މޫސުމް ގޯސްވެ، ސަފާރީއެއް އަޑިއަށް ދިޔަ ހާދިސާގައި ޓޫރިސްޓަކު މަރުވެއްޖެެ އެވެ.
އެމްއެންޑީއެފްއިން މައުލޫމާތު ދިން ގޮތުގައި, "ހޭންޑީ ގްރޫޒާ" ނަމަކަށް ކިޔާ ސަފާރީއެއް ދިޔަވީ މިއަދު ހެނދުނު ތިލަފުށީ ހުޅަނގު ދެކުނުން ހަތަރު މޭލު ބޭރުންނެވެ.
އެ ސަފާރީގައި އެ ވަގުތު ޓޫރިސްޓުންނާއެކު 17 މީހުން ތިއްބެވެ. ކޯސްޓްގާޑުން ވަނީ އެމީހުން އެހެން އުޅަނދަކަށް ނެގުމަށްފަހު މާލެ ގެނެސްފަ އެވެ.
އޭގެތެރެއިން ހަތް މީހެއްގެ ހާލު ދެރަވެ, އައިޖީއެމް ހޮސްޕިޓަލްގައި އަންނަނީ ފަރުވާދެމުންނެވެ. އޭގެތެރެއިން އެކަކު ހޮސްޕިޓަލްގައި ފަރުވާދެމުން ދަނިކޮށް ވަނީ މަރުވެފަ އެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވި ގޮތުގައި, އެ ހޮސްޕިޓަލްގައި ފަރުވާދެމުން ދަނިކޮށް މަރުވެފައިވަނީ 41 އަހަރުގެ ބިދޭސީއެކެވެ.
މިއަދު މުޅި ރާއްޖެއަށް މޫސުން ގޯސްވެފައިވާއިރު, ކަނޑުދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފަ އެވެ. ކުރިއަށް އޮތް ވަގުތުތަކުގައި ވެސް މޫސުން ގޯސްވާނެ ކަމަށް ލަފާކޮށްފައިވާއިރު ވައި ވަރަށް ގަދަވާނެ އެވެ.
