ކުރީގެ ރައީސް މައުމޫން އަބްދުލް ގައްޔޫމް އިސްވެ ހުންނަވައިގެން އުފެއްދި މޯލްޑިވްސް ރިފޯމް މޫވްމެންޓް (އެމްއާރުއެމް)ގެ ޒައީމް ކަމަށް އަދި މިހާތަނަށް ކުރިމަތިލެއްވީ ރައީސް މައުމޫން އެކަނި ކަމަށާއި ޕާޓީގެ ރައީސްކަމުގެ މަގާމަށް އެއްވެސް ބޭފުޅަކު އަދި ކުރިމަތިލައްވާފައި ނުވާ ކަމަށް އެ ޕާޓީން ބުނެފި އެވެ.
ސަރުކާރު ހިންގާ ކޯލިޝަނުގައި ހިމެނޭ އެމްއާރުއެމްގެ ޒައީމް، ރައީސް އަދި ނައިބު ރައީސްގެ މަގާމު ހިމެނޭހެން ޕާޓީގެ ރަސްމީ މަގާމުތަކަށް ކުރިމަތިލާން ހުޅުވާލާފައިވަނީ މިމަހުގެ 10 ވަނަ ދުވަހު އެވެ. އެ މަގާމުތަކަށް ކުރިމަތިލާން ކަނޑައަޅާފައި އޮތް މުއްދަތު ހަމަވާނީ މާދަމާ އެވެ.
މަގާމުތަކަށް މީހުން ހޮވާނީ އަންނަ މަހުގެ ދެވަނަ ދުވަހު ބާއްވަން ހަމަޖެހިފައިވާ އެ ޕާޓީގެ ކޮންގްރެސް ޖަލްސާގަ އެވެ.
އެމްއާރުއެމްގެ ސެކްރެޓަރީ ޖެނެރަލް އަބްދުލްއަލީމް އާދަމް "އަދަދު" އަށް ވިދާޅުވި ގޮތުގައި މިވަގުތު ޕާޓީގެ އިންތިހާބީ މަގާމުތަކަށް ޖުމްލަ 28 ފަރާތަކުން ކުރިމަތިލާފައިވެ އެވެ.
"ޕާޓީގެ ޒައީމްކަމަށް ކުރިމަތިލެއްވީ ރައީސް މައުމޫން އެކަނި އަދި، ޕާޓީގެ ރައީސް ކަމަށް އަދި އެއްވެސް ބޭފުޅަކު ކުރިމަތިނުލައްވާ," އަލީމް ވިދާޅުވި އެވެ.
ޑިސެމްބަރު 20، 2019ގައި ސިޔާސީ ޕާޓީއެއްގެ ގޮތުގައި އިލެކްޝަންސް ކޮމިޝަން (އީސީ) ގައި ރެޖިސްޓާކުރި އެމްއާރުއެމްގެ ކޮންގްރެސް އަންނަ މަހު ބާއްވަން ހަމަޖެހިފައިވަނީ ކޮވިޑާ ހެދި ކޮންގްރެސް ނުބޭއްވި ލަސްވުމާއެކު، އީސީން ކޮންގްރެސް ބާއްވަން ދޭ މުއްދަތު އިތުރުކޮށްދިނުމުންނެވެ.
އާއްމުކޮށް ޕާޓީއެއްގެ ކޮންގްރެސްއަކީ އެ ޕާޓީއެއް ރެޖިސްޓްރީ ކުރާތާ ކުރު މުއްދަތެއް ތެރޭ ބާއްވަން ޖެހޭ ޖަލްސާއެކެވެ.
އެމްއާރުއެމްގެ އިސް މަގާމުތަކުގެ އިތުރުން ދެން ކުރިމަތިލާން ހުޅުވާލީ ޕާޓީގެ ނައިބު ރައީސުންގެ ދެ މަގާމު، އެގްޒެކިޓިވް ކޮމިޓީ، ޒުވާނުންގެ ކައުންސިލް، އަންހެނުންގެ ކައުންސިލްގެ ރައީސްއާއި ނައިބު ރައީސް އަދި މެމްބަރުކަމުގެ މަގާމު ތަކަށެވެ.
