ރާއްޖޭގެ ގިނަ ބައެއްގެ ލޯބި ހޯދާފައިވާ ފިޒީ ޑްރިންކް، ސްޕްރައިޓްގެ ފުޅި ބަދަލުކޮށްފި އެވެ.
ޒަމާނުއްސެއްރެ ސްޕްރައިޓް މަޝްހޫރުވެފައި ވަނީ ފެހި ކުލައިގެ ފުޅިއެއްގެ ގޮތުގަ އެވެ. ނަމަވެސް ސްޕްރައިޓްގެ ފުޅި މިހާރު މިވަނީ ފެހި ކުލައިން އެތެރެ ފެންނަ ސާފު ފުޅިތަކަށް ބަދަލުކޮށްފަ އެވެ.
ސެޕްޓެމްބަރު 19 ވަނަ ދުވަހު ރަސްމީކޮށް ސްޕްރައިޓް ފުޅިތައް ފެހި ކުލައިން އެތެރެ ފެންނަ ސާފު ފުޅިތަކަށް ބަދަލުކޮށްފައިވާ އިރު، މިއީ "ވާލްޑް ވިތައުޓު ވޭސްޓް"ގެ ނަމުގައި ދެމެހެއްޓެނިވި ޕެކޭޖިން އަށް ބަދަލުކުރުމަށް 2018 ވަނަ އަހަރު ކޮކާކޯލާ އިން ފެށި ހާއްސަ މަޝްރޫއުގެ ދަށުން ގެނެވުނު ބަދަލެކެވެ.
މި މަޝްރޫއަކީ، 2030 އަންނަންވާއިރަށް، ކޮކާކޯލާ އިން ވިއްކާ ކޮންމެ ފުޅިއެއް އަދި ދަޅެއް ބޭނުންކުރުމަށް ފަހު އެއްކޮށް ރީސައިކަލް ކުރުމުގެ އަޒުމްގައި ހިންގޭ މަޝްރޫއެކެވެ.
ސްޕްރައިޓުގެ ސާފު ފުޅީގެ 300އެމްއެލް، 500އެމްއެލް، 1.25 ލީޓަރު އަދި 2 ލީޓަރުގެ ފުޅި ރާއްޖޭގެ އެކި ކަންކޮޅުތަކުގެ ސުޕަމާކެޓުތަކާއި ރީޓެއިލް ފިހާރަތަކުން މިހާރު ލިބޭނެ އެވެ.
ސްޕްރައިޓް ފުޅިތަކުގެ އާ ޕެކޭޖިންނާ ގުޅޭގޮތުން މާލޭ އެރޭޓެޑް ވޯޓާ ކޮމްޕެނީގެ މެނޭޖިން ޑިރެކްޓަރު ސަންޖޭ މަނިކު ވަނީ މިއީ ފަސޭހައިން ފުޅި ރީސްކައިލްކޮށް އަދި ތަފާތު އެއްޗެއްސަށް ބަދަލުކުރެވޭނެކަން އެނގިތިބެ، ދިވެހިންނަށް އެންމެ ކަމުދާ ސްޕާކްލިން ލެމަން-ލައިމް ބުއިމުގެ މީރު ރަހައަށް އެއްވެސް ބަދަލެއް ނުގެނަސް ގެނައި ބަދަލެއް ކަމަށެވެ.
އަދި މިއީ ދެމެހެއްޓެނި ތިމާވެށީގެ ކަންކަމަށް އެއްބާރުލުން ދީ ވިޔަފާރި ފުޅާކުރަން ކުރެވޭ މަސައްކަތްތަކުގެ ބައެއްކަމަށްވެސް އޭނާ ވިދާޅުވި އެވެ.
މިކަމާ ކުޅޭގޮތުން ކޮކާކޯލާ ރާއްޖޭގެ މެނޭޖިން ޑިރެކްޓަރު، ޕަންކަޖު ސިންހަ ވަނީ ކޮކާކޯލާ ކުންފުނިން އަބަދުވެސް މަސައްކަތްކުރަނީ ދެމެހެއްޓެނިވި އަދި އެންމެންނަށް ފައިދާކުރާ ކުރިމަގެއް ބިނާކުރުމަށް ކަމަށާއި އާންމުނަށާއި މުޖުތަމައުއަށް އަދި ދުނިޔެއަށް ރަނގަޅު ބަދަލުތަކެއް ގެނެސްދިނުމަކީ ކުންފުނީގެ ތަސައްވަރު ކަމަށެވެ.
ފެހި ފުޅިން ސާފު ފުޅި އަށް ބަދަލުކުރުމުން، ރީސައިކަލް ކުރަން ބޭނުންކުރެވޭ ނިޒާމުތައް މިހާރަށް ވުރެ ހަލުއިކުރެވޭނެ ކަމަށް ޕަންކަޖު ވިދާޅުވި އެވެ. އަދި މިއީ، ބޭނުންކުރުމަށް ފަހު އުކާލާ ޕެޓް ފުޅިއާ ގުޅޭ ގޮތުން އަމަލުކުރެވޭ ގޮތް ވަށާޖެހޭ އިގްތިސާދީ ސިޔާސަތެއްގެ މަތިން ބިނާކުރުން ހަލުއިކުރުމަށް ވަރަށް މުހިންމު ކަމެއް ކަމަށް އެނޭ ފާހަގަކުރި އެވެ.
ސްޕްރައިޓް ތައާރަފުކޮށްފައި ވަނީ 1960 ވަނަ އަހަރު އެވެ. އޭރުއްސުރެ ފެހި ކުލައިގައި މަޝްހޫރުވެފައިވާ ފުޅި ބަދަލުކުރުމަކީ ދެމެހެއްޓެނިވި ގޮތެއްގައި ބްރޭންޑު ކުރިއަރުވަން ކުންފުނިން ނެގި ވަރަށް ބޮޮޑު ފިޔަވަޅެކެވެ.
ސާފު ސްޕްރައިޓް ފުޅިއަކީ 100 އިންސައްތަ ރީސައިކަލް ކުރެވޭ ފުޅިއެކެވެ. މީގެ ސަބަބުން، ބޭނުންކުރުމަށް ފަހު އުކާލާ ފުޅީގެ ވެލިއު އިތުރުކުރެވޭނެ އެވެ. އަދި ތަފާތު އެހެނިހެން ބޭނުންތަކަށް އެ ފުޅި ބޭނުންކުރެވޭނެ ފުރުސަތު ފަހިވެގެންދާ އިރު، ބޭނުންކޮށް ނިންމާފައި ހުންނަ ފުޅި އެއްކޮށް، ރީސައިކަލްކޮށް އަދި އަލުން ބޭނުންކުރުން އިތުރުވުމުގެ ފުރުސަތު ބޮޑުވާނެ އެވެ.
މީގެ ސަބަބުން ރާއްޖޭގައި ޕްލާސްޓިކް ކުންޏާ ގުޅޭ ގޮތުން އަމަލުކުރެވޭ ގޮތް ވަށާޖެހޭ އިގްތިސާދީ ސިޔާސަތެއްގެ މަތިން ބިނާކުރެވިގެންދާނެ އެވެ.
