މާލެއިން ފުރައިގެން ގއ. ވިލިނގިއްޔަށް ދަތުރުކުރި "އުދަރެސް" ބޯޓު، ލ. އޮޅުވެލި ކައިރީގައި އޮންނަ ފަރަކަށް އަރައި ބޯޓު އަޑިއަށް ގޮސް ހިނގި ހާދިސާގައި ގެއްލުނު ދިވެހި މީހާ ފެނިއްޖެ އެވެ.
އެމްއެންޑީއެފް އިން ބުނީ ހާދިސާގައި ގެއްލުނު އިސްމާއިލް އަފީފް ހޯދަމުންދަނިކޮށް ފެނިފައިވާ ކަމަށެވެ. އޭނާ ފެނުނީ ދިރިހުއްޓާ ކަމަށާއި ހޮސްޕިޓަލަށް ގެންގޮސް ފަރުވާ ދެމުންދާ ކަމަށް އެމްއެންޑީއެފް އިން ބުންޏެވެ.
މި ހާދިސާގެ މައުލޫމާތު ލިބިފައިވަނީ ރޭ ދަންވަރު 01:25 ހާއިރެވެ. ހާދިސާ ހިނގިއިރު ބޯޓުގައި ޖުމުލަ 13 މީހުން ތިއްބެވެ.
ބޯޓުގައި ތިބި މީހުންގެ ތެރެއިން ބިދޭސިއަކު ފަތާފައި ގޮސް ލ. އޮޅުވެއްޔަށް އަރާފައިވާއިރު، އިތުރު 11 މީހަކު ރިސޯޓެއްގެ ދޯންޏަކަށް ނަގައި ސަލާމަތްކޮށްފައިވަ ކަމަށް ފުލުހުން ބުންޏެވެ.
ސަލާމަތްކުރި މީހުންގެ ތެރޭގައި ހިމެނެނީ ދެ ދިވެހިންނާއި ނުވަ ބިދޭސީންނެވެ. އެ މީހުންގެ ހާލު ރަނގަޅު ކަމަށް ފުލުހުން ބުންޏެވެ.
ބޯޓު އަޑިއަށް ދިއުމާ ގުޅިގެން ބޯޓުގައި ހުރި ގިނަ އަދަދެއްގެ މުދާ ލ. އޮޅުވެލީގެ ހުޅަނގަށް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރުތަކުން އެކަމަށް ހާއްސަ ސަމާލުކަމެއް ދެއްވުމަށް ފުލުހުން ވަނީ އިލްތިމާސްކޮށްފަ އެވެ.
