ކާބުލް، އަފްގާނިސްތާން (ސެޕްޓެމްބަރު 18) - އެމެރިކާ އިން "އޮޅިގެން" ދިން ޑްރޯން ހަމަލާއެއްގައި 10 މެމްބަރުން މަރުވި އަފްގާން އާއިލާ އިން ބަދަލުގެ ގޮތުގައި ފައިސާ ދިނުމަށާއި އެމެރިކާ އެ މީހުންގެ ކުރިމައްޗަށް އައިސް މައާފަށް އެދުމަށް ޑިމާންޑުކޮށްފި އެވެ.
އިޒްމަރާއީ އަހްމަދަކީ އިސްލާމިކް ސްޓޭޓް (އައިއެސް) މެމްބަރެއްގެ ގޮތުގައި އެމެރިކާ އިން ޓާގެޓު ކުރީ ނުބައި ޖާސޫސީ މައުލޫމާތެއްގެ މައްޗަށް ބިނާކޮށްގެންނެވެ. އޯގަސްޓު 29 ވަނަ ދުވަހު އޭނާގެ ކާރު ފަހަތުން އަށް ގަޑިއިރު ޓްރެކް ކުރުމަށް ފަހު، އެއަށް އަމާޒުކޮށް މިސައިލް ހަމަލާއެއް އެމެރިކާ އިން ދިނެވެ. އެ ހަމަލާގައި އަހްމަދީ އާއިލާގެ ހަތް ކުދިންނާއި ތިން މީހުން މަރުވި އެވެ.
އެއީ އޮޅިގެން ދެވުނު ހަމަލާއެއް ކަމަށް އެމެރިކާގެ އިސް އަސްކަރީ ޖެނެރަލަކު ވަނީ އެއްބަސްވެފަ އެވެ. އެމެރިކާގެ ޑިފެންސް ސެކެޓްރީ ލޮއިޑް އޯސްޓިން ވަނީ މަރުވި މީހުންގެ އާއިލާގެ ކިބައިން މައާފަށް އެދޭ ކަމަށް ވެސް ވިދާޅުވެފަ އެވެ.
ނަމަވެސް އަހްމަދީ އަށް ބޮޑުބޭބެ ކިޔާ އުމުރުން 22 އަހަރުގެ ފަރްޝަދު ހައިދަރީ ބުނީ އެވަރުން ނުފުދޭ ކަމަށެވެ.
"އެ މީހުން މި ތަނަށް އައިސް އަހަރުމެންގެ ކުރިމަތީގައި މައާފަށް އެދެން ޖެހޭނެ،" ކާބުލްގެ ކްވާޖާ ބުރްގާ ހިސާބުގައި ބޮން އަޅައި، ބިމާ ހަމަވެފައިވާ ގޭގެ ތެރޭގައި ހުރެ އޭނާ އޭއެފްޕީ އަށް ބުންޏެވެ.
އެ ހަމަލާގައި ހައިދަރީގެ ބޭބެ ނާސިރު އަދި ބޭބެގެ ދަރިންކޮޅު ވެސް މަރުވި އެވެ. އޭނާ ބުނީ އެމެރިކާ އިން އެ އާއިލާއާ ސީދާ ގުޅާފައި ނުވާ ކަމަށެވެ.
"އެ މީހުން އައިސް ބަދަލު ދޭން ޖެހޭނެ. މަރާލީ ޓެރަރިސްޓުންނެއް ނޫން. އެ މީހުންނަށް އެކަން ސާފު އަދި މުޅި ދުނިޔެއަށް ވެސް އެ އޮތީ ފެންނަން،" އެ އާއިލާގެ އިތުރު މީހަކު ބުންޏެވެ.
ހައިދަރީ ބުނީ މިސައިލް އަމާޒު ކުރި މީހުން ދެނެގަނެ، އެ މީހުން ޝަރީއަތަށް ގެންނަން އެދޭ ކަމަށެވެ.
"މި އާއިލާގެ ގިނަ މީހުން އެމެރިކާއަށް މަސައްކަތް ކޮށްދިން. ނާސިރު 10 އަހަރު ވަންދެން އެމެރިކާއަށް މަސައްކަތް ކޮށްދިން. އަހަރެންގެ ބޮޑުބޭބެ ވެސް ބޭރުގެ ޖަމިއްޔާތަކަށް މަސައްކަތް ކޮށްދިން."
އަހްމަދީ މަރުވިއިރު، އޭނާ މަސައްކަތް ކުރަމުން ދިޔެއީ އެމެރިކާގެ އެހީދޭ ޖަމިއްޔާއަކާ ގުޅިގެންނެވެ.
ހައިދަރީ އެ އާއިލާއިން މަރުވި އެންމެންނަށް ވެސް ވަނީ އަފްގާނިސްތާން ދޫކޮށް އެމެރިކާއަށް ދިޔުމަށް ބޭނުންވާ ލިޔުންތައް ލިބިފައި ކަމަށާއި އެ މީހުން ތިބީ ތާލިބާން ވެރިކަމާ ދުރަށް ދިޔުމުގެ އުއްމީދުގައި ކަމަށެވެ.
ނުބައި ޖާސޫސީ މައުލޫމާތެއްގެ މައްޗަށް ބިނާކޮށް އެމެރިކާ އިން އަހްމަދީގެ ކާރަށް ހަމަލާ ދިނީ ކާބުލް އެއާޕޯޓަށް އައިއެސް އިން ދިން ހަމަލާއެއްގައި 100 އަށް ވުރެ ގިނަ މީހުން މަރުވިތާ ތިން ދުވަސް ފަހުންނެވެ. އެއާޕޯޓު ހަމަލާގައި އެމެރިކާ ސިފައިންގެ 13 މީހުން މަރުވި އެވެ.
އަހްމަދީގެ ބޭބެ އައިމަލް ބުނީ އެމެރިކާއިން ބަދަލު ދޭން ޖެހޭނެ ކަމަށެވެ. އައިމަލްގެ ތިން އަހަރުގެ ދަރިފުޅު މަލެކާ ވެސް ވަނީ އެ ހަމަލާގައި މަރުވެފަ އެވެ.
"މިއަދު އަހަރުމެންނަށް ލިބުނު އުފާވެރި ހަބަރެއް އެއީ، އެމެރިކާ އިން އޮޅިގެން ކުށެއް ނެތް އާއްމު ރައްޔިތުންނަށް ހަމަލާ ދިން ކަމަށް އެއްބަސްވުމަކީ ވެސް. އަހަރުމެންނަކީ ކުށެއް ނެތް ބަޔެއްކަން ސާބިތުވެއްޖެ،" އޭނާ ބުންޏެވެ.
"ބައިނަލްއަގްވާމީ އިދާރާތަކުން އަހަރުމެން މި ޑިމާންޑު ކުރަނީ އިންސާފު ހޯދަން... އޭގެ ފަހުން ފައިސާގެ ބަދަލު ވެސް ދޭން ޖެހޭނެ."
އެމެރިކާގެ އިސް އޮފިޝަލަކު ބުނީ އެ ހަމަލާގައި މަރުވި މީހުންގެ އާއިލާތަކަށް ފައިސާގެ ބަދަލު ދެވޭނެ ގޮތަކާ މެދު ސަރުކާރުން މަޝްވަރާ ކުރަމުންދާ ކަމަށެވެ.
