ތޫނު އެއްޗަކުން ބިރު ދައްކައިގެން ނުވަ ލައްކައަށް ވުރެ ގިނަ ރުފިޔާ ފޭރުނުކަމުގެ ތުހުމަތުގައި ހައްޔަރު ކުރި މީހާގެ ބަންދުގެ މުއްދަތު އިތުރުކޮށްދީފި އެވެ.
ހޭންވޭރު ދަނޑުކައިރީގައި ހިންގި މި ޖަރީމާގައި ގިނަ ބަޔަކު ބައިވެރިވި ކަމަށްވެ އެވެ. އެ ކަމުގައި ބައިވެރިވި ކަމަށް ބެލެވޭ މީހުންގެ ވަނަވަރު ފުލުހުން ހާމަކޮށްފައި ނުވި ނަމަވެސް ކުރިމިނަލް ކޯޓުން ވަނީ އެ މައްސަލައިގެ ތުހުމަތުގައި ހައްޔަރު ކުރެވުނު ގ. ހިޔަރޯދި، ޝަމްއާން ސަލީމް (27އ) ގެ ބަންދުގެ މުއްދަތު އިތުރުކޮށްދީފަ އެވެ.
ތޫނު އެއްޗެއް ބޭނުންކޮށްގެން ބިރު ދައްކައި އެތައް ފައިސާއެއް ފޭރުމުގެ ތުހުމަތު ޝަމްއާންއަށް ކުރެވޭއިރު، އޭނާ ބަންދުކޮށްފައި ވަނީ 10 ދުވަހަށެވެ. އެއީ ހެއްކަށް ނުފޫޒުފޯރުވުމުގެ އިތުރުން އޭނާއަކީ މުޖުތަމައުއަށް ނުރައްކާތެރި މީހެއް ކަމަށް ޝަރީއަތަށް ފެންނާތީ ކަމަށް ކޯޓު އަމުރުގައި ބުނެފައި އޮވެ އެވެ.
ވައްކަމާއި ފޭރުގެ ތަފާސްހިސާބުތައް - ފުލުހުންނަށް ހުށަހެޅިފައިވާ މިންވަރު
2010 - 547 މައްސަލަ
2011 - 721 މައްސަލަ
2012 - 974 މައްސަލަ
2013 - 729 މައްސަލަ
2014 - 618 މައްސަލަ
2015 - 546 މައްސަލަ
2016 - 716 މައްސަލަ
2017 - 660 މައްސަލަ
2018 - 534 މައްސަލަ
2019 - 481 މައްސަލަ
2020 - 348 މައްސަލަ
2021 ސެޕްޓެމްބަރު މަހާއި ހަމައަށް: 246 މައްސަލަ
