ކާބުލް، އަފްގާނިސްތާން (އޯގަސްޓު 30) - އަފްގާނިސްތާނުން މީހުން ފުރުވާލުމުގެ އޮޕަރޭޝަން ނިންމަން ޖެހޭ ސުންގަޑި ގާތްވަމުން ދާ ވަރަކަށް ކާބުލް އެއާޕޯޓަށް އަނެއްކާވެސް ޓެރަރިސްޓު ހަމަލާއެއް އަތުވެދާނެކަމުގެ ބިރަށް އެމެރިކާ އިން ރޮކެޓު ހަމަލާ ފޮނުވަން ފަށައިފި އެވެ.
އަފްގާނިސްތާނުގައި ތިބި އެމެރިކާ ސިފައިންނާއި ރައްޔިތުން އަނބުރާ ގައުމަށް ގެންދަން ރައީސް ޖޯ ބައިޑެން ކަނޑައެޅުއްވި ސުންގަޑިއަކީ އޯގަސްޓު 31 އެވެ. ސެޕްޓެމްބަރު 11، 2001 ގެ ހަމަލާއަށް ފަހު އެމެރިކާ ސިފައިން ވަނީ 20 އަހަރު އަފްގާނިސްތާނުގެ ފަސްގަނޑުގައި މަޑުކޮށްފަ އެވެ.
އޭރު އެމެރިކާ އިން އަފްގާނިސްތާނަށް އަރައި ތާލިބާނުންގެ ވެރިކަން ވައްޓާލި އެވެ. ނަމަވެސް މީގެ ދެ ހަފްތާ ކުރިން ތާލިބާނުން ވަނީ ހައިރާން ކުރުވަނިވި ގޮތަކަށް އަލުން ވެރިކަމަށް އައިސްފަ އެވެ. އެއާއެކު އެތައް ހާސް ބަޔަކު ވަނީ ގައުމުން ފުރަން ބޭނުންވެ ކާބުލް އެއާޕޯޓަށް ޖަމާވެފަ އެވެ.
އެމެރިކާގެ ފްލައިޓުތަކުގައި މިހާތަނަށް 114،000 އަށް ވުރެ ގިނަ މީހުން ފުރާފައި ވާއިރު، އޭގެ ތެރޭގައި ގިނައިން ހިމެނެނީ އަފްގާން ރައްޔިތުންނެވެ. އެމެރިކާގެ އެންމެ ފަހު ފްލައިޓު ކާބުލް އެއާޕޯޓުން ފުރާނީ މާދަމާ އެވެ. އޭގެ ފަހުން އެމެރިކާގެ އެހީގައި އަފްގާނިސްތާނުން ފުރުމުގެ ދޮރު ބަންދުވާނެ އެވެ.
ގިނަ އަފްގާން ރައްޔިތުން ފުރަން ބޭނުންވި ނަމަވެސް، އެމެރިކާ އިން މި ވަގުތު އިސްކަން ދެނީ އެ ގައުމުގެ ރައްޔިތުންނަށެވެ. އެގޮތުން އެމެރިކާ ސިފައިންނާއި ޑިޕްލޮމެޓުން ރައްކާތެރިކަމާ އެކު ފުރުވާލެވޭތޯ ދަނީ މަސައްކަތް ކުރަމުންނެވެ.
މީހުން ފުރުވާލުމުގެ އޮޕަރޭޝަނަށް އޮތް އެންމެ ބޮޑު ނުރައްކަލަކީ ތާލިބާނުންނާ ވާދަވެރި އިސްލާމިކް ސްޓޭޓް (އައިއެސް) ގްރޫޕެވެ. މިދިޔަ ބުރާސްފަތި ދުވަހު ކާބުލް އެއާޕޯޓު ބޭރުގައި ބޮން ގޮއްވައިގެން އައިއެސް އިން ވަނީ 100 އަށް ވުރެ ގިނަ މީހުން މަރާލާފަ އެވެ. އޭގެ ތެރޭގައި އެމެރިކާ ސިފައިންގެ 13 މީހުން ހިމެނެ އެވެ.
ބައިޑެން އިންޒާރު ދެއްވާފައިވާ ގޮތުން އިތުރު ހަމަލާތައް އައުން ވަރަށް ބޮޑަށް އެކަށީގެންވެ އެވެ. އެމެރިކާ އިން ބުނީ ގޮވާ ޒާތުގެ ތަކެތި ހަރުކޮށްފައި ކާބުލްގައި އޮތް އުޅަނދަކަށް އާދީއްތަ ދުވަހުގެ ރޭ ވައިގެ ހަމަލާއެއް ދީ ހުއްޓުވާފައިވާ ކަމަށެވެ.
އެއަށްފަހު މިއަދު ހެނދުނު ކާބުލްގެ މަތިން ރޮކެޓު ހަމަލާތައް ދަތުރު ކުރަމުންދާ އަޑު އިވެމުންދާ ކަމަށް އެ ތަނުގައި ތިބި އޭއެފްޕީގެ ނޫސްވެރިން ވަނީ ބުނެފަ އެވެ.
އެއާޕޯޓު ކައިރީގައި ދިރިއުޅޭ ބައެއް މީހުން ބުނެފައި ވަނީ މިސައިލް ޑިފެންސިވް ސިސްޓަމް އެކްޓިވޭޓް ކުރި އަޑު މިއަދު ހެނދުނު އިވުނު ކަމަށެވެ.
އޭގެ އިތުރުން އެއާޕޯޓު ކައިރިން ދުން އަރާ މަންޒަރު ވެސް އާއްމުންނަށް ފެނިފައި ވެ އެވެ.
އާދީއްތަ ދުވަހުގެ ރޭ އެމެރިކާ އިން ދިން ވައިގެ ހަމަލާއާ ގުޅޭ ގޮތުން ތާލިބާނުންގެ ތަރުޖަމާނަކު ބުނީ ގޮވާ ޒާތުގެ ތަކެތި ހަރުކޮށްފައި އޮތް ކާރެއް އެއާޕޯޓަށް ދަތުރު ކުރަމުން ދަނިކޮށް، އެ ކާރު ގޮއްވާލާފައިވާ ކަމަށެވެ. އެމެރިކާގެ ދެ ވަނަ ހަމަލާއެއް ކައިރީގައި ހުރި ގެޔަކަށް އަމާޒުވި ކަމަށް ވެސް އޭނާ ބުންޏެވެ.
އެމެރިކާގެ ތާރީހުގައި މިހާތަނަށް ހިންގި އެންމެ ދިގު ހަނގުރާމައިގައި އަފްގާނިސްތާނަށް ދީފައިވާ ވައިގެ ހަމަލާތަކުގައި އެތައް ހާސް އާއްމުންނެއް މަރުވެފައިވާ ކަމަށް ތުހުމަތު ކުރެވެ އެވެ. އެމެރިކާ އާއި އެމެރިކާ އިން ތާއީދު ކުރި އަފްގާން ސަރުކާރަށް އާއްމުންގެ ތާއީދު ގެއްލުނު އެއް ސަބަބަކީ އެއީ އެވެ.
"މިއަދު [އާދީއްތަ ދުވަހު] ކާބުލްގެ އުޅަނދަކަށް ދިން ވައިގެ ހަމަލާގައި އާއްމުންގެ ބަޔަކު މަރުވިކަމުގެ ރިޕޯޓު ލިބިފައިވޭ،" އެމެރިކާގެ ސެންޓްރަލް ކޮމާންޑުގެ ތަރުޖަމާނު ކެޕްޓަން ބިލް އާބަން ނެރުނު ބަޔާނެއްގައި ވިދާޅުވި އެވެ.
އޭނާ ވިދާޅުވީ އެއީ ސައްހަ ރިޕޯޓުތަކެއްތޯ ބަލަމުންދާ ކަމަށާއި އުޅަނދަށް ހަމަލާ ދިން ވަގުތު އޭގައި ހުރި ގޮވާ ތަކެތީގެ ސަބަބުން ބޮޑެތި ގޮވުންތަކެއް ގޮވަން މެދުވެރިވި ކަމަށެވެ.
ފަހަކަށް އައިސް އަފްގާނިސްތާނުގައި ހިންގާ އެންމެ ނުރައްކާތެރި ޓެރަރިސްޓު ހަމަލާތަކުގެ ފަހަތުގައި ވަނީ އަފްގާނިސްތާނުގެ އައިއެސް ގްރޫޕެވެ. އިސްލާމިކް ސްޓޭޓް އިން ހޮރަސާން ނުވަތަ އައިއެސް-ކޭ ގެ ނަމުން މަޝްހޫރު އެ ގްރޫޕުން ވަނީ މިސްކިތްތަކާއި، ސްކޫލުތަކާއި ހޮސްޕިޓަލްތަކަށް ވެސް ހަމަލާ ދީފަ އެވެ.
