ތިމާވެއްޓަށް ކުރަމުންދާ ގެއްލުމުގެ ސަބަބުން އަސަރު ކުރާ ތަރައްގީވަމުން އަންނަ ގައުމުތަކުން ދަރަނި އަދާ ކުރުމުގެ ބަދަލުގައި ތިމާވެއްޓަށް އަންނަމުންދާ ބަދަލުތަކުން ލިބޭ ގެއްލުން ކުޑަ ކުރަންޖެހިފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނިއު ޔޯކާގެ ބިލް މިކްކިބެންގެ "ކްލައިމެޓް ކްރައިސިސް" ނިއުސް ލެޓާއަށް މިދިޔަ ހަފްތާގައި ދެއްވި އިންޓަވިއުއެއްގައި ނަޝީދު ވިދާޅުވީ 2020 ވަނަ އަހަރު އަންނަންވާއިރަށް ކުރިއަރަމުން އަންނަ ގައުމުތަކަށް އެހީގެ ގޮތުގައި 100 ބިލިއަން ޑޮލަރު ދިނުމަށްވި ވައުދާ ތަރައްގީވެފައިވާ ގައުމުތަކުން ހިލާފުވެފައިވާތީ ކުރިއަރަމުން އަންނަ ގައުމުތަކުގެ ވިސްނުން ވެސް ބަދަލު ކުރަންޖެހިފައިވާ ކަމަށެވެ.
"ބޭރުގެ އެހީ ލިބުން އެހާ މަދުވެފައިވާ މި ދަނޑިވަޅުގައި، ދަރަނި އަދާ ކުރުމުގެ ބަދަލުގައި ތިމާވެއްޓަށް ލިބޭ ގެއްލުންތަކުން އެޑަޕްޓުވުމަށް ކުރަންޖެހޭ ހަރަދުތައް ކުރަން މި އޮތީ މަޖުބޫރުވެފަ. ކަން މިހެން އޮއްވާ، މިހާލަތުގައި އެޑަޕްޓޭޝަނަށް ހަރަދު ކުރުމަށް ލިބޭ ފައިސާކޮޅު ދަރަނި އަދާ ކުރުމަށް ބޭނުން ކުރުމަކީ ބަލައިގަނެވޭނެ ކަމެއް ނޫން،" ނަޝީދު ވިދާޅުވެފައިވެ އެވެ.
އެ އިންޓަވިއުގައި ނަޝީދު ވަނީ އެމަނިކުފާނު އަވަހާރަކޮށްލުމަށް މެއި 6، ގައި ދިން ހަމަލާގައި ލިބުނު ޒަހަމްތަކާ ގުޅޭ ގޮތުން ވެސް ވާހަކަ ދައްކަވައިފަ އެވެ. އެގޮތުން، ބޮމަށް އަޅާފައި ހުރި ބެއަރިން ބޯލްތަކުން ގާތްގަނޑަކަށް 25 ޒަހަމް ހަށިގަނޑަށް ލިބިވަޑައިގެންނެވި ނަމަވެސް މިހާރު ފަސޭހަވަމުންދާ ކަމަށް ނަޝީދު ވިދާޅުވި އެވެ.
"އަޅުގަނޑު ﷲ އަށް ދުއާ ކުރިން އަދި އަޅުގަނޑުގެ ފުރާނަ ނުގެންދިއުމަށް އެދި. ސަބަބަކީ އަޅުގަނޑު ހިތުން އަދި އަޅުގަނޑުގެ ހަޔާތުގައި ކުރަންޖެހޭ މަސައްކަތް އަދި ނުނިމޭ. ޑިމޮކްރަސީއަށްޓަކައި އަދި ތިމާވެއްޓަށް ކުރާ ގެއްލުމުން އަސަރު ކުރާ ކުޑަ ގައުމެއްގެ ހައިސިއްޔަތުން އަޅުގަނޑުމެން ކުރިއަށް އޮތް ތަނުގައި އެތައް މަސައްކަތްތަކެއް ކުރަންޖެހޭ،" ނަޝީދު ވިދާޅުވި އެވެ.
ރައީސް ނަޝީދު ދިރިއުޅުއްވާ ގެކޮޅު ކައިރިން ކާރަށް އަރައިވަޑައިގަންނަވަނިކޮށް ގޮއްވާލި ބޮމުގެ ސަބަބުން އެމަނިކުފާނުގެ ފުރާނަ ސަލާމަތްވީ ކިރިޔާ އެވެ. އެމަނިކުފާނަށް އަށް ދުވަހު މާލޭގެ އޭޑީކޭ ހޮސްޕިޓަލުގައި ފަރުވާ ކުރެއްވުމަށްފަހު ދެން ގެންދެވީ ޖަރުމަނަށެވެ. މިހާރު ހުންނެވީ އިނގިރޭސިވިލާތުގަ އެވެ. އަދި ގެންދަވަނީ ކްލައިމެޓް ވަލްނަރަބަލް ފޯރަމްގެ މުހިންމު ބައްދަލުވުންތަކެއްގައި ބައިވެރިވެވަޑައިގަންނަވަމުންނެވެ.
ކްލައިމެޓް ވަލްނަރަބަލް ފޯރަމް ނުވަތަ ސީވީއެފްއަކީ ތިމާވެއްޓަށް ކުރަމުންދާ ގެއްލުމުން އެންމެ ބޮޑަށް އަސަރު ކުރާ ގައުމުތަކުގެ ތެރެއިން 48 ގައުމެއް ބައިވެރިވެގެން އުފައްދާފައިވާ ބައިނަލްއަގްވާމީ ކޯލިޝަނެކެވެ. ނަޝީދަކީ ސީވީއެފްގެ އެމްބަސަޑަރެކެވެ.
