އުއްތަމަ ފަނޑިޔާރާއި އެމަނިކުފާނުގެ އާއިލާއަށް ސެކިއުރިޓީ ދިނުމުގައި ފަރުވާތެރިވުމަށް އިދިކޮޅު ޕްރޮގްރެސިވް ކޯލިޝަނުން ގޮވާލައިފި އެވެ.
ޕީޕީއެމް އާއި ޕީއެންސީ ހިމެނޭ ކޯލިޝަނުން ނެރުނު ބަޔާނެއްގައި ވަނީ މިދިޔަ ބުރާސްފަތި ދުވަހު އުއްތަމަ ފަނޑިޔާރު އަހްމަދު މުއުތަސިމް އަދްނާން ދިރިއުޅުއްވާ ގެކޮޅުގެ ސެކިޔުރިޓީ ކެމެރާތައް ހަލާކުކޮށް އެ ގެއަށް މީހަކު ވަންނަން އުޅުނު މައްސަލަ ކުށްވެރިކޮށްފަ އެވެ.
އެ ބަޔާނުގައި ބުނެފައިވަނީ ދައުލަތުގެ ތިން ބާރުން އެބާރު ދިރިއުޅުއްވާ ގެކޮޅުގެ ސެކިޔުރިޓީ ފޫއަޅުވާލާ އެގެއަށް ވަނުމުގެ ފުރުސަތު އެއްވެސް މީހަކަށް ލިބިގެން ދިޔުމަކީ އެ ކޯލިޝަނުން އިންތިހާއަށް ކަނބޮޑުވާ ކަމެއް ކަމަށެވެ. އަދި އެފަދަ ފުރުސަތެއް އެއްވެސް މީހަކަށް ލިބިގެން ގޮސްފައިވާނީ އެމަނިކުފާނަށް ދައުލަތުން ދެމުން ގެންދާ ސަލާމަތާއި ރައްކާތެރި ކަމުގައި އިހުމާލުވެފައި ވާތީ ކަމަށެވެ.
އިދިކޮޅުން ބުނަނީ މި ހާދިސާ ހިނގަން މެދުވެރިވީ އުއްތަމަ ފަނޑިޔާރުގެ ރައްކާތެރިކަން ކަށވަރުކުރުމުގައި ސަރުކާރުން ދޭންޖެހޭ ސަމާލުކަން ނުދެވި ފަރުވާ ކުޑަ ކުރުމުގެ ސަބަބުނެވެ.
ދައުލަތުގެ 3 ބާރުގެ ތެރެއިން އަދުލު އިންސާފު ގާއިމު ކުރުމުގެ ބާރު ކަމުގައިވާ ދައުލަތުގެ އުއްތަމަ ފަނޑިޔާރާއި އެމަނިކުފާނުގެ އާއިލާއަސް ދޭންޖެހޭ ސަލާމަތާއި ރައްކާތެރިކަމުގައި ފަރުވާ ކުޑަ ނުކުރުމަށާއި، އެމަނިކުފާނުގެ ސަލާމަތާއި ރައްކާތެރިކަމަށް އެޅިފައިވާ ފިޔަވަޅުތައް ހަރުދަނާކޮށް ކަށަވަރުކޮށް ވަރުގަދަ ކުރުމަށް ގޮވާލަން.
އުއްތަމަ ފަނޑިޔާރުގެ ގެކޮޅަށް މީހަކު ވަންނަން މަސައްކަތް ކުރި ކުރުން ވެރިކަން ކުރާ މައި ޕާޓީ، އެމްޑީޕީއިންވެސް ވަނީ ކުށްވެރިކޮށްފަ އެވެ.
އެމަނިކުފާނުގެ ގެކޮޅަށް ގެއްލުންދީ، އެ ގެއަށް މީހަކު ވަން ކަމަށް އެމްޑީޕީން ބުނި ނަމަވެސް ފުލުހުން އެކަން ކަށަވަރެއްނުކޮށްދެ އެވެ. ފުލުހުންގެ ބުނީ އެ އިދާރާއަށް ހުށަހަޅާފައި އޮތީ މުއުތަސިމްގެ ގެކޮޅުގައި ހަރުކޮށްފައި ހުރި ސެކިއުރިޓީ ކެމެރާއެއް އޭގެ އަމާޒުން އަނބުރާފައިވާ މައްސަަލައެއް ކަމަށެވެ.
މުއުތަސިމްގެ ގެކޮޅަށް މީހަކު ވަންނަން އުޅުނު ކަމަށް ބެލެވޭ ހާދިސާއެއް ހިނގާފައި މި ވަނީ މިދިޔަ މެއި 6، ގައި ޓެރަރިސްޓު ޖަމާއަތް އައިސިސްއާ ގުޅުން އޮންނަ ބަޔަކު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ބާރުގަދަ ބޮމެއް ގޮއްވާލައި، އެމަނިކުފާނާއެކު އިތުރު ހަތަރު މީހަކު ޒަހަމްކޮށްލާފައި އޮއްވަ އެވެ.
ނަޝީދަށް ދިން ހަމަލާއާއެކު ދައުލަތުގެ ތިން ބާރުގެ ވެރިންގެ ސަލާމަތީ ކަންކަން ވަރުގަދަ ކުރުމަށް އަންނަނީ މަސައްކަތް ކުރަމުންނެވެ. އެގޮތުން އުއްތަމަ ފަނޑިޔާރާއި މަޖިލީހުގެ ރައީސަށް ހާއްސަ ދެ ގެކޮޅު އެޅުމުގެ މަސައްކަތް މިހާރު ދަނީ ކުރަމުންނެވެ.
