ކާބުލް، އަފްގާނިސްތާން (އޯގަސްޓު 31) - ވިހި އަހަރަށް ފަހު އެމެރިކާ ސިފައިން އަފްގާނިސްތާނުގެ ފަސްގަނޑު ދޫކޮށް ދިޔުމުން ތާލިބާނުން އުފާ ފާޅުކުރަމުން އެބަ ދެ އެވެ.
މީހުން ފުރުވާލުމުގެ އޮޕަރޭޝަނުގައި ކާބުލް އެއާޕޯޓުގައި ތިބި އެމެރިކާގެ އެންމެ ފަހު ހަ ހާސް ސިފައިން ފުރާފައި ވަނީ ރޭ ދަންވަރު އެވެ. އެމެރިކާ އިން ކަނޑައެޅި ސުންގަޑިއަކީ އޯގަސްޓު 31 އެވެ.
އެމެރިކާ ސިފައިން ފުރުމާއެކު ތާލިބާން ހަނގުރާމަވެރިން ވަނީ އެއާޕޯޓުގެ ތެރެއަށް ވަދެ، އުފާ ފާޅުކުރުމުގެ ގޮތުން ވައިގެ ތެރެއަށް ބަޑި ޖަހާފަ އެވެ.
"އަފްގާނިސްތާނަށް މަރުހަބާ... މި ނަސްރު ހައްގު ވަނީ އެންމެންނަށް،" ތާލިބާނުންގެ ތަރުޖަމާނު ޒަބީހުﷲ މުޖާހިދު އެއާޕޯޓުގެ ރަންވޭގައި ހުރެ ނޫސްވެރިންނަށް ބުންޏެވެ.
އޭނާ ބުނީ ތާލިބާނުންނަށް ކުރި ލިބުމަކީ "ގައުމުތަކަށް އަރައިގަންނަ ފަރާތްތަކެއް އިބުރަތެއް" ކަމަށެވެ.
ތާލިބާނުން ބުނެފައި ވަނީ މި ފަހަރު ވެރިކަން ކުރާނީ އަންހެނުންނާއި އަންހެން ކުދިންގެ ހައްގުތަކަށް އިހްތިރާމުކޮށްގެން ކަމަށާއި އެމެރިކާ އާއި އެހެން ގައުމުތަކާ އެކު ރަނގަޅު ގުޅުމެއް ބޭއްވޭތޯ ބަލާނެ ކަމަށެވެ.
"ހުރިހާ ގައުމުތަކާ އެކު ވެސް ރަނގަޅު ޑިޕްލޮމެޓިކް ގުޅުމެއް ބާއްވަން އަޅުގަނޑު މަރުހަބާ ކިޔަން،" މުޖާހިދު ބުންޏެވެ.
ތާލިބާނުން 1996 އިން 2001 އަށް ވެރިކަން ކުރިއިރު އަމަލު ކުރި ގޮތްތަކާ މެދު އަފްގާނިސްތާނުގެ ގިނަ ބަޔަކު ކަންބޮޑުވެ އެވެ. އެހެންވެ، ބޭރުގެ ފްލައިޓުތަކުގައި 123،000 އަށް ވުރެ ގިނަ މީހުން ވަނީ ގައުމުން ފުރާފަ އެވެ.
އެމެރިކާ އިން ކަނޑައެޅި ސުންގަޑި ހަމަވުމުގެ ކުރިން ސިފައިން ގައުމަށް ގެންގޮސްފައި ވާއިރު، އިސްލާމިކް ސްޓޭޓް (އައިއެސް) ގެ ނުރައްކާ އޮތްތާ ދުވަސްތަކެއް ވެއްޖެ އެވެ.
އަފްގާނިސްތާނުގައި ހޭދަކުރި 20 އަހަރުގެ ތެރޭގައި އެމެރިކާ ސިފައިންގެ 2،400 މީހުން މަރުވިއިރު، މިދިޔަ ބުރާސްފަތި ދުވަހު އައިއެސް އިން އެއާޕޯޓު ބޭރުގައި ދިން ހަމަލާގައި 13 ސިފައިން މަރުވި އެވެ.
