ދުނިޔޭގެ ފުޓްބޯޅައިގައި މަހަކު އެއް ފަހަރު ފީފާއިން އާންމުކުރާ ކޮކާ ކޯލާ ރޭންކިން އަކީ ދޮގެއް ކަމަށް އުރީދޫ ސާފް ޗެމްޕިއަންޝިޕްގައި ވާދަކުރާ ނޭޕާލްގެ ކޯޗު އަބްދުﷲ އަލްމުތައިރީ ބުނެފި އެވެ.
މާދަމާރޭ ސްރީ ލަންކާއާ ދެކޮޅަށް ކުޅޭ މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި ނޭޕާލްގެ ކޯޗު މުތައިރީ ބުނީ ފީފާ ރޭންކިން އާއި ހަގީގަތުގައި ކަން ހިނގާ ގޮތާ ދިމާނުވާ މައްސަލަ ހާއްސަ ނަޒަރަކުން ބެލުން މުހިއްމު ކަމަށެވެ.
"ފީފާ ރޭންކިން އަކީ ދޮގެއް. ސަބަބަކީ ޕާކިސްތާން އަށް ސަސްޕެންޝަން އައުމުގެ ކުރިން. އެ މީހުން އޮތީ 202 ވަނައިގައި. ސަސްޕެންޑްވި ފަހުން އެ މީހުން މި އެރީ 198 ވަނަ އަށް. އެ މީހުން އެއްވެސް މެޗެއް ނުކުޅޭ. އެހެން ޓީމުތަކުން މެޗު އެބަ ކުޅޭ. އެހެން ޓީމުތައް ޕޮއިންޓް ގެއްލުނަސް ޕާކިސްތާން މި އޮންނަނީ ހަމަ،" މުތައިރީ ބުންޏެވެ.
ނޭޕާލް އޮތީ އެންމެ ފަހުން ނެރުނު ރޭންކިންގައި ދުނިޔޭގެ 168 ވަނައިގަ އެވެ.
މުބާރާތުގައި ކުޅުނު މެޗުން ނޭޕާލް ވަނީ 1-0 އިން އެންމެ ފަހުގެ ޗެމްޕިއަން ރާއްޖެ ބަލިކޮށްފަ އެވެ. ލަންކާ ކުޅުނު ފުރަތަމަ މެޗުން ބަންގްލަދޭޝް އަތުން ވަނީ 1-0 އިން ބަލިވެފަ އެވެ.
ފީފާ ރޭންކިން އަށް ބަލާއިރު ލަންކާ އޮތީ ދުނިޔޭގެ 205 ވަނައިގަ އެވެ. އެކަަމަކު، އެ އަށް ބަލައިގެން މާދަމާ މެޗަށް ވިސްނައިފިނަމަ ނޭޕާލަށް ގެއްލުން ބޮޑު ކަމަށް މުތައިރީ ވަނީ ފާހަގަކޮށްފަ އެވެ.
މުތައިރީ ބުނީ ސްރީލަންކާ ފުޓްބޯޅަ ފެޑެރޭޝަނުން އެ ވަނީ މި މުބާރާތަށް ފަހު ކޯޗު ބަދަލުކުރާނެކަން އިއުލާނުކޮށްފައި ކަމަށެވެ. އަދި އެހެންވުމާ އެކު އެ މީހުންނަށް ގެއްލޭނެ އެއްޗެއް ނެތް ކަމަށާއި އެ ޕްރެޝަރު އޮތީ ނޭޕާލަށް ކަމަަށް މުތައިރީ ވަނީ ބުނެފަ އެވެ.
"ސްރީ ލަންކާ މި އޮތީ 205 ވަނައިގައި (ނޭޕާލް)ގެ ވަރަށް ގިނަ ސަޕޯޓަރުން އަހަންނަށް މެސެޖް އެބަކުރޭ 5-0 އިން މޮޅުވާން ނޫނީ 6-0 އިން މޮޅުވާން. އެއީ ފަސޭހަ ކަމެއް ނޫން. މާދަމާ އަހަރެން 1-0 އިން މޮޅު ވިޔަސް އަހަރެން ހުންނާނީ ވަރަށް އުފަލުން. ހަމައެކަނި ތިން ޕޮއިންޓް ޓާގެޓަކީ. އެހެން ނަތީޖާއެއް މުހިއްމެއް ނޫން. ފުރަަތަމަ މިނިޓްގައި ލަނޑެއް ޖެހުނަސް އަހަރެން ބުނާނަން ހުރިހާ ކުޅުންތެރިން ފަހަތަށް ފައިބަން،" މުތައިރީ ބުންޏެވެ.
"އަހަރެމެން ބުރަ މަސައްކަތުން ފުރަތަމަ މެޗުން މޮޅުވެފައި މާދަމާ މޮޅެއް ނުލިބިއްޖިއްޔާ ރާއްޖެ މެޗުގައި ކުރި މަސައްކަތުގެ އެއްވެސް މާނައެއް ނެތް،"
ރާއްޖެ މެޗަށް ނުކުތް ނޭޕާލްގެ ފުރަތަމަ އެގާރަ ކުޅުންތެރިން.-- ފޮޓޯ: ހުސެއިން ވަހީދު/ އަދަދު
ފުރަތަމަ މެޗުގައި ނޭޕާލުން ރާއްޖޭގެ މައްޗަށް ހޯދީ ތާރީހީ މޮޅެކެވެ. މިއީ ސާފް ޗެމްޕިއަންޝިޕެއްގައި ނޭޕާލަށް ރާއްޖެ އަތުން ލިބުނު ފުރަތަމަ މޮޅެވެ. އެ މެޗުގެ ކުރިން ސާފް ޗެމްޕިއަންޝިޕްގައި ނޭޕާލުން ރާއްޖެއާ ދެކޮޅަށް ނުކުތް ހަތް ފަހަރު ވެސް މޮޅެއް ނުލިބެ އެވެ.
"ލަންކާ މެޗަށް ނުކުންނައިރު އަހަރެމެން ރާއްޖެ މެޗުގެ އުފަލުގައި ތިބެފިނަމަ މާދަމާ އަހަރެމެން ވަރަށް ގަދަޔަށް ރޯން ޖެހިދާނެ. އެ މެޗުން (ރާއްޖެ މެޗުން) މޮޅުވުމުން އުފާވިޔަސް މި ވަގުތު އެކަމެއް ހަނދާން ނުކުރާނަން،" މުތައިރީ ބުންޏެވެ.
ލަންކާ އަކީ އެންމެ ފިޒިކަލް ފުޓްބޯޅަ ކުޅޭ ޓީމު، ސަމާލުވާން ޖެހޭނެ
މުބާރާތުގައި މިހާތަނަށް ކުޅުން ފެނުނު ހަތަރު ޓީމަށް ބަލާއިރު، އެންމެ ފިޒިކަލް ފުޓްބޯޅައެއް ކުޅެނީ ލަންކާ އެވެ. ލަންކާ ފުރަތަމަ މެޗު ނިންމާލީ ކުޅުންތެރިއަކު މަދުކޮށެވެ. އެ ޓީމުގެ ޑަކްސަން ޕުސްލަސް އަށް ވަނީ އެ މެޗުަގައި ރަތް ކާޑެއް ދައްކައިފަ އެވެ.
މުތައީރީ ބުނީ ނޭޕާލުން ވިސްނާނީ ލަންކާގެ ކުޅުންތެރިއަކު މަދުކޮށްގެން މެޗުން މޮޅުވުމަށް ކަމަށެވެ. ލަންކާގެ ކުޅުންތެރިއަކު މަދުކުރަން މަސައްކަތް ކުރާނީ އެ ޓީމަކީ ކޮންމެ ބޯޅައަކަށް ވެސް ޓެކަލްކުރާ އެކަމަށް ވަރަށް ފޯރި ހުންނަ ބައެއް ކަން ފުރަތަމަ މެޗުން އެނގިފައިވާތީ ކަމަށް މުތައިރީ ބުންޏެވެ. .
"އަހަންނަށް އެނގޭ އެ މީހުންނަކީ ވަރަށް ވަރުގަދަ އަށް ޓެކަލް ކުރާ ޓީމެއް ކަން. އަހަރެމެންގެ ޓާގެޓެއް އެއީ އެ މީހުންގެ އެއް ކުޅުންތެރިއަކު ފުރަތަމަ ހާފުގައި ބާލާފައި އަހަރެމެންނަށް ފަސޭހަކޮށްގެން މޮޅުވަން. އެ މީހުންނަކީ ވަރަށް ޓެކަލް ކުރާ ބައެއް. އެ އެޑްވާންޓޭޖްގެ ބޭނުން ހިފާނަން،"
ލަންކާގެ ކޯޗު ބޮސްނިއާގެ އާމިރް އަލަގިޗް ވަނީ ރާއްޖެއާ ދެކޮޅަށް ކުޅުނު މެޗުގައި ނޭޕާލްގެ ރޭވުންތެރިކަމަށް ތައުރީފުކޮށް ވާހަކަ ދައްކައިފަ އެވެ. އަދި ނޭޕާލުން ޓެކްޓިކަލް ޑިސިޕްލިން ހިފަހައްޓައިގެން ދައްކާ ރަނގަޅު ކުޅުމުގެ އަސްލަކީ އެ ޓީމުން ރާއްޖެ ބަލިކުރުން ކަމަށް އަލަގިޗް ބުނެފައިވެ އެވެ.
އަލަގިޗް ކުރި ތައުރީފަށް މުތައީރީ ވަނީ ޝުކުރު އަދާކޮށްފަ އެވެ. އެކަމަކު، މާ ބޮޑަށް ނޭޕާލްގެ ރަނގަޅު ވާހަކަ ދެއްކުމުގެ ފަހަތުގައި ލަންކާ ކޯޗު އަލަގިޗްގެ ހާއްސަ ބޭނުމެއް އޮވެދާނެ ކަމަށް މުތައިރީ ވަނީ ބުނެފަ އެވެ.
"ފަހަރެއްގައި އެއީ އަހަރެެމެން މެޗަށް ގެނެސް ސަޕްރައިޒެއް ދޭން ދެއްކި ވާހަކައެއް ކަމަށް ވެދާނެ. އަހަރެމެން ޖެހޭނެ އެ މީހުން އެ ދައްކާ ވާހަކަ އަށް ނުހެއްލި ތިބެން. އަހަރެމެން ފޯކަސް ކުރަން ޖެހޭނީ ވަރަށް އުނދަގޫ މެޗެއް ކުޅެން ޖެހޭ ކަމަށް،" މުތައިރީ ބުންޏެވެ.
އެންމެ ފަހުން ސާފް ޗެމްޕިއަންޝިޕެއްގައި ނޭޕާލާއި ލަންކާ ވާދަކުރީ 2015 ވަަނަ އަހަރު ޓްރިވެންޑްރަމްގައި ބޭއްވި މުބާރާތުގަ އެވެ. އެ ފަހަރު އިތުރު ވަގުތުގެ ފަސް ވަނަ މިނިޓްގައި ލަންކާ ވަނީ ގޯލެއް ޖަހައި 1-0 އިން ނޭޕާލް ބަލިކޮށްފަ އެވެ.
ލަންކާ އާއި ނޭޕާލް މާދަމާރޭ ކުޅޭ މެޗު ފަށާނީ 9 ޖަހާއިރު އެވެ.
