މަނީލޯންޑްރިންގެ ދައުވާ ސާބިތުވެ, ފަސް އަހަރުގެ ޖަލު ހުކުމެއް ތަންފީޒު ކުރަމުން ގެންދަވާ ކުރީގެ ރައީސް އަބްދުالله ޔާމީން ކަފާލާތުގެ ދަށުން ދޫކޮށްލައި, ހުކުމް ތަންފީޒުކުރުން ފަސްކޮށްދޭން ސުޕްރީމް ކޯޓުގައި އެދިއްޖެ އެވެ.
ޔާމީންގެ މައްޗަށް ކުށް ސާބިތުވެފައިވަނީ ގއ. ވޮޑުމުލާ ކުއްޔަށް ދޫކޮށްގެން ލިބުނު ކަމަށް ބުނާ އެއް މިލިއަން ޑޮލަރު އެސްއޯއެފް މެދުވެރިކޮށް ޔާމީންގެ ބޭންކް އެކައުންޓަށް ޖާމަކޮށް, އެ ފައިސާގެ އަސްލު އޮޅުވާލައި އޭގެން މަންފާ ހޯދާފައިވާކަން ސާބިތުވުމުންނެވެ.
ކުރިމިނަލް ކޯޓުގެ ފަސް ގާޒީއެއްގެ ބެންޗަކުން ޔާމީންގެ މައްޗަށް ފަސް އަހަރުގެ ޖަލު ހުކުމާއެކު ފަސް މިލިއަން ޑޮލަރުގެ ޖޫރިމަނާގެ ހުކުމެއް އިއްވި އެވެ. އެ ހުކުމް ހައިކޯޓުގައި އިސްތިއުނާފުކުރުން, އެ ކޯޓުގައި ޝަރީއަތް ހިންގައި, ދަށު ކޯޓުގެ ހުކުމަށް ބެންޗުގެ އަގުލަބިއްޔަތުން ތާއިދުކުރި އެވެ.
ހައިކޯޓުގައި ވެސް ޔާމީންގެ ފަރާތުން ކަފާލާތުގެ ދަށުން ދޫކޮށްލުމަށާއި ހުކުމް ތަންފީޒުކުރުން ފަސްކުރުމަށް އެދުނެވެ. ނަމަވެސް, އެ ކޯޓުން ނިންމީ އެފަދަ އަމުރެއް ނެރޭނެ ތަނެއް ނެތް ކަަމަށެވެ.
ކަފާލާތުގެ ދަށުން މީހުން ދޫކޮށްލަނީ, ކޯޓުން ކަނޑައަޅާ އަދަދެއްގެ ފައިސާ ބެހެއްޓުމަށްފަހު ޝަރުތުތަކަކާއެކު އެވެ.
މީގެކުރިން ހައިކޯޓުން ވެސް އަދި ސުޕްރީމް ކޯޓުން ވެސް ވަނީ ކަފާލާތުގެ ދަށުން މީހުން ބަންދުން ދޫކޮށް, ހުކުމް ތަންފީޒުކުރުން ފަސްކުރި އެވެ. އެގޮތުން ހައިކޯޓުން ކުރީގެ ރައީސް މައުމޫން އަބްދުލްގައްޔޫމް ކަފާލާތުގެ ދަށުން ދޫކުރި އެވެ. އަދި ސުޕްރީމް ކޯޓުން ކުރީގެ ރައީސް މުހައްމަދު ނަޝީދުގެ ހުކުމް ތަންފީކުރުން ފަސްކުރަން އަމުރުކުރި އެވެ.
ޔާމީންގެ މައްޗަށް އޮތް ހުކުމަށް ހައިކޯޓުން ތާއިދުކުރި މައްސަލަ ސުޕްރީމް ކޯޓުގައި އިސްތިއުނާފުކޮށްފައިވުމުން, އެ މައްސަލާގެ ޝަރީއަތް މިއަދު މަތީ ކޯޓުގައި ވަނީ ފަށާފަ އެވެ. އެ އަޑުއެހުން ފެށުމަށްފަހު ކަފާލާތުގެ ދަށުން ދޫކޮށްލުމާއި ހުކުމް ތަންފީޒުކުރުން ފަސްކުރުމުގެ އަމުރަށް އެދިފައިވާތީ އެކަމާ ގުޅޭ ގޮތުން ވާހަކަ ދެއްކުމަށް ފުރުސަތު ދިނެވެ.
ލިޔުމުން ޔާމީންގެ ފަރާތުން އެކަމަށް އެދި ހުށަހަޅާފައިވާއިރު, ލިޔުމުން ދައުލަތުން ވަނީ ޖަވާބުދާރީވެސްވެ, އެކަމަށް އިއުތިރާޒުކޮށްފަ އެވެ.
ޔާމީންގެ ވަކީލުންގެ ޓީމުން މިއަދުގެ އަޑުއެހުމުގައި ވިދާޅުވި ގޮތުގައި, ދައުލަތުގެ ޖަވާބު ލިބިފައިވަނީ އިއްޔެ ކަމަށްވާތީ, އެއަށް ރައްދު ދޭން ތައްޔާރުވާން އިތުރު މުއްދަތު ބޭނުންވެ އެވެ. އެހެންވެ, ޝަރީއަތުން ނިންމެވީ އެ ބައި ދެ ދުވަސް ފަހުން ކުރިއަށް ގެންދިޔުމަށެވެ.
އެ ބައި ދެ ދުވަސް ފަހުން ކުރިއަށް ގެންދަން ނިންމައި, މައްސަލާގެ އިސްތިއުނާފު ކުރިއަށް ގެންދަން ފަނޑިޔާރުން ނިންމެވި އެވެ. އެގޮތުން, އިސްތިއުނާފީ ނުކުތާއް ހުށަހެޅުއްވުމަށް ޔާމީންގެ ވަކީލުންނަށް ފުރުސަތު ދެއްވި އެވެ.
މައްސަލަ ބައްލަވާ ބެންޗު --
ޔާމީންގެ ފަރާތުން ޖުމްލަ 22 އިސްތިއުނާފީ ނުކުތާއެއް ހުށަހަޅާފައިވާއިރު, އެއީ ހައިކޯޓުގައި ވެސް ފާހަގަކުރި ކަންކަމެވެ. އޭގެ ތެރޭ މައްސަލާގެ ތަހުގީގާއި ޝަރީއަތުގެ އިބްތިދާއީ އަދި ޝަރީއަތުގެ މަރުހަލާގައި ހިނގަދިޔަ ކަމަށް ޔާމީންގެ ފަރާތުން ދެކެވަޑައިގަންނަވާ އިޖުރާއީ މައްސަލަތައް ފާހަގަކުރި އެވެ.
އެގޮތުން ތަހުގީގުގައި ޔާމީންގެ މައްޗަށް މަނީލޯންޑްރިންގެ ތުހުމަތު ނުކުރާ ކަމާއި ކޮށްފައިވަނީ ކޮރަޕްޝަންގެ ތުހުމަތު ކަމަށް ބުނާ ނުކުތާ ފާހަގަކުރި އެވެ. ޔާމީންގެ ވަކީލް, ޑރ. މުހައްމަދު ޖަމީލު ވިދާޅުވި ގޮތުގައި ތުހުމަތު ނުކުރާ ކުށަކަށް ދައުވާއެއް ނުކުރެވޭނެ އެވެ.
އޭގެއިތުރުން ޔާމީންގެ މައްޗަށް މަނީލޯންޑްރިންގެ ދައުވާ އުފުލިިއިރު, އެކަން ކުރި ގޮތެއް, ޑިޒައިންކުރި ގޮތެއް ދައުލަތަށް ގާއިމްކޮށްދެވިފައި ނުވާ ކަމަށެވެ. އަދި, ޖަމީލު ފާހަގަ ކުރެއްވި ގޮތުގައި ދައުވާ ވެސް ފުރިހަމައެއް ނޫނެވެ. އެގޮތުން ދައުވާގައި ކުށް ކުރި ތަނާއި ވަގުތާއި ގޮތުގެ ތަފްސީލު ނެތް ކަމެވެ. އެހެންވެ, ޖަވާބުދާރީވާން ފުރުސަތު ހަނިވެގެން ދިޔަކަން ފާހަގަ ކުރެއްވި އެވެ.
ދެން ފާހަގަ ކުރެއްވީ ޝަރީއަތުގައި ބައެއް ލިޔުންތައް ނުލިބުނު ކަމާއި ދައުވާ ސާފުކޮށް ނުދެވުނު ކަމެވެ. އަދި, މައްސަލާގައި ނެގި ހެކިންތަކާ ގުޅޭ ޝަކުވާތައް ވެސް ހާމަ ކުރެއްވި އެވެ. އެގޮތުން ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެެ އެމްޑީ އަބްދުالله ޒިޔަތަކީ ފާސިގުން ކަމާއި އެމީހުންގެ ހެކިބަސް ބަލައިގެންފައިވަނީ ހަމަތަކުން ބޭރުން ކަމަށް ވިދާޅުވި އެވެ.
އެގޮތުން, އެ ދެ މީހުންނަކީ ފާސިގުންނަށްވާއިރު, ދައުލަތުން މަންފާތަކެއް ވެސް ލިބެމުންދާ ދެ މީހުން ކަމަށް ޖަމީލު ވިދާޅުވި އެވެ.
ޖަމީލަށްފަހު ޔާމީން ވެސް ޝަރީއަތުގައި ވާހަކަ ދެއްކެވި އެވެ. ޔާމީން ފާހަގަ ކުރެއްވީ އޭނާގެ މައްޗަށް އޮތް މައިގަނޑު ހެކި ކަމަށްވާ އޭސީސީގެ ކުރީގެ ރައީސް މުއައްވިޒު ރަޝީދާ ގުޅޭ ގޮތުންނެވެ. ޔާމީން ވިދާޅުވި ގޮތުގައި އޭނާ, އެމަނިކުފާނާ ބައްދަލުކުރެއްވި ކަމަށް ބުނާއިރު އެކަން ސާބިތުކޮށްދެވިފައިނުވާ ކަމަށެވެ.
އަދި, އޭނާއާ ބައްދަލުނުކުރާކަން ސާބިތުކުރުމަށް ރައީސް އޮފީހުގެ ލޮގްތައް ހޯދުމަށް ކުރެއްވި މަސައްކަތަށް ސަރުކާރުން އެއްބާރުލުން ނުދިންކަން ފާހަގަ ކުރެއްވި އެވެ. ޔާމީން ވިދާޅުވި ގޮތުގައި, އެމަނިކުފާނުގެ މައްޗަށް މުއައްވިޒުގެ ހެކިބަހަށް ބަލައިގެން ކުށް ސާބިތުކޮށްފައިވަނީ ގޯސްކޮށެވެ.
އިސްތިއުނާފީ 22 ނުކުތާގެ ތެރެއިން މިއަދު ޝަރީއަތަށް ހުށަހެޅުނީ ހަތް ނުކުތާ އެވެ. ދެން ހުރި ނުކުތާތައް ހުށަހެޅުމަށް މާދަމާ ހެނދުނަށް ވެސް އަޑުއެހުމެއް ވަނީ ތާވަލުކޮށްފަ އެވެ.
މައްސަލާގައި ދެ ފަރާތުން ވެސް އާ ހެކިތަކެއް ހުށަހަޅަން ބޭނުންވާ ކަމަށް ބުނެފަ އެވެ. ނަމަވެސް, ފަނޑިޔާރުން ނިންމަވާފައިވަނީ އެ ހެކިތަކާ ގުޅޭ ގޮތުން ވާހަކަ ދެއްކުމަށްފަހު, އެއީ މި މަރުހަލާގައި ނަގައި ރިއާޔަތް ކުރެވިދާނެ ހެކިތަކެއްތޯ ބެލުމަށްފަހު ހެކިބަސް ނަގަން ޖެހޭނަމަ ނެގުމަށެވެ.
ފަސް އަހަރުގެ ޖަލު ހުކުމެއްގައި ހުންނެވި ޔާމީންގެ މައްޗަށް ރ. ފުއްގިރި މައްސަލާގައި ވެސް މަނީލޯންޑްރިން އާއި ރިޝްވަތުގެ ދައުވާ އުފުލައި, ކުރިމިނަލް ކޯޓުގައި ދަނީ ޝަރީއަތް ހިންގަމުންނެވެ. އަދި, ވ. އާރަށު މައްސަލާގައި ދައުވާކުރުމަށް ވަނީ ފޮނުވާފަ އެވެ.
