މިނިސްޓްރީ އޮފް ނެޝަނަލް ޕްލޭނިން، ހައުންސިން އެންޑް އިންފްރާސްޓްރަކްޗާގެ ސްޓޭޓް މިނިސްޓަރަކަށް އިއްޔެ އައްޔަން ކުރި އައްޑޫ ސިޓީގެ ކުރީގެ މޭޔަރު އަބްދުﷲ ސޯދިގު (ސޯބެ) މަސައްކަތްކުރައްވާނީ އައްޑޫގައި ގާއިމްވެ ހުންނަވައިގެން އެ ސިޓީގެ ޕްލޭނިންގެ މަސައްކަތްތައް ކަމަށް ސަރުކާރުން ބުނެފި އެވެ.
އެނގިފައިވާ ގޮތުގައި މިއީ މާލޭން ބޭރުގައި ގާއިމްވެ ހުރެގެން ސަރުކާރުގެ މި ފެންވަރުގެ އޮފިޝަލަކު މަސައްކަތްކުރައްވާނެ ފުރަތަމަ ފަހަރެވެ. އަދި މިއީ ވަކި އަތޮޅެއް ނުވަތަ ސަރަހައްދެއްގެ މަސައްކަތަށް ހާއްސަކޮށް ސްޓޭޓް މިނިސްޓަރަކު އައްޔަން ކުރެއްވި ފުރަތަމަ ފަހަރެވެ. މިނިސްޓަރުންނާއި ސްޓޭޓް މިނިސްޓަރުން އަދި މިނިސްޓަރުންގެ ނާއިބުން އާއްމު ހާލަތުގައި މަސައްކަތްކުރައްވަނީ މާލޭގަ އެވެ.
ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ ސަރުކާރުން ބޮޑެތި ޕްރޮޖެކްޓްތައް ހިންގާއިރު އެ ޕްރޮޖެކްޓެއް މެނޭޖްކުރަން އެ ސަރަހައްދެއްގައި ޔުނިޓެއް ގާއިމްކުރާ ކަމަށާއި ސޯބެގެ ޒިންމާއަކަށްވާނީ އައްޑޫގައި ގާއިމްކުރާ އެ ޔުނިޓް ހިންގެވުން ކަމަށެވެ.
"އަދަދު" އާ ވާހަކަ ދައްކަވަމުން ސޯބެ ވެސް ވިދާޅުވީ އޭނާ މަސައްކަތް ކުރައްވާނީ އައްޑޫގައި ސަރުކާރުން ހިންގާ ޕްރޮޖެކްޓުތަކުގައި ކަމަށެވެ.
"ކުޑަ ދުވަސްކޮޅަކު މާލޭގައި މަޑުކޮށްލާނަން. އެކަމަކު އެކޮޅުގައި [އައްޑޫގައި] ހުރެގެން މަސައްކަތް ކުރާ ގޮތަށް ހަމަޖެހިފައި އޮތީ،" ސޯބެ ވިދާޅުވި އެވެ.
މިނިސްޓްރީ އޮފް ޕްލޭނިންގެ އައްޑޫއަށް ހާއްސަ ބޭފުޅެއްގެ ގޮތުގައި ސޯބެ އައްޔަން ކުރުމުން ބައެއް ފަރާތްތަކުން އަންނަނީ މަރުހަބާ ކިޔަމުންނެވެ. އެގޮތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ސޯބެެއަށް މަރުހަބާ ދަންނަވައިފަ އެވެ.
"އަބްދުﷲ ސޯދިގަކީ ހިންގުންތެރި އަދި ގާބިލް ބޭފުޅެއް. އައްޑޫ ސިޓީގައި ސަރުކާރުގެ މަސައްކަތްތައް ބެލެހެއްޓުމަށް އެންމެ އެކަށީގެންވާ އެއް ބޭފުޅެއް،" ނަޝީދުގެ ކުރެއްވި ޓުވީޓެއްގައި ލިޔުއްވާފައިވެ އެވެ.
ސޯބެ ވަނީ އައްޑޫގެ މޭޔަރަކަށް ޖެހިޖެހިގެން ތިން ފަހަރު އިންތިހާބުވެފަ އެވެ. މިފަހަރު ވެސް މޭޔަރުގެ މަގާމަށް ވާދަ ކުރެއްވުމަށް އޭނާ މަސައްކަތް ކުރެއްވި އެވެ. ނަމަވެސް އެ ސިޓީގެ މިހާރުގެ މޭޔަރު އަދި ރައްޔިތުންގެ މަޖިލީހުގެ ކުރީގެ މެމްބަރު އަލީ ނިޒާރާ ވާދަ ކުރައްވައި އެމްޑީޕީގެ ޕްރައިމަރީއިން ނާކާމިޔާބުވީ އެވެ.
