އދ. އާންމު މަޖިލީހުގެ 76 ވަނަ ސެޝަނުގައި ބައިވެރިވެވަޑައިގެންނެވުމަށް ރައީސް އިބްރާހިމް މުހައްމަދު ސޯލިހުގެ ދެކަނބަލުން މިއަދު ހެނދުނު އެމެރިކާގެ ނިއު ޔޯކަށް ފުރާވަޑައިގެންފި އެވެ.
އެ ސެޝަނުގައި ރައީސް ތަގުރީރުކުރެއްވުމަށް ހަމަޖެހިފައި ވަނީ އަންނަ އަންގާރަ ދުވަހު އެވެ.
އދ. ގެ ސެކްރެޓޭރިއަޓުން އާންމުކޮށްފައިވާ ވަގުތީ އެޖެންޑާގައިވާ ގޮތުން، ރައީސް ސޯލިހު ތަގުރީރުކުރެއްވުމަށް ތާވަލުކުރެވިފައިވަނީ ފުރަތަމަ ދުވަހުގެ ސެޝަންގައި ތިން ވަނަ އަށެވެ. އޭގެ ކުރިއަށް ތިއްބެވީ، ބްރެޒިލް އާއި އެމެރިކާގެ ލީޑަރުންނެވެ.
އދ. ގައި ތަގުރީރުކުރެއްވުމުގެ އިތުރުން، ޖަލްސާގެ ހަވާސާގައި ގިނަ ގައުމުތަކުގެ އިސް ވެރިންނާ އެކު ރައީސް ބައްދަލުވުންތައް ކުރިއަށްގެންދަވާނެ ކަމަށް ވެސް ރައީސް އޮފީހުން ބުންޏެވެ.
މި ދަތުރުފުޅުގައި މި މަހުގެ 28 ވަނަ ދުވަހާ ހަމައަށް ރައީސް އެމެރިކާގައި ހުންނަވާނެ އެވެ.
އެމަނިކުފާނު ތަގުރީރުކުރައްވާއިރު، ރިޔާސަތުގައި ފޮރިން މިނިސްޓަރު އަބްދުﷲ ޝާހިދު އިންނަވާނެތީ، އެ ވަގުތު ވެގެންދާނީ ރާއްޖެއަށް ތާރީހީ ވަގުތު ކޮޅަކަށެވެ.
ޖުމްލަ 193 ގައުމުގެ މައްޗަށް އެކުލެވޭ އދ. ގެ މި އަހަރުގެ އާންމު މަޖިލީހުގެ ރިޔާސަތު ބަލަހައްޓަވާނީ ޝާހިދު އެވެ. މަޖިލިސް ރަސްމީކޮށް މި ދައުރަށް ހުޅުވައި ޝާހިދު މިހާރު ވަނީ ރިޔާސަތާ ހަވާލުވެވަޑައިގެންފަ އެވެ.
މިއީ 2018 ވަނަ އަހަރު ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން އދ. ގައި ތަގުރީރުކުރައްވާ ދެވަނަ ފަހަރެވެ. އެމަނިކުފާނު 2019 ވަނަ އަހަރު އދ. ގައި ތަގުރީރުކުރައްވާފައިވަނީ، ރާއްޖޭގެ އެންމެ އިސްވެރިޔާ އދ. ގެ އާންމު މަޖިލީހުގައި ބައިވެރިވަޑައިނުގަންނަވާތާ ހަތް އަހަރު ފަހުންނެވެ.
ކޮވިޑުގެ ބަލިމަޑުކަމާ ގުޅިގެން މިދިޔަ އަހަރު އާންމު މަޖިލީހުގެ ބަހުސް ބާއްވާފައިވަނީ އޮންލައިންކޮށެވެ. ހުރިހާ ގައުމުތަކުން ކުރިން ރެކޯޑްކޮށްފައިވާ މެސެޖުތަކެއް އިއްވާފައިވާއިރު، މިދިޔަ އަހަރު ރާއްޖެ ތަމްސީލު ކުރެއްވީ އަބްދުﷲ ޝާހިދެވެ.
މި ދަތުރުފުޅުގައި މި މަހުގެ 28 ވަނަ ދުވަހާ ހަމައަށް ރައީސް އެމެރިކާގައި ހުންނަވާނެ އެވެ.
