ކޮވިޑްގެ ތެރޭގައި އިގްތިސާދީ ހަރަކާތްތައް ހުއްޓުނު ވަގުތު އާއިލާތަކުގެ ފުދުންތެރިކަން ހިފަހައްޓައިދިނުމުގައި އަދި ކޮވިޑްގެ ބަލިމީހުންނަށް ފަރުވާކުރުމުގައި ދިވެހި އަންހެނުން މުހިއްމު ދައުރެއް އަދާކުރި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އަންހެނުން ކުރާ މަސައްކަތްތަކާއި ހާސިލުކޮށްފައިވާ ކާމިޔާބީތަކުގެ އަގުވަޒަންކޮށް ސަރުކާރުންދޭ ރެހެންދި އެވޯޑް ދިނުމުގެ ހަފުލާގައި ވާހަކަދައްކަވަމުން ރޭ ރައީސް ވިދާޅުވީ އަންހެނުންނަކީ ހަމައެކަނި މުޖްތަމައުގެ ދެބައިކުޅަ އެއްބައި ނޫން ކަމަށާއި އެއީ މުޅި އިންސާނިއްޔަތުގެ ވެސް ދެބައިކުޅަ އެއްބައި ކަމަށެވެ.
"އެއީ އާއިލާތައް އުފެދި ބިނާވެގެން އައުމުގެ ބިންގާ. އެއީ އަޅުގަނޑުމެންގެ އިގްތިސާދީ ޙަރަކާތުގެ ވަރަށް މުހިންމު ބައިވެރިއެއް. ކޮވިޑް-19ގެ ބަލިމަޑުކަމުގެ ތެރޭގައިވެސް، އަންހެނުންގެ ހިތްވަރާއި އަންހެނުންގެ ބާރުވެރިކަން ވަރަށް ރަނގަޅަށް ވަޒަންކުރެވިއްޖެ،" ރައީސް ވިދާޅުވި އެވެ.
ކޮވިޑްގެ ތެރޭގައި އާއިލާތަކުގެ ފުދުންތެރިކަން ހިފަހައްޓައިދިނުމުގައި، އަންހެނުން އަދާކުރީ ވަރަށް މުހިންމު ދައުރެއްކަން ފާހަގަކުރައްވައި ރައީސް ވިދާޅުވީ ގޭގައި ތިބި އަންހެނުންނާއި އަންހެންކުދިން ކުރި މަސައްކަތުން، ދުވަހުގެ ހަރަދުތައް ދެކޮޅުޖެއްސި އާއިލާތައް މަދު ނޫން ކަމަށެވެ.
މީގެ އިތުރުން ކޮވިޑްގެ ބަލިމީހުންނަށް ފަރުވާކުރުމުގައި، އާއިލާތަކާ ވަކިން، ރެޔާއި ދުވާލުގެ ހުރިހާ ވަގުތެއް ހޭދަކުރެއްވި އަންހެން ބޭފުޅުން ވަރަށް ގިނަ ކަމަށާއި އެބޭފުޅުން ގައުމަށްޓަކައި އެ ވެވަޑައިގަތީ ވަރަށް މަތިވެރި ގުރުބާނީއެއް ކަމަށް ރައީސް ވިދާޅުވި އެވެ. އަދި ކޮވިޑުން ރައްކާތެރިވުމަށް ހިންގާ ވެކްސިން ޕްރޮގްރާމްގައި ވެސް އަންހެން ބޭފުޅުންގެ ހިއްސާ ވަރަށް ބޮޑުކަން ވެސް ރައީސް ފާހަގަކުރެއްވި އެވެ.
ރައީސް ވިދާޅުވީ މިދިޔަ ދޮޅު އަހަރެއްހާ ދުވަހުގެ ތެރޭގައި އެންމެ ގިނަ ބައެއްގެ ކަންފަތުގައި ހަރުލާފައި ހުރި ނަންނަމަކީ، ޑިރެކްޓާ ޖެނެރަލް އޮފް ޕަބްލިކް ހެލްތ މައިމޫނާ އަބޫބަކުރާއި އެޗްޕީއޭގެ ސީނިއާ މެޑިކަލް އޮފިސަރު އަދި ހެލްތު އިމަޖެންސީ އޮޕަރޭޝަން ސެންޓަރުގެ ތަރުޖަމާނު ޑރ. ނަޒްލާ ރަފީގާއި ޓެކްނިކަލް އެޑްވައިޒަރީ ގްރޫޕުގެ މެމްބަރު ޑރ. ނަޒްލާ މުސްތަފާ ފަދަ ބޭބޭފުޅުންގެ ނަން ކަމަށެވެ.
"އޭގެ އިތުރުން ވެސް އެތައް އަންހެން ބޭފުޅުންނެއްގެ ނަންފުޅު، ކޮވިޑްގެ ތެރޭގައި އަޅުގަނޑުމެންނަށް އެނގިގެން ހިނގައްޖެ،" ރައީސް ވިދާޅުވި އެވެ.
"މިފަދަ ހިދުމަތްތެރި އަދި މިފަދަ އަގުހުރި ބަޔަކު، އަޅުގަނޑުމެންގެ ގައުމީ ހިދުމަތުގެ ދާއިރާގައި ބައިވެރިވާ މިންވަރު އިތުރުނުކޮށް، އަޅުގަނޑުމެންނަށް ހަގީގީ ކުރިއެރުމެއް ނުހޯދޭނެކަން ޔަގީން. އަޅުގަނޑުމެން މިކުރާ މަސައްކަތުން، މާތް ﷲގެ ވާގިފުޅާއެކު، އެކަން ހާސިލްވާނެކަމުގެ ވަރަށް ބޮޑު އުންމީދެއް އެބަ އޮތް. އެކަމަށް އިތުރު ހިތްވަރު ދިނުމަކީ ކުރަންޖެހޭ ކަމެއް."
ރައީސް ވިދާޅުވި މިހާރުވެސް ވަރަށް މަތީ މަގާމުތައް ފުރުއްވާ، ވަރަށް ހިދުމަތްތެރި ވަރަށް ގާބިލް އަންހެން ބޭފުޅުން އެބަތިއްބެވި ކަމަށާއި ސަރުކާރުގެ މަގާމެއްގައި ނޫނަސް، މުޖްތަމައަށް ވަރަށް އަގުހުރި ހިދުމަތްތަކެއް ކުރައްވާ ވަރަށް ހުނަރުވެރި އަންހެން ބޭފުޅުން އެބަތިއްބެވި ކަމަށެވެ.
"އަދި މިހާރު ފޯދެމުން އަންނަ ޒުވާން ޖީލުގައިވެސް، އެފަދަ އުންމީދީ ޒުވާން އަންހެން ބޭފުޅުންތަކެއް ތިއްބަވާނެކަން އަޅުގަނޑަށް ޔަގީން،" ރައީސް ވިދާޅުވި އެވެ.
އެކަމަކު ރައީސް ވިދާޅުވީ އެފަދަ ޒުވާނުންގެ ކުރިމަގަށް ހުރަސްއަޅާ، ކަސިޔާރު ފިކުރުތަކެއް ރާއްޖޭގައި އެބަ ދައުރުވާ ކަމަށާއި އިޖްތިމާއީ އަދި ގައުމީ ހިދުމަތަށް އަންހެނުން ނުކުތުމުން، އެކަމަށް ނުރުހުންވާ މަދު ބަޔަކު ނަމަވެސް އެބައުޅޭ ކަމަށެވެ.
"މިއިން ކޮންމެ ކަމަކީ ގާނޫނުން ހައްލުކުރެވޭނެ ކަންކަމެއް ނޫން. މިފަދަ ކަންކަން ހައްލުކުރެވޭނީ އަޅުގަނޑުމެންގެ ވިސްނުން ބަދަލުކޮށްގެން،" ރައީސް ވިދާޅުވި އެވެ.
