ވޮޝިންޓަން، އެމެރިކާ (ސެޕްޓެމްބަރު 6) - އަފްގާނިސްތާނުގައި ދާހިލީ ހަނގުރާމައެއް ފެށުމުގެ ބިރު ބޮޑު ކަމަށް އެމެރިކާގެ އެންމެ އިސް އަސްކަރީ ޖެނެރަލް ވިދާޅުވެއްޖެ އެވެ.
ވިހި އަހަރަށް ފަހު އެމެރިކާ ސިފައިން އަފްގާން ފަސްގަނޑު ދޫކޮށް ގޮސްފައި ވާއިރު، ތާލިބާނުން ވަނީ ހައިރާން ކުރުވަނިވި ގޮތަކަށް އަލުން ވެރިކަމަށް އައިސްފަ އެވެ.
"އަޅުގަނޑަށް އަސްކަރީ ގޮތުން ފެންނަނީ މިހާރު އުފެދިފައި ހުރި ހާލަތްތަކުގެ ސަބަބުން ދާހިލީ ހަނގުރާމައެއް ފެށޭނެ ކަމަށް،" ޖޮއިންޓް ޗީފް އޮފް ސްޓާފްގެ ޗެއާމަން ޖެނެރަލް މާކް މިލީ ފޮކްސް ނިއުސް އަށް ވިދާޅުވި އެވެ.
އޭނާ ވަނީ ވެރިކަމުގައި އޮތް ތާލިބާނުންނަށް އެހެން ފަރާތްތައް ބައިވެރިކޮށްގެން ސަރުކާރު ހިންގޭނެތޯ އާއި ހަރުދަނާ ވެރިކަން ކުރުމުގެ ނިޒާމެއް ގާއިމްކުރެވޭނެތޯ ސުވާލު އުފައްދާފަ އެވެ.
"އަޅުގަނޑަށް ހީވަނީ ވަރަށް ފުޅާކޮށް ދާހިލީ ހަނގުރާމައެއް ފެށުމުގެ ފުރުސަތު ބޮޑު ކަމަށް. އޭގެ ސަބަބުން އަލް ގައިދާ އަލުން ހަރަކާތްތެރިވާން ފަށާ، އައިއެސް ފަދަ އެހެން ޓެރަރިސްޓު ގްރޫޕުތަކަށް ފުރުސަތުތައް ލިބޭނެ،" އޭނާ ވިދާޅުވި އެވެ.
"އަފްގާނިސްތާނުގައި އޮތް ހާލަތަކީ ޓެރަރިޒަމް އުފެދިގެން އައިސްދާނެ ފަދަ ހާލަތެއް. ކުރިއަށް އޮތް 12 މަހާއި 36 މަހާ ދެމެދުގެ މުއްދަތެއްގެ ތެރޭގައި އެފަދަ ކަންކަން ފެންނަން ފަށާނެ."
މީގެ ވިހި އަހަރު ކުރިން އެމެރިކާ އިން އަފްގާނިސްތާނަށް އެރީ ވެސް ސެޕްޓެމްބަރު 11، 2001 ގައި އަލް ގައިދާ އިން ހިންގި ޓެރަރިޒަމްގެ އަމަލުތަކާ ގުޅިގެންނެވެ.
އޭރު އަލް ގައިދާ މިނިވަންކަމާއެކު އަފްގާނިސްތާނުގައި ހަރަކާތްތެރިވަމުން ދިޔައިރު، އެމެރިކާ އިން ތާލިބާން ސަރުކާރު ވައްޓާލީ އަލް ގައިދާއަށް ރައްކާތެރިކަން ދޭ ކަމަށް ބުނެ އެވެ.
ހުޅަނގުގެ ގައުމުތަކުން މިހާރު އެންމެ ބޮޑަށް ބިރު ގަންނަނީ އެ ގައުމުތަކަށް ޓެރަރިސްޓު ހަމަލާ ދޭން ޓެރަރިސްޓުން ތަމްރީން ކުރާ މަރުކަޒުތައް އަފްގާނިސްތާނުގައި އުފެދިދާނެތީ އެވެ.
