ހުރަސް ދަނޑީގައި ޖެހިފައި ކުޑަ އޭރިޔާ ތެރެއަށް ފެނު ޖެހުނު ވަގުތު، ނޭޕާލްގެ ސުމަން ލާމާ ވަނީ އެ ބޯޅަ ގޯލުގެ ތެރެއަށް ވައްދާލައިފަ އެވެ.
ދެވަނަ ހާފުގެ ކުރީކޮޅު، ލަންކާގެ ޕެނަލްޓީ އޭރިޔާ ބޭރުން ނޭޕާލަށް ލިބުނު ހިލޭޖެހުމަކުން، އަންޖަން ބިސްޓާ ގޯލުގެ މަތީ ކަނާ ދިމާލަށް ފޮނުވާލި ބޯޅަ، ލަންކާގެ ގޯލްކީޕަރު ސުޖަން ޕެރޭރާ ވަނީ ދިފާއުކޮށްފަ އެވެ.
ނޭޕާލުން ލީޑު ފުޅާކުރީ މެޗުގެ 51 ވަނަ މިނިޓުގައި ނަވާޔުގް ޝްރެސްތާ ޖެހި ލަނޑުންނެވެ. ނޭޕާލްގެ ބިސްޓާ އޭރިޔާ ތެރެއިން ފޮނުވާލި ބޯޅަ ސުޖަން ދިފާއުކުރި ނަމަވެސް، އޭނާގެ އަތުގައި ޖެހިފައި ނިކުތް ބޯޅަ ނަވާޔުގް ވަނީ ގޯލުގެ ތެރެއަށް އަމާޒުކޮށްލައިފަ އެވެ.
ނޭޕާލުން ދެ ލަނޑު ލީޑެއް ނެގި ނަމަވެސް، ލަންކާ އިން ހިތްވަރު އެލުވައި ނުލައި، ކުރިއަށް ޖެހި ނޭޕާލްގެ ޑިފެންސް ފޫއަޅުވާލުމަށް މަސައްކަތްކުރި އެވެ. އެގޮތުން، 57 ވަނަ މިނިޓުގައި ލަންކާގެ ކަވިންދު އިޝާން ފޮނުވާލި ހަމަލާ ނޭޕާލްގެ ޑިފެންޑަރެއް ސަލާމަތްކުރީ ގޯލުގެ ރޮނގު މަތިންނެވެ.
ލަންކާ އިން އުންމީދުއާކުރީ 58 ވަނަ މިނިޓުގައި މާވިން ހެމިލްޓަން އޮމޯލޭ ޖެހި ލަނޑުންނެވެ. ނޭޕާލްގެ ޕެންލަޓީ އޭރިޔާ ބޭރުން އޮމޯލޭ ފޮނުވާލި ބާރު ޝޮޓް އަމާޒުވީ ގޯލުގެ މަތީ ކަނަށެވެ.
އެ ލަނޑާއެކު، ލަންކާ އިން ނޭޕާލްގެ ޑިފެންސަށް ބާރުބޮޑުކުރި އެވެ. ރަނގަޅު ހަމަލާތަކެއް ވެސް އުފެއްދި އެވެ. އެކަމަކު މުޅި ޓީމު ކަހަލަ ގޮތަކަށް ކުރިއަށް ޖެހި، ލަންކާ އިން ކުޅެމުންދިޔައިރު، ކައުންޓާ އެޓޭކްގައި ނޭޕާލް އިން ނުރައްކާކުރި އެވެ. ނޭޕާލްގެ ނުރައްކާތެރި ދެ ހަމަލާއެއް، ލަންކާގެ ކީޕަރު ސުޖަން ވަނީ ދިފާއުކޮށްފަ އެވެ.
ނޭޕާލުން ތަފާތު ބޮޑުކުރީ 87 ވަނަ މިނިޓުގައި އަޔޫޝް ގާލަން ކާމިޔާބުކުރި ލަނޑާއެކު އެވެ. އޭރިޔާ ތެރެއިން ލިބުނު ބޯޅަ އޭނާ ގޯލަށް އަމާޒުކޮށްލީ އޭރިޔާ ތެރޭގައި ހުސްކޮށްހުރެ އެވެ.
މެޗުގެ އިތުރު ވަގުތުގައި ލަންކާ އިން ފަރަގު ކުޑަކުރީ ލިބުނު ޕެނަލްޓީއަކުން ޑިލަން ސެނަން ޑިސިލްވާ ކާމިޔާބުކުރި ލަނޑާއެކު އެވެ. ލަންކާ އަށް ޕެނަލްޓީއެއް ލިބުނީ ނޭޕާލްގެ ޑިފެންޑަރު ގައުތަމް ޝްރެސްތާގެ އަތުގައި ބޯޅަ ޖެހުމުންނެވެ.
މި ލަނޑާއެކު، މެޗުގައި ބަކީ އޮތް ދެ މިނިޓުގައި ވެސް ލަންކާ އިން ނުރައްކާތެރި ހަމަލާއެއް އުފެއްދި ނަމަވެސް، ނޭޕާލުން ވަނީ އެ ޓީމުގެ ލީޑު ހިފަހައްޓައިފަ އެވެ.
