ހޯމަ ދުވަހު އުވާލަން ނިންމި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ތާރީހު އޮތީ މަރުތަކާއި ވައްކަންތަކުގެ ތުހުމަތުތަކުން ތަތްތެޅިފައި ކަމަށް މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސެއިން ވިދާޅުވެއްޖެ އެވެ.
ޕީޕީއެމް އާއެކު ކޯލިޝަނުގައި އޮތް ވެރިކަންކުރާ ޕީއެންސީއަށް ނިސްބަތްވާ މުސްތަފާ އެހެން ވިދާޅުވީ ކުރިމަގު އޮތީ ޕީއެންސީއާއެކު ކަން ފާހަގަކުރައްވާ ސޯޝަލް މީޑިއާގައި ކުރެއްވި ޕޯސްޓެއްގަ އެވެ.
އެގޮތުން، މަރުތަކާއި ވައްކަންތަކުގެ ތުހުމަތު ޕީޕީއެމް އަށް އަމާޒުކޮށް، އެ ޕާޓީގެ ތާރީހު އެ ތުހުމަތުތަކުން ތަތްތެޅުވަން އެންމެ ބޮޑަށް މަސައްކަތްކުރީ އިދިކޮޅު އެމްޑީޕީން ކަމަށާއި އެ ތުހުމަތުތައް ގިނަ ރައްޔިތުން ގަބޫލު ކުރާ ކަމަށް ވެސް އޭނާ ލިޔުއްވާފައިވެ އެވެ.
ޕީޕީއެމް އުވާލައި ރައީސް މުއިއްޒުގެ ލީޑަޝިޕުގެ ދަށުން ޕީއެންސީން މި ފެށީ އާ ދަތުރެއް ކަމަށާއި ކުރިމަގު އޮތީ ޕީއެންސީ އާއެކު ކަމަށް ވެސް މަޖިލީހުގެ ފުރަތަމަ ދައުރު އަދާކުރައްވަމުން ގެންދަވާ މުސްތަފާ ވިދާޅުވެފައިވެ އެވެ.
ޕީޕީއެމްއާ ގުޅުވައ ކުރަނީ ސީދާ ކޮން ތުހުމަތުތަކެއްކަން މުސްތަފާގެ ޕޯސްޓުގައި ފާހަގަކޮށްފައެއް ނުވެ އެވެ. ނަމަވެސް އެ ޕާޓީން 2013 އިން 2018 އަށް ކުރި ވެރިކަމުގައި ހިޔާނާތާއި ވައްކަމުގެ ގިނަ މައްސަލަތަކެއް ފެންމަތިވި އެވެ.
އެގޮތުން، އެމްއެމްޕީއާރުސީގެ ހިޔާނާތުގެ މައްސަލާގައި އެ ދައުރުގައި ވެރިކަންކުރެއްވި ޕީޕީއެމް ކޯލިޝަނުގެ ކުރީގެ ލީޑަރު އަބްދުﷲ ޔާމީނު އަށް ދައުވާކޮށް ދެ ފަހަރެއްގެ މަތިން ހުކުމް ސާބިތު ވެސް ވި އެވެ. ނަމަވެސް މަތީ ކޯޓުތަކުން އެ ހުކުމްތައް ބާތިލް ކުރީ އެވެ.
އެ ހިޔާނާތުގެ ފައިސާ ލިބުނު މީހުންގެ ލިސްޓެއް 19 ވަނަ ރައްޔިތުންގެ މަޖިލީހުން އާންމުކުރިއިރު އެ ލިސްޓުގައި ޕީޕީއެމް އަދި ޕީއެންސީގެ ގިނަ އިސްވެރިން އޮތެވެ. އޭގެ ތެރެއިން ގިނަ ބޭފުޅުން މިހާރު ތިއްބެވީ މި ސަރުކާރުގެ އިސް މަގާމުތަކުގަ އެވެ.
