ކޮވިޑް-19 އާއި ގުޅިގެން ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން 868.5 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީން ހާމަކޮށްފި އެވެ.
ކޮވިޑް-19 އާއި ގުޅިގެން ސަރުކާރުން މިހާތަނަށް ކޮށްފައިވާ ހަރަދުތަކުގެ ތެރެއިން އެންމެ ބޮޑު ހަރަދުކޮށްފައި ވަނީ އެންޑީއެމްއޭ މެދުވެރިކޮށެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ސެޕްޓެމްބަރު 23 ގެ ނިޔަލަށް އެންޑީއެމްއޭ އިން ކޮށްފައިވާ ހަރަދުތަކުގެ ތެރެއިން އެންމެ ބޮޑު ހަރަދެއް ކޮށްފައި ވަނީ ކޮވިޑާ ގުޅިގެން ހިދުމަތް ފޯރުކޮށްދިނުމަށް ބޭނުންވާ ސަޕްލައިސް އަދި ރިކުއިސިޓްސް އަށެވެ.
އެއީ 363.6 މިލިއަން ރުފިޔާ އެވެ.
އެންޑީއެމްއޭ އިން ވަނީ ކެޕިޓަލް އިކުއިޕްމެންޓަށް 112.5 މިލިއަން ރުފިޔާ އަދި ހިދުމަތްތައް ފޯރުކޮށްދިނުމަށް 114.6 މިލިއަން ރުފިޔާ ހަރަދުކޮށްފަ އެވެ.
ކޮވިޑާ ގުޅިގެން އެންޑީއެމްއޭ އިން ކުރި ހަރަދުގެ ތެރޭގައި ޑިޒާސްޓާ މެނޭޖްމެންޓް ފަންޑުން ހަރަދު ކުރި 84.1 މިލިއަން ރުފިޔާވެސް ހިމެނެ އެވެ.
މީގެ އިތުރުން މުވައްޒަފުންނަށް އެލަވަންސް ދިނުމަށް 36 މިލިއަން ރުފިޔާ ހަރަދުކޮށްފައިވާ އިރު، ދަތުރުފަތު ކުރުމުގެ ހަރަދުގެ ގޮތުގައި 39.8 މިލިއަން ރުފިޔާ ވަނީ ހޭދަކޮށްފަ އެވެ.
ސެޕްޓެމްބަރު 23 ގެ ނިޔަލަށް ކޮވިޑް-19 އަށް ކުރި ހަރަދުގެ ޖުމުލަ ވަނީ 3.9 ބިލިއަނަށް އަރާފަ އެވެ. އޭގެ ތެރޭގައި ސިއްހީ އަދި އިޖުތިމާއީ އެކި ކަންކަމަށް ކުރި 2.1 ބިލިއަން ރުފިޔާ އާއި އިކޮނޮމިކް ރެސްޕޮންސްގެ ގޮތުގައި ހަރަދުކުރި 1.8 ބިލިއަން ރުފިޔާ ހިމެނެ އެވެ.
