ތެހްރާން، އިރާން (އޮކްޓޯބަރު 1) - އިޒްރޭލުގެ ފޮރިން މިނިސްޓަރަށް ބަހްރެއިނަށް ވަޑައިގެން ޔަހޫދީ ދައުލަތުގެ އެމްބަސީއެއް އެ ގައުމުގައި ހުޅުވުމަކީ "ލަދުވެތިި" ކަމެއްގެ ގޮތުގައި އިރާނުން ސިފަކޮށްފި އެވެ.
އިރާނާއި އިޒްރޭލަކީ ދެ ހަތުރުންނަށް ވާއިރު، ބަހްރެއިން އަކީ ފާއިތުވި އަހަރެއްހާ ދުވަސް ތެރޭގައި އިޒްރޭލާއެކު ޑިޕްލޮމެޓިކް ގުޅުން ގާއިމްކުރި ހަތަރު އަރަބި ގައުމުގެ ތެރެއިން އެއް ގައުމެވެ.
ސުންނީ މުސްލިމުން ވެރިކަން ކުރާ ބަހްރެއިނުގެ ޝިއައީ މުސްލިމުންގެ ތެރެއިން ދޭތެރެ ދޭތެރެއިން ހަމަނުޖެހުން އުފެދެ އެވެ. ބަހްރެއިނުން ތުހުމަތު ކުރަނީ އެ ހަމަނުޖެހުންތަކުގެ ފަހަތުގައި ވަނީ އިރާނު ކަމަށެވެ. ނަމަވެސް ޝިއައީންގެ ވެރިކަމެއް އޮންނަ އިރާނުން އެ ތުހުމަތު ދޮގުކުރެ އެވެ.
"ގުދުސް ހިފައިގެން އުޅޭ އަނިޔާވެރި ދައުލަތަށް ބަހްރެއިނުގެ ލީޑަރުން މަރުހަބާ ކިޔުމަކީ ލަދުވެތިކަމެއް،" އިރާނު ފޮރިން މިނިސްޓްރީގެ ތަރުޖަމާނު ސައީދު ހާތިބްޒާދޭ ނެރުނު ބަޔާނެއްގައި ވިދާޅުވި އެވެ.
އިޒްރޭލުގެ ފޮރިން މިނިސްޓަރު ޔެއާ ލަޕިދް ބަހްރެއިނަށް ވަޑައިގެން އެމްބަސީ ހުޅުއްވައިދެއްވީ ބުރާސްފަތި ދުވަހު އެވެ. އިޒްރޭލާއި ބަހްރެއިނުން ގުޅުން ގާއިމް ކުރީ މީގެ އަހަރެއް ކުރިންނެވެ.
ލަޕިދްގެ މި ދަތުރަކީ ޔަހޫދީ ދައުލަތުގެ ފޮރިން މިނިސްޓަރަކު ބަހްރެއިނަށް ކުރައްވާ ފުރަތަމަ ދަތުރެވެ. އޭނާ ވަނީ ރަސްގެފާނު ހަމަދް ބިން އީސާ އަލް ހަލީފާއާ ބައްދަލުކުރައްވާފަ އެވެ.
އިޒްރޭލުގެ މީޑިއާ އިން ރިޕޯޓު ކުރި ގޮތުގައި އެ ބައްދަލުވުމަކީ ގަލްފު ގައުމެއްގެ ރަސްގެފާނަކާއި އިޒްރޭލުގެ އޮފިޝަލަކާ ދެމެދު ބޭއްވި ފުރަތަމަ ރަސްމީ ބައްދަލުވުމެވެ.
ބަހްރެއިންގެ އިތުރުން ޔުނައިޓެޑް އަރަބް އެމިރޭޓްސް (ޔޫއޭއީ)، ސޫދާން އަދި މޮރޮކޯ އިން ވެސް ފާއިތުވި އަހަރުގެ ތެރޭގައި އިޒްރޭލާއެކު ގުޅުން ގާއިމްކުރި އެވެ.
ބަހްރެއިނުން ވަނީ 2016 ވަނަ އަހަރު އިރާނާއެކު އޮތް ގުޅުން ކަނޑާލާފަ އެވެ.
