އައްޑޫ ސިޓީގައި މިރޭ މާރާމާރީއެއް ހިންގައި ދެ މީހަކު ޒަހަމްކޮށްލައިފި އެވެ. މިއީ މިއަދު އެ ސިޓީގައި ހިނގި ދެވަނަ މާރާމާރީ އެވެ.
ފުލުހުން މައުލޫމާތު ދިން ގޮތުގައި މިރޭ ޒަހަމްކޮށްލާފައިވަނީ ސައިކަލެއްގައި ތިބި ދެ މީހަކަށެވެ. އެ ދެ މީހުންނަށް ހަމަލާދީފައިވަނީ ދުއްވާފައި ދިޔަ ސައިކަލެއްގައި އިން އެހެން މީހަކު ތޫނު އެއްޗެއް ބޭނުން ކޮށްގެންނެވެ.
އަނިޔާވެފައިވަނީ 27 އަހަރާއި 23 އަހަރުގެ މީހަކަށެވެ. އެ ދެ މީހުންނަށް ވެސް މިހާރު ގެންދަނީ ހޮސްޕިޓަލްގައި ފަރުވާދެމުންނެވެ. ނަމަވެސް, އެމީހުންނަށް ލިބިފައިވާ އަނިޔާގެ ތަފްސީލެއް އަދި ނުލިބެ އެވެ.
އައްޑޫގައި މިއަދު ފުރަތަމަ މާރާމާރީ ހިނގީ ފްލެޓެއްގެ ތެރޭ ހުކުރު ވަގުތުގަ އެވެ. އެ މާރާމާރީގައި ޒަހަމްވި 29 އަހަރުގެ މީހާގެ ބޮލަށް އެކި ވަރުގެ އަނިޔާތައް ލިބިފައިވެ އެވެ.
އެމީހާ ވެސް ގެންދަނީ އިކްއަޓޯރިއަލް ހޮސްޕިޓަލުގައި ފަރުވާދެމުންނެވެ.
އައްޑޫގައި މިއަދު ދެ މާރާމާރީއެއް ހިނގާފައިވާއިރު މާލޭގައި ވެސް މާރާމާރީއެއް މިރޭ ހިނގި އެވެ. މުލިއާގެ ކުރިމަތީގައި ދެ މީހެއްގެ މެދުގައި ހިނގި މި މާރާމާރީގައި އަނިޔާވި މީހާއަށް އަންނަނީ އައިޖީއެމްއެޗްގައި ފަރުވާދެމުންނެވެ.
