ކޮވިޑްގެ ސަބަބުން ފާއިތުވި ދޮޅު އަހަރެއްހާ ދުވަހަކީ ދިވެހި ރައްޔިތުންނަށް ދަތި އުނދަގޫތަކެއް ތަހައްމަލްކުރަންޖެހުނު ދުވަސްތަކެއް ކަމާށާއި އެހެންކަމުން މިއީ ދިވެހިރާއްޖޭގައި ސާފް ޗެމްޕިއަންޝިޕް ބާއްވަން އެންމެ މުނާސަބު ވަގުތު ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.
ސާފް ޗެމްޕިއަންޝިޕްގެ ރަސްމީ ކެމްޕޭން "މަގޭ މަހަލްދީބް" ލޯންޗްކުރުމަށް ރޭ ގަލޮޅު ރަސްމީ ދަނޑުގައި ބޭއްވި ހަފުލާގައި ވާހަކަދައްކަވަމުން، ބައްސާމް ވިދާޅުވީ ސާފް ޗެމްޕިއަންޝިޕް ރާއްޖޭގައި ބޭއްވުމަކީ، ދިވެހި ރަައްޔިތުންނަށް އުފާވެރިކަން ގެނެސްދޭނެ ކަމެއް ކަމަށެވެ.
"ސާފް ޗެމްޕިއަންޝިޕް ރާއްޖޭގައި ބޭއްވިގެންދާ މި ވަގުތަކީ ވަރަށް ވެސް މުނާސަބު ވަގުތެއް ކަމަށް އަޅުގަނޑު ދެކެނީ. ދޮޅު އަހަރެއްހާ ދުވަހު ދިވެހި ރައްޔިތުން ވަރަށް އުނދަގޫ ދަތި ހާލުގައި ތަހައްމަލްކޮށްފި. މާޔޫސްކަން ގެނުވި ދޮޅު އަހަރެއްހާ ދުވަސް ހިނގައެއްޖެ،" ބައްސާމް ވިދާޅުވި އެވެ. "ކުރިއަށް، މުސްތަގްބަލަށް ފިޔަވަޅުތަކަށް އަޅާއިރު، ސާފް ޗެމްޕިންޝިޕްގެ މުބާރާތުން އުފާވެރިކަން ގެނުވާނެ ހަފުލާއަކަށް ވެގެންދާނެ."
ސަރަހައްދީ އެންމެ ބޮޑު ފުޓްބޯޅަ މުބާރާތް ކަމަށްވާ ސާފް ޗެމްޕިއަންޝިޕް ދިވެހިރާއްޖޭގައި ބާއްވާނީ އަންނަ މަހުގެ 1 އިން 16 އަށެވެ. މިއީ ރާއްޖޭގައި މި މުބާރާތް ހޯސްޓްކުރާ ދެ ވަނަ ފަހަރެވެ. ރާއްޖެ އެކަނި ހޯސްޓެއްގެ ގޮތުގައި އޮވެގެން މުބާރާތް ބާއްވާ ފުރަތަމަ ފަހަރެވެ.
މި މުބާރާތަށް ތައްޔާރުވުމުގެ ގޮތުން ގައުމީ ޓީމު ވަނީ މިހާރު ގަތަރުގައި ކޭމްޕްކޮށްފަ އެވެ.
ބައްސާމް ވިދާޅުވީ މި މުބާރާތަކީ ގައުމީ ޖޯޝާއި ރޫހު އާލާކުރަން ލިބޭ ފުރުސަތެއް ކަމަށެވެ.
"ގައުމީ ޓީމު ގަތަރުގައި ކޭމްޕްކޮށް މި މުބާރާތަށް ތައްޔާރުވަމުން ދާއިރު، ޓީމުގެ ކޮންމެ ކުޅުންތެރިއެއްގެ އަމާޒަކީ ދިވެހި ރައްޔިތުންނަށް އުފާވެރިކަން ގެނެސްދިނުން،" ބައްސާމް ވިދާޅުވި އެވެ.
"އަޅުގަނޑުގެ އެދުމަކީ މިއަދުން ފެށިގެން ހުރިހާ ގެއެއްގައި ވެސް ގައުމީ ދިދަ ނަގައި، ގައުމީވަންތަ ޖޯޝުގައި ގައުމީ ޓީމަށް ހިތްވަރު ދިނުން. 12 ވަނަ ކުޅުންތެރިއާގެ ޖޯޝާއި ފޯރިއަކީ ކުޅުންތެރިންނަށް އަބަދު ވެސް ލިބޭނެ ހިތްވަރެއް."
ބައްސާމް ވިދާޅުވީ މުބާރާތުގެ މެޗުތަކަށް ސަޕޯޓަރުން ވައްދައިގެން ކުރިއަށް ގެންދިއުމުގެ އިންތިޒާމްތައް ހަމަޖެއްސުމަށް މަސައްކަތްކުރަމުންދާ ކަމަށެވެ. އެހެންކަމުން، ހުރިހާ ރައްޔިތުން ވެސް ކޮވިޑް ވެކްސިންގެ ދެ ޑޯޒް ފުރިހަމަކުރުމަށް އިލްތިމާސްކުރެއްވި އެވެ.
ސާފް ޗެމްޕިއަންޝިޕް ކެމްޕޭން ލޯންޗްކުރުމަށް ރޭ އޮތް ހަފުލާގައި، މުބާރާތުގެ ބްރޭންޑިންނާއި ލޯގޯ އަދި މެސްކޮޓް ވެސް ވަނީ ދައްކާލައިފަ އެވެ.
