ކިންގް ސަލްމާން މިސްކިތް އަންނަ އަހަރު ރޯދަ މަސް އައުމުގެ ކުރިން ހުޅުވާނެ ކަމުގެ ޔަގީންކަން ސައުދީ ވަފުދުން ދެއްވާފައިވާ ކަމަށް އިސްލާމިކް މިނިސްޓްރީން ބުނެފި އެވެ.
ކުރީގެ ސަރުކާރުގައި ފެށި މިސްކިތް ނުހުޅުވި ލަސްވެފައިވާތީ ފާޑުކިއުން ވަނީ އަމާޒުވެފަ އެވެ. މި އަހަރު ރޯދައަށް ވަގުތީ ގޮތުން މިސްކިތް ހުޅުވާލަން ނިންމި ނަމަވެސް ކޮވިޑްގެ ހާލަތު މާލޭގައި ގޯސްވެފައިވާތީ ހުޅުވާފައެއް ނުވެ އެވެ.
މިސްކިތް ހުޅުވާނެ ތާރީހެއް ކަނޑައެޅުމަށް ސައުދީގެ ވަފުދު ރާއްޖެ އައީ މިދިޔަ އާދިއްތަ ދުވަހު އެވެ.
އިސްލާމިކް މިނިސްޓަރު ޑރ. އަހުމަދު ޒާހިރު "އަދަދު" އަަށް ވިދާޅުވީ މިސްކިތް ހުޅުވާނެ ތާރީހެއް ކަނޑައެޅުމާށް އިއްޔެ މަޝްވަރާތައް ކުރެވިފައިވާ ކަމަށެވެ. ސަރުކާރުން ވީހާވެސް އަވަހަކަށް ހުޅުވަން ބޭނުންވާތީ މިހާރު ދީފައިވާ މުއްދަތައްވުރެ އަވަސް ކުރުމަށް މަޝްވަރާތައް ކުރެވެމުންދާ ކަމަށް މިނިސްޓަރު ވިދާޅުވި އެވެ.
އެ މަޝްވަރާގެ ބައްދަލުވުމުގައި އިސްލާމިކް މިނިސްޓްރީގެ އިތުރުން ފޮރިން މިނިސްޓްރީއާއި ޕްލޭނިން މިނިސްޓްރީން ވެސް ބައިވެރި ވެފައިވެ އެވެ.
"ސަރުކާރުން ބޭނުން ވަނީ ވީހާވެސް އަވަހަކަށް ހުޅުވަން. ބައެއް ކަންކަން އަދި ކުރަން ހުރީމަ، އެންމެ ލަސްވެގެން ރޯދައިގެ ކުރިން ހުޅުވާނެ ކަމުގެ ޔަގީންކަން އެ ބޭފުޅުން ވަނީ ދެއްވާފައި،" މިނިސްޓަރު ވިދާޅުވި އެވެ.
މީގެ އިތުރުން އެ ބައްދަލުވުމުގައި ވަނީ އެ ތަނަށް ބޭނުންވާ ސާމާނުތައް ހޯދުމަށް ކުރަން ޖެހޭ މަސައްކަތްތައް ކުރުމާ ގުޅޭގޮތުންވެސް މަޝަވަރާ ކުރެއްވި ކަމަށް މިނިސްޓަރު ވިދާޅުވި އެވެ. މ
މިސްކިތަށް މިވަގުތައް ބޭނުންވާ މުވައްޒަފުން ނެގުމުގެ މަސައްކަތް އިސްލާމިކް މިނިސްޓްރީން ކުރިއަށް ގެންދާއިރު އޭގެ ތެރޭގައި ހިމެނެނީ އެތަން ފޮޅާ ސާފު ކުރާނެ މަސައްކަތު މީހުންނާއި ތަން ބަލަހައްޓަނެ މީހުންނެވެ.
ކިންގް ސަލްމާން މިސްކިތަކީ ސައޫދީ ރަސްގެފާނުގެ އެހީގައި އިމާރާތްކޮށްފައިވާ މިސްކިތެކެވެ.
އެ މިސްކިތުގެ މަސައްކަތް ކުރަން ހަވާލުކުރީ ތުރުކީގެ ޓާމެކްސް ކުންފުންޏާ އެވެ. އެ ކުންފުންޏާ އެކު ކުރީ ސަރުކާރުން އެއްބަސްވުމުގައި ސޮއިކުރީ ފެބްރުއަރީ 28، 2017ގަ އެވެ.
އެ މިސްކިތުގައި އަރާފޭބުމަށް ލިފުޓު ހަރުކޮށްފައިވާއިރު އެއްފަހަރާ 10،000 މީހުންނަށް ނަމާދުކުރެވޭނެ އެވެ. ލައިބްރަރީއަކާއި ކްލާސްރޫމްތަކުގެ އިތުރުން ސެމިނާ ރޫމްތައް ވެސް މި މިސްކިތުގައި ހުންނާނެ އެވެ.
