ކާބުލް، އަފްގާނިސްތާން (ސެޕްޓެމްބަރު 2) - ހައިރާން ކުރުވަނިވި ގޮތަކަށް ކުޑަ ދުވަސްކޮޅެއްގެ ތެރޭގައި އަފްގާނިސްތާން ހިފައި ވެރިކަމަށް އައި ތާލިބާނުންނަށް ލިބުނު ހަތިޔާރު ދައްކާލުމަށް ބޮޑު ޕެރޭޑެއް ބާއްވައިފި އެވެ.
ބުދަ ދުވަހު ޕެރޭޑް ކުރިއަށް ދިޔައިރު، އެމެރިކާ އިން އަފްގާން ފަސްގަނޑު ދޫކޮށް ދިޔަ ފަހުން ފުރަތަމަ ފަހަރަށް ކާބުލް އެއާޕޯޓަށް ވަނީ ފްލައިޓެއް ޖައްސާފަ އެވެ. ގަތަރު އެއާވޭޒް ފްލައިޓުގައި އަފްގާނަށް ދިޔައީ އެއާޕޯޓުގައި މަސައްކަތް ކުރާނެ ޓެކްނީޝަނުންގެ ޓީމެކެވެ.
އެއާޕޯޓު އޮޕަރޭޓް ކުރާނެ ބަޔަކު ނިންމުމާ ގުޅޭ މަޝްވަރާތައް ދަނީ ކުރިއަށެވެ. ހަނގުރާމަވެރި ގްރޫޕެއްގެ ގޮތުގައި 20 އަހަރު ހޭދަ ކުރުމަށް ފަހު ވެރިކަން ހިންގަން ހަވާލުވުމާއެކު ތާލިބާނުންނަށް ކުރިމަތިވެފައިވާ އެންމެ ބޮޑު އެއް މަސައްކަތަކީ އެއާޕޯޓުގެ މަސައްކަތެވެ.
ވިހި އަހަރަށް ފަހު އެމެރިކާގެ އެންމެ ފަހު ފައުޖު އަފްގާން ފަސްގަނޑުން ފުރީ އޯގަސްޓު 30 ވަނަ ދުވަހު އެވެ. އެއާއެކު ތާލިބާނުން އުފާ ފާޅުކުރުމުގެ ގޮތުން ކާބުލް އެއާޕޯޓަށް ވަދެ، ހަވާ އަރުވާފައި ވެ އެވެ. ބުދަ ދުވަހު ބޭއްވި ޕެރޭޑުގައި ދައްކާލީ ބަރު ހަތިޔާރާއި އަސްކަރީ އުޅަނދުތަކެވެ.
ތާލިބާނުންގެ ހުދު ދިދަ ހިފައިގެން އުޅަނދުތަކުގައި ހަނގުރާމަވެރިން ދަތުރު ކުރިއިރު، މަތިން ހެލިކޮޕްޓަރެއް ވެސް ދިޔަ އެވެ. ޕެރޭޑުގެ ތެރެއިން ތާލިބާނުންގެ އެންމެ އިސް ލީޑަރު ހިބާތުﷲ އަހުންދްޒާދާ އާއްމުންނަށް ފެންނާނެ ކަމަށް އަޑު ފެތުރުނެވެ. ނަމަވެސް އޭނާގެ ބަދަލުގައި އާއްމުންނާ މުހާތަބުކޮށް ވާހަކަދެއްކީ ކާބުލްގެ އާ ގަވަރުނަރެވެ.
ފަސޭހަކަމާ އެކި އަފްގާނިސްތާނުގެ ކޮންޓްރޯލް ހޯދި ތާލިބާނުންނަށް ވަނީ އަފްގާން ސިފައިންގެ އަތުގައި ހުރި ގިނަ އަދަދެއްގެ ހަތިޔާރާއި، ވަޒަން އަދި އެހެނިހެން އަސްކަރީ ތަކެތި ލިބިފަ އެވެ. އޭގެ ތެރެއިން ގިނަ ތަކެއްޗަކީ ފާއިތުވި 20 އަހަރު އެމެރިކާ ސިފައިން އަފްގާން ފަސްގަނޑުގައި ތިބިއިރު ހަދިޔާކުރި ތަކެއްޗެވެ.
ރަސްމީ ތަފާސްހިސާބުތައް ދައްކާ ގޮތުން އެމެރިކާ އަސްކަރިއްޔާ އިން އަފްގާން ސިފައިންނަށް 7،000 އަށް ވުރެ ގިނަ މެޝިން ބަޑި އާއި، 4،700 ހަމްވީޒް އާދި 20،000 ގްރެނޭޑް ފާއިތުވި ކުޑަ ދުވަސްކޮޅެއްގެ ތެރޭގައި ސަޕްލައިކޮށްފަ އެވެ.
ތާލިބާނުންގެ ދިދަ ހިފައިގެން ހެލިކޮޕްޓަރެއް ދަތުރު ކުރަނީ.-- ފޮޓޯ: އޭއެފްޕީ
އޭގެ އިތުރުން ގިނަ އަދަދެއްގެ ވަޒަނާއި ޑްރޯން އަދި ޖެޓާއި ހެލިކޮޕްޓަރު ހިމެނޭހެން 200 އަށް ވުރެ ގިނަ ވައިގެ އުޅަނދު ވެސް ސަޕްލައި ކުރި އެވެ.
