ބައިނަލްއަގުވާމީ ލެވަލްގައި ރާއްޖެ ތަމްސީލްކޮށްފައިވާ އަންހެން ބެޑްމިންޓަން ކުޅުންތެރިޔާ އައިޝަތު އަފްނާން ރަޝީދު، "އަފްނާން ރަޝީދު ބެޑްމިންޓަން އެކަޑަމީ (އޭއާރްބީއޭ)" އިން ވާދަވެރި ރޫހެއްގައި ވެސް ކުޅުންތެރިން ޑިވެލޮޕްކުރުމުގެ އަމާޒުގައި ފުރަތަމަ މުބާރާތް ބާއްވައިފި އެވެ.
މި އަހަރު މާޗް އެއް ވަނަ ދުވަހު ކޮމިޝަނާ އޮފް ސްޕޯޓްސްގައި ރަޖިސްޓްރީ ކޮށްގެން ކުރިއަށްގެންދާ އަފްނާން އެކެޑަމީގެ ފުރަތަމަ މުބާރާތް އިއްޔެ ވަނީ ހުޅުމާލޭ ބެޑްމިންޓަން ކޯޓުގައި ކުރިއަށް ގެންގޮސްފަ އެވެ. މި މުބާރާތުގައި ވާދަކުރީ ސިލެކްޝަނެއްގެ ތެރެއިން ހޮވާލެވުނު 12 ކުދިންނެވެ. ސިލެކްޝަނުގައި އެކެޑަމީގެ 30 ވަރަކަށް ކުޅުންތެރިން ބައިވެރިވި އެވެ.
އަފްނާން ބުނީ މި ގޮތަށް މުބާރާތް ބޭއްވުމުގެ އެންމެ ބޮޑު މަގުސަދަކީ ކުދިން މޯޓިވޭޓް ކުރުމާއި މުބާރާތްތަކުގެ މާހައުލަށް ކުޅުންތެރިން ހޭނުވުން ކަމަށެވެ. އެކެޑަމީގައި ޕްރެކްޓިސް ކުރަމުންދާތާ ވަރަށް ގިނަ ދުވަސްވެފައިވާއިރު، ކުޅުންތެރިން މޯޓިވޭޓް ކުރެވޭނެ އެންމެ ރަނގަޅު ގޮތަކީ މުބާރާތެއް އިންތިޒާމް ކޮށްގެން ރޭވުމެއްގެ ތެރެއިން ކުރިއަށް ދިއުން ކަމަށް ފެންނާތީ އެ ގޮތަށް ކުރިއަށްދިޔައީ ކަމަށް އަފްނާން ވަނީ ބުނެފަ އެވެ.
"މިހާރު ވެސް މުބާރާތް ތެރޭގައި ވެސް އެ އަހަނީ ދެން އޮތީ ކޮން އިރަކުހޭ މުބާރާތް. އިރާދަކުރެއްވިއްޔާ އަހަރު ނިމުމުގެ ކުރިން އިތުރު މުބާރާތެއް ބާއްވާނަން. އިތުރަށް ވެސް ކުދިންތައް ލައިގެން އަޅުގަނޑުމެން ކުރިއަށްގެންދާނީ،" އަފްނާން ބުންޏެވެ.
އަފްނާން އިންޓަވިއު ދެނީ: ކުދިންގެ ފަރާތުން ފެނުނު ކަންތައްތަކާ މެދު ހިތްހަމަޖެހޭ ކަމަށް ވަނީ ބުނެފައި.-- ފޮޓޯ: ހުސެއިން ޝަޔާހު/ އަދަދު
ފުރަތަމަ މުބާރާތާ އެކު ވެސް އެކެޑަމީގައި ތިބި ކުދިންނަށަް މުބާރާތުގައި ވާދަކުރުމުގެ ތަޖުރިބާއާ ބެހޭގޮތުން ކަންތައްތަކެއް ދަސްވެގެންދާނެ ކަމަށް އަފްނާން ގަބޫލުކުރެ އެވެ. ހަމައެކަނި ޕްރެކްޓިސް ކޮށްލައިގެން ކުޅުންތެރިން ޑިވެލޮޕްކުރަން އުޅުމަކީ މީގެ ނަތީޖާ ނެރެން ބަލާއިރު އުނދަގޫވާނެ ކަމެއް ކަމަށާއި މުބާރާތުގައި ވާދަކުރުމުގައި އެ އިންނަ ބިރު ވީހާވެސް އަވަހަށް ކަނޑުވާލުމަކީ މުހިއްމު ކަމެއްގެ ގޮތުގައި އަފްނާން ވަނީ ފާހަގަކޮށްފަ އެވެ.
"ޕްރެކްޓިސް އަށް އައިސް ލިބޭ އެއް ގަޑިއިރުގެ ޕްރެކްޓިހަށް ވުރެ މިހާރު އެ ކުދިންނަށް އެނގޭނެ މުބާރާތް ދާ ގޮތް. ދެން މެޗުތަކުގައި ހުންނަ ސީރިއަސްކަން ވެސް ދަސްވެފައި އިންނާނެ. އެއީ އަސްލު ބޭނުންވާ ކަމަކީ. މުބާރާތުގެ ބިރު ދޫކޮށްލަން ޖެހޭ،" ކުޅުމުގެ ކެރިއަރު ކުރިއަށް ގެންދަމުން ވެސް 2012 ވަނަ އަހަރުން ފެށިގެން ބެޑްމިންޓަން ކޯޗިންގެ އެކިއެކި މަސައްކަތް ކުރަމުން އަންނަ އަފްނާން ބުންޏެވެ.
"އެންމެ ބޮޑު ބޭނުމަކީ މި ކުޅުންތެރިން (އެކެޑަމީ ކުޅުންތެރިން) ނެޝަނަލްސްއާ ހިސާބަށް ގެންދިއުން. އަފްނާން އެކެޑަމީން ނެޝަނަލް ޗެމްޕިއަން ނަގާތަން ދެކެން އެންމެ ބޭނުމީ. ޕްލޭން ކުރާނަން ބޭރަށް ވެސް މުބާރާތަށް ކުދިން ގެންދަން،"
އަފްނާން ބުނީ ކުޅިވަރުގެ ތެރެއިން ރަނގަޅު ޖީލެއް ބިނާކުރުމުގެ އަމާޒުގައި އޭނާ ކުރާ ކަންތައްތަކުގައި ބެލެނިވެރިންނާއި އާއިލާގެ ސަޕޯޓް ނުލިބޭނަމަ މިކަން އެންމެ ރަނގަޅަށް ކުރިއަށް ނުގެންދެވޭނެ ކަމަށެވެ. އަދި ހުރިހާ ފަރާތްތަކުން ދޭ އެއްބާރުލުމަށް އަފްނާން ވަނީ ޝުކުރު އަދާކޮށްފަ އެވެ.
