ހދ. ނޮޅިވަރަމްގައި ކޮވިޑްގެ ކޭސްތައް އިތުރުވެފައިވީ ނަމަވެސް, ރަށުގެ އާންމު ހާލަތު ގޯސް ނޫން ކަމަށް އެ ރަށު ކައުންސިލުން ބުނެފި އެވެ.
މިދިޔަ މަހުގެ 21 ވަނަ ދުވަހު ފުރަތަމަ ފަހަރަށް މޮނީޓަރިންގެ ހާލަތަށް ގެނައި ނޮޅިވަރަމުން 150 މީހުން މިވަގުތު ކޮވިޑް ބަލީގައި އެބަ ތިއްބެވެ. އަދި, 124 ގެއެއް ކަރަންޓީނު ކޮށްފައިވެ އެވެ.
ކޮވިޑް ޕޮޒިޓިވްވި މީހުންގެ އަދަދު ނޮޅިވަރަމްގައި މަތީގައި ހުރި ނަމަވެސް, ކުރިއަށް އޮތް ތަނުގައި ބަލި ޖެހޭ މީހުންގެ މިންވަރު މަދުވަމުންދާނެ ކަމަށް އެ ރަށު ކައުންސިލުން ގަބޫލު ކުރެ އެވެ.
"ޕޮޒިޓިވްވި ރޭޓް މަތިވެގެން މިދިޔައީ ކޮންޓެކްޓުންގެ ގޮތުގައި ފާހަގަވި މީހުންނަށް ބަލި ޖެހިފައިވުމުން, ރެންޑަމް ސާމްޕަލްތައް ޕޮޒިޓިވްވަމުން ނުދޭ," ކައުންސިލްގެ ރައީސް ޔޫސުފް މޫސާ "އަދަދު"އަށް ވިދާޅުވި އެވެ.
އޭނާ ވިދާޅުވި ގޮތުގައި, ރަށުގައި ކޮވިޑް ފެތުރިގެން ދިޔައީ ކުޑަކުދިންގެ ގުރުއާން ކްލާހަކުންނެވެ. އެހެންވެ, ބަލި ޕްރީސްކޫލަށާއި ސްކޫލަށް ވެސް ފެތުރި, ހާލަތު ގޯސްވެގެން ދިޔައީ ކަމަށެވެ.
ރަށުގައި މިވަގުތު 150 މީހުން ބަލީގައި ތިބިއިރު, ހާލަތު ގޯސްވީ އެންމެ މީހެއްގެ އެވެ. އެއީ ހައިރިސްކްގެ މީހަކަށްވާތީ މިހާރު ވަނީ ށ. ފުނަދޫގެ ކޮވިޑް ފެސިލިޓީއަށް ބަދަލުކޮށްފަ އެވެ. އެހެން މީހުންގެ ހާލަތު ގޯހެއް ނޫނެވެ.
ރަށުގެ ސިއްހީ މަރުކަޒުން ބަލި ޖެހޭ މީހުންނަށް ފަރުވާ ފޯރުކޮށްދެމުން އަންނައިރު, ވަސީލަތްތައް މަދުވުމަކީ ކައުންސިލްގެ ކަންބޮޑުވުމެކެވެ. ޔޫސުފް ވިދާޅުވި ގޮތުގައި, ސިއްހީ މަރުކަޒުގައި އިންސާނީ ވަސީލަތް ވެސް މަދެވެ. އަދި, ބޭސް ލިބުމުގައި ވެސް ދަތިތަކެއް އެބަ ހުއްޓެވެ.
އެހެންނަމަވެސް, ހުރި ވަސީލަތްތަކުން ރަށުގެ އިދާރާތަކުން ކޮވިޑް މެނޭޖްކުރުމުގެ މަސައްކަތް ކުރަމުންދާކަން އޭނާ ފާހަގަ ކުރެއްވި އެވެ.
ޔޫސުފް ވިދާޅުވީ ބަލީގައި ގިނަ ބަޔަކު ތިބުމުން އޭގެ ހިތާމަ އެބަ އޮތް ކަމަށާއި ނަމަވެސް, ރަށުގެ އާންމު ހާލަތު ގޯސް ނޫން ކަމަށެވެ.
ރަށަށް އަރާފޭބުން މަނާކޮށްފައިވާއިރު, ކުޅުދުއްފުށީ ސިޓީގެ ދެ ވިޔަފާރިއަކު މިފަހުން ވަނީ އެ ރަށަށް މަސް ވެސް ހަދިޔާކޮށްފަ އެވެ. އެ މަސްތައް ރައްޔިތުންގެ މެދުގައި ހަމަހަމަކޮށް ބެހި އެވެ.
ނޮޅިވަރަމަކީ ކުޅުދުއްފުށީ ސިޓީއަށްފަހު, ހދ. އަތޮޅުގެ އެންމެ އާބާދީ ބޮޑު ރަށެވެ. އެންމެފަހުގެ ތަފާސްހިސާބުތައް ދައްކާ ގޮތުން އެ ރަށުގެ އާބާދީއަކީ 2774 މީހުންނެވެ.
ޔޫސުފް ވިދާޅުވި ގޮތުގައި, ރަށުގެ އާބާދީއާ ބަލާއިރު އެ ރަށުގެ ވަސީލަތްތައް މަދެވެ. ސަރުކާރުން ހިދުމަތް ފޯރުކޮށްދިނުމުގައި އާބާދީއަށް ނުބަލާ ކަމާއި ރަށްރަށާ މެދު ތަފާތުކުރުންތައް ގެންގުޅޭ ކަމުގެ ކަންބޮޑުވުން ޔޫސުފްގެ އޮތެވެ.
"ލައްގާ ހުރައަށް އެއްޗެހި ލައްވާ އުސޫލުން ރަށަށް ކަމެއް މިކޮށްދެނީ," ޔޫސުފް ވިދާޅުވި އެވެ.
"މެނޭޖްކުރެވުނު ގޮތް ރަނގަޅު"
ވަސީލަތްތައް މަދުއިރު ވެސް, މިވީހާ ތަނަށް ކޮވިޑްގެ ތެރޭ ކައުންސިލަށް ކުރެވުނު މަސައްކަތް ރަނގަޅު ކަމަށް ޔޫސުފް ގަބޫލު ކުރައްވަ އެވެ. އެއީ, ރާއްޖޭގައި ކޮވިޑް ފެތުރުނު ފަހުން ވެސް އަހަރަކަށްވުރެ ގިނަ ދުވަސްވެފައިވާއިރު, ނޮޅިވަރަމް މޮނީޓަރިންއަށް ލާން ޖެހުނު ފުރަތަމަ ފަހަރު ކަމަށްވުމުންނެވެ.
"ނޮޅިވަރަމް މީހުންނަކީ ކަންމަތީ ފިހާރައަށް ދާ އުސޫލުން ކުޅުދުއްފުއްޓަށް ދާން ޖެހޭ ބައެއް, އެ ސިޓީ ތިން ފަހަރަށް މޮނީޓަރިން ހާލަތަށް ގެންދިޔަ, ނަމަވެސް މި ރަށަށް ކޮވިޑް ނައިސް ހިފެހެއްޓުނު," ޔޫސުފް ވިދާޅުވި އެވެ.
އަދި, އެ ހާލަތުގައި ރައްޔިތުންނަށް ކުޅުދުއްފުއްޓަށް ދެވޭނެ ހުއްދަ ދޫކުރުމާއި މުދާ ގެނެވޭނެ އިންތިޒާމްތައް ހަމަޖައްސައިދިނުން ފަދަ ކަންކަން ވަރަށް ބޮޑަށް ރޭވިގެން ކައުންސިލުން ކުރިކަން ޔޫސުފް ފާހަގަ ކުރެއްވި އެވެ.
"އެހެންވެ, މިހާތަނަށް ވެސް ކޮވިޑްގައި މި ރަށުގެ އިދާރާތަކަށް ކުރެވުނު މަސައްކަތްތައް ރަނގަޅު ކަމަށް ގަބޫލު ކުރެވޭ," ޔޫސުފް ވިދާޅުވި އެވެ.
