ރައްޔިތުން މަޖިލީހުގެ ރައީސް ޖުޑީޝަލް ސާވިސް ކޮމިޝަން (ޖޭއެސްސީ)ގައި ހިމެނިވަޑައިނުގަންނަވާ ގޮތަށް އެ ކޮމިޝަން އެކުލެވިގެންވާ ގޮތް އިސްލާހުކުރަންޖެހޭ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިގޮތަށް ވިދާޅުވެފައިވަނީ ވަނީ އެމްޑީޕީ މެމްބަރުންނާއެކު ހަދާފައިވާ ވަޓްސްއަޕް ގްރޫޕަކަށް ފޮނުއްވި މެސެޖެއްގަ އެވެ.
އެ ގްރޫޕްގައި ދެކެވުނު ވާހަކައެއްގެ ސްރީންޝޮޓް "އަދަދު" އަށް ލިބިފައިވާއިރު، އޭގެ ސައްހަކަން ވަނީ ކަށަވަރުވެފަ އެވެ.
އެ ޗެޓްލޮގްގައި ނަޝީދު ވަނީ ޖޭއެސްސީގެ ކޮމްޕޮޒިޝަން ބަދަލުކުރަން ޖެހޭކަން ފާހަގަކުރައްވައި، އެމަނިކުފާނު އެ ކޮމިޝަންގެ މެމްބަރެއްގެ ގޮތުގައި އިންނަވަން ނުޖެހޭ ކަމަށް ވިދާޅުވެފަ އެވެ.
އެގޮތުން ވީ އެންމެ އަވަހަކަށް ޖޭއެސްސީގެ ކޮމްޕޮޒޮޝަން ބަދަލުކުރެއްވުމަށް ހުށަހަޅަން ނަޝީދު އެދިވަޑައިގެންނެވި އެވެ.
ޖޭއެސްސީ ބަދަލު ކުރަން ޖެހޭނެ. އެތާ އަޅުގަނޑު އިންނާކަށް ނުޖެހޭނެ. މާދަމާވެސް އިސްލާހު ލާންވީ.
ގާނޫނުއަސާސީގައި ޖޭއެސްސީ އެކުލެވިފައި އޮންނަ ގޮތަށް ބަލާއިރު އެ ކޮމިޝަންގައި ގިނަ އަދަދެއްގެ ސިޔާސީ ބޭފުޅުން މިހާރު ތިއްބަވަ އެވެ. އެގޮތުން ރައީސުލްޖުމްހޫރިއްޔާގެ މެންބަރަކާއި، މަޖިލީހުގެ ރައީސްއާއި، މަޖިލީހުގެ މެންބަރަކާއި، ބަންޑާރަ ނައިބު އިންނަވަ އެވެ.
އަދި ސުޕްރީމް ކޯޓުގެ ފަނޑިޔާރަކާއި، ހައި ކޯޓުގެ ފަނޑިޔާރަކާއި، ދަށު ކޯޓުގެ ފަނޑިޔާރަކާއި، ސިވިލް ސާވިސް ކޮމިޝަންގެ ރައީސްއާއި، ވަކީލުންގެ ތެރެއިން އިންތިހާބު ކުރެވޭ ވަކީލަކު އިންނަވަން ޖެހެ އެވެ.
އެހެންވެ ޖޭއެސްސީ މެދުވެރިކޮށް، އެ ކޮމިޝަންގައި އޭރަކު ތިއްބަވާ ސިޔާސީ ބޭފުޅުން ބޭނުންވާ ގޮތަކަށް ޝަރުއީ ނިޒާމު ބައްޓަން ކުރަމުންދާ ކަމަށް ބުނެ، އެކަމުގެ ޝަކުވާ އަބަދުވެސް އޮވެ އެވެ.
ޖޭއެސްސީގެ އެކުލެވުން ބަދަލު ކުރުމަކީ ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދުފުޅެކެވެ. ރިޔާސީ ދައުރު ނިމުމުގެ ކުރިން އެކަން ކުރައްވާނެ ކަމަށް ސަރުކާރުން ވަނީ ބުނެފަ އެވެ.
އެކަމަކު މިހާތަނަށް އައިއިރު ވެސް ޖޭއެސްސީގެ އެކުލެވުން އެ އޮތް ގޮތަށް ބާއްވައިގެން ކުރިއަށް ދާތީ އާންމުންގެ ގިނަ ފާޑުކިއުމެއް އެމްޑީޕީއަށާއި ސަރުކާރަށް ދަނީ އަމާޒު ކުރެވެމުންނެވެ.
