ނިއު ދިއްލީ، އިންޑިއާ (ސެޕްޓެމްބަރު 17) - ޓީ20 ކްރިކެޓް ވޯލްޑް ކަޕަށް ފަހު އިންޑިއާ ކްރިކެޓް ޓީމުގެ ކެޕްޓަންކަން ދޫކޮށްލަން ނިންމާފައިވާ ކަމަށް މަޝްހޫރު ކްރިކެޓް ތަރި ވިރާތު ކޯލީ ބުނެފި އެވެ.
މި ފަހަރުގެ ޓީ20 ކްރިކެޓް ވޯލްޑް ކަޕް އޮތީ 17 އޮކްޓޫބަރުން 14 ނޮވެމްބަރަށް އޮމާނާއި ޔުނައިޓެޑް އަރަބް އެމިރޭޓްސް (ޔޫއޭއީ)ގަ އެވެ.
ޓްވިޓާގައި އާންމުކުރި ބަޔާނެއްގައި އުމުރުން 32 އަހަރުގެ ވިރާތު ބުނީ ފާއިތުވި ފަހެއް ނޫނީ ހަ ވަރަކަށް އަހަރު ގައުމީ ޓީމުގެ ކެޕްޓަނެއްގެ ޒިންމާ ފުރިހަމަ އަށް އަދާކުރެވުނު ކަމަށް ގަބޫލުކުރާ ކަމަށެވެ. އަދި މި ފަހަރުގެ ޓީ20 ވޯލްޑް ކަޕަށް ފަހު ބޭނުންވަނީ ކެޕްޓަންކަމުގެ ޒިންމާ އެހެން މީހަކަށް ދީ "އަމިއްލަ ނަފްސަށް ވަގުތުތަކެއް ހުސްކޮށްލުމަށް" ކަމަށް ވިރާތު ބުންޏެވެ.
އިންޑިއާގެ ޕްރެކްޓިހެއްގެ ތެެރެއިން ވިރާތު: މި ފަހަރުގެ ޓީ20 ވޯލްޑް ކަޕަކީ އޭނާ ކެޕްޓަންކަން ކުރާނެ ފަހު މުބާރާތް.
"ޓީ20 ޓީމުގެ ކެޕްޓަނެއްގެ ގޮތުގައި ހުރެ އަހަރެން ވާނީ މި ޓީމަށް ޓަކައި ކޮށްދެވޭނެ ހުރިހާ ކަމެއް ކޮށްފައި. ކުރިއަށް އޮތްތަނުގައި ޓީމުގެ ބެޓްސްމަނެއްގެ ގޮތުގައި ހުރެ ވެސް އަހަރެން މި ޓީމަށް ކޮށްދެވެން ހުރި ހުރިހާ ކަމެއް ކުރާނަން،" ވިރާތު ބުންޏެވެ.
ފާއިތުވި މަސްތަކުގައި ވިރާތުގެ ކުޅުން ދަށްވެގެން އޭނާ އަތުން އިންޑިއާގެ ކެޕްޓަންކަން ނަގަން ވެސް ގިނަ ކްރިކެޓް ކުޅުންތެރިން ދިޔައީ ގޮވާލަމުންނެވެ. ވިރާތު، އޭރު ބުނީ ޓީމުގެ ކެޕްޓަންކަމުގެ ޒިންމާއާ ހަވާލުވީ ވަރަށް ޔަގީންކަމާ އެކު ކަމަށާއި ކެޕްޓަން ކަން ދޫކޮށްލަން ޖެހޭ ރަނގަޅު ވަގުތެއްގައި އެކަން ވެސް ކުރަން ފަސްނުޖެހޭނެ ކަމަށެެވެ.
ވިރާތު ވަނީ ޓީ20ގައި އިންޑިއާ އަށް ކުޅެދިން 90 މެޗުގައި 3159 ލަނޑު ހަދައިފަ އެވެ. ވިރާތު އަށް އިންޑިއާ ޓީމުގެ ކެޕްޓަންކަން ދިނީ 2017 ވަނަ އަހަރު އެވެ.
ވިރާތަށް ކެޕްޓަންކަން ދޭން ނިންމި އެންމެ ބޮޑު ސަބަބަކީ 2016 ވަނަ އަހަރުގެ ޓީ20 ވޯލްޑް ކަޕްގެ މޮޅު ކުޅުންތެރިޔާގެ މަގާމު އޭނާ އަށް ލިބުމުންނެވެ. އެ ފަހަރު އިންޑިއާ ކުޅުނީ ކާމިޔާބު ކެޕްޓަން މަހިންދުރަ ސިންގް ދޯނީގެ ލީޑަޝިޕްގެ ދަށުންނެވެ.
