އެލައިޑް އިންޝުއަރަންސް ކުންފުނީގެ އިސްލާމިކް ވިންޑޯ، އަޔާދީ ތަކާފުލްއިން ހިޔާ ފްލެޓްތައް ލިބުނު މީހުންނަށް ހާއްސަ އިސްލާމިކް އިންޝުއަރެންސް ޕެކޭޖެއް ތައާރަފުކޮށްފި އެވެ.
އެލައިޑްއިން "އަހަރެންގެ ހިޔާ" ގެ ނަމުގައި ތައާރަފުކުރި ހާއްސަ އިސްލާމިކް އިންޝުއަރެންސް ޕެކޭޖް ނިސްބަތްވަނީ އެކުންފުނީގެ އިސްލާމިކް ވިންޑޯ، އަޔާދީ ތަކާފުލް އަށެވެ. މި ޕެކޭޖަކީ ގޭތެރޭގައި ހިފާގެންގުޅޭ ސާމާނާއި ފަރުނީޗަރު ފަދަ އެހެނިހެން އަގުބޮޑު ތަކެތި ރައްކާކޮށްދޭ ޕެކޭޖެކެވެ.
އަހަރެންގެ ހިޔާ ޕެކޭޖުގައި ތިން ޕެލޭނެއް ހިމެނެ އެވެ. އެއީ ބޭސިކް، އެކްސެލް އަދި ޕްރިމިއަމް އެވެ. އެގޮތުން ބޭސިކް ޕްލޭނަށް މަހަކު 200 ރުފިޔާ ދައްކައިގެން އަހަރަކަށް 150،000 ރުފިޔާގެ ކަވަރޭޖް ލިބޭނެ އެވެ.
އެކްސެލް ޕްލޭނަށް މަހަކު 300 ރުފިޔާ ދައްކައިގެން 250،000 ރުފިޔާގެ ކަވަރޭޖް ލިބޭނެ އެވެ. އަދި ޕްރިމިއަމް ޕްލޭނަށް މަހަކު 400 ރުފިޔާ ދައްކައިގެން 350،000 ރުފިޔާ އާ ހަމައަށް ކަވަރޭޖް ލިބޭނެ އެވެ.
އެލައިޑް އިންޝުއަރަންސްގެ ޖެނެރަލް މެނޭޖަރު އިބްރާހިމް ފިރުޝާން ވިދާޅުވީ އަޔާދީއިން މިޕްލޭން ތައްޔާރުކޮށްފައިވަނީ ހެޔޮ އަގެއްގައި ފަސޭހައިން ހޯދޭ ރައްކާތެރިކަމެއް އެކުލަވާލުމުގެ ނިޔަތުގަ ކަމަށެވެ.
އަދި ބޮޑު ހަރަދުކޮށްގެން ހިޔާ ފްލެޓްގެ ފިނިޝިން މަސައްކަތްތައް ނިންމުމަށްފަހު ފްލެޓަށް ވަންނައިރު، ކުރިމަތިވެދާނެ މާލީ ގެއްލުމަކުން ރައްކާތެރިވުމަށް މިފަދަ ރައްކާތެރިކަމެއް އޮތުން މުހިންމުކަން ފިރުޝާން ފާހަގަކުރެއްވި އެވެ.
އަހަރެންގެ ހިޔާ ޕެކޭޖުގެ ޕްލޭންތަކުން ގޭތެރޭގައި ގެންގުޅޭ ސާމާނަށް ލިބޭ ގެއްލުންތަކަށް ބަދަލު ހޯދައިދެ އެވެ. އެގޮތުން އަލިފާނުގެ ހާދިސާތަކާއި، ވައްކަމުގެ ހާދިސާތައް އަދި ގުދުރަތީ ކާރިސާތަކުން ލިބޭ ގެއްލުން ފާހަގަކުރެވެ އެވެ. މި ޕެކޭޖުގެ ޕްލޭންތައް ފަސޭހައިން ނެގޭނެ ގޮތް ހެދުމަށް އެލައިޑުން ވަނީ އޮންލައިން މިޕްލޭންތަކަށް އެދި ހުށަހެޅޭނެ އިންތިޒާމުތައް ހަމަޖައްސާފަ އެވެ.
މި ޕްލޭންތަކަށް އެ ކުންފުނީގެ ވެބްސައިޓް މެދުވެރިކޮށް އެދެވޭނެކަމަށް އެލައިޑްއިން ބުންޏެވެ.
އަޔާދީއިން އަލަށް ތައާރަފު ކުރި މި ޕެކޭޖާ ބެހޭ މައުލޫމާތު ފޯރުކޮށްދިނުމަށް މިރޭ އެކުންފުނީގެ ކްލަބްހައުސް ސެޝަނެއް ބާއްވަން ވަނީ ހަމަޖެހިފަ އެވެ. މިރޭ 09:00 ގައި އޮންނަ މި ސެޝަން ވަނީ އާންމުންނަށް ހުޅުވާލާފަ އެވެ.
އަހަރެންގެ ހިޔާ ޕެކޭޖަކީ އެއް އަހަރު ދުވަހުގެ އިސްލާމިކް އިންޝުއަރެންސް ޕެކޭޖެކެވެ.
