ވޮޝިންޓަން، އެމެރިކާ (އޯގަސްޓު 28) - އަފްގާނިސްތާނުގައި އުޅޭ އިސްލާމިކް ސްޓޭޓް (އައިއެސް) ޓާގެޓުތަކަށް އަމާޒުކޮށް އެމެރިކާ އިން ޑްރޯން ހަމަލާތަކެއް ދީފި އެވެ.
އެމެރިކާ އިން އަފްގާނިސްތާނުގައި މީހުން ފުރުވާލުމުގެ ބޮޑު އޮޕަރޭޝަނެއް ކުރިއަށް ގެންދާ މި ދަނޑިވަޅުގައި އައިއެސް އިން ވަނީ ކާބުލް އެއާޕޯޓު ބޭރުގައި ހަމަލާދީ ގިނަ ބަޔަކު މަރާލާފަ އެވެ.
އެއާއެކު އެމެރިކާ އިން ވަނީ ތާލިބާނުންނާ ގުޅިގެން ސެކިއުރިޓީ ވަރުގަދަ ކުރުމުގެ މަސައްކަތް ފަށާފަ އެވެ. ބުރާސްފަތި ދުވަހުގެ ރޭ ހަމަލާ ދިނީ އަފްގާން އައިއެސް ނުވަތަ އައިއެސް-ކޭ އިންނެވެ.
ރިޕޯޓުތައް ބުނާ ގޮތުން އެމެރިކާ އިން ހޮނިހިރު ދުވަހު ޑްރޯން ހަމަލާތަކެއް ދިނީ އައިއެސް-ކޭގެ ޓާގެޓަކަށެވެ. ހަމަލާގައި ޓާގެޓު މަރާލާފައިވާ ކަމަށް އެމެރިކާ އިން ބުނެ އެވެ.
މީހުން ފުރުވާލުމުގެ އޮޕަރޭޝަން އޯގަސްޓު 31 ވަނަ ދުވަހު ނިންމަން ޖެހޭއިރު، މިހާރު ވެސް 5،000 އަށް ވުރެ ގިނަ މީހުން އެއާޕޯޓު ތެރޭގައި އެބަ ތިއްބެވެ. އެތައް ހާސް ބަޔަކު ތިބީ އެއާޕޯޓު ބޭރުގަ އެވެ.
އެއާޕޯޓު ބޭރުގައި އައިއެސް-ކޭ އިން ދިން ހަމަލާގެ ކުރިން އެމެރިކާ އިން ވަނީ ހަމަލާއެއްގެ ޖާސޫސީ މައުލޫމާތު ލިބިފައި ވާތީ އެ ހިސާބުން ދިޔުމަށް އާއްމުންނަށް އަންގާފަ އެވެ.
ނަމަވެސް ގިނަ މީހުން އެ އެންގުމަށް އަމަލުކޮށްފައެއް ނުވެ އެވެ. އެމެރިކާ އިން އަނެއްކާވެސް މިއަދު ވަނީ އެއާޕޯޓު ކައިރިން ދުރަށް ދިޔުމަށް އެދި އެލާޓެއް ނެރިފަ އެވެ.
އެމެރިކާގެ ރައީސް ޖޯ ބައިޑެންގެ ޕްރެސް ސެކެޓްރީ ޖެން ސާކީ ވިދާޅުވީ އިތުރު ހަމަލާއެއްގެ އައުމުގެ ފުރުސަތު ބޮޑު ކަމަށާއި ކުރިއަށް އޮތީ ނުރައްކާތެރި ވަގުތުތަކެއް ކަމަށެވެ.
ތާލިބާނުންގެ ތަރުޖަމާނު ބިލާލް ކަރްމީ ބުނީ ތާލިބާން ހަނގުރާމަވެރިން އެއާޕޯޓުގެ އަސްކަރީ ފަޅީގައި ސެކިއުރިޓީ ބެލުމުގައި އުޅެމުންދާ ކަމަށެވެ.
ވިހި އަހަރުގެ ދިގު ހަނގުރާމައަކަށް ފަހު މި ދަނޑިވަޅުގައި އަފްގާނިސްތާނުން ފެންނަމުން ދަނީ އައިއެސްއާ ދެކޮޅަށް އެމެރިކާ ސިފައިންނާއި ތާލިބާނުން ގުޅިގެން މަސައްކަތް ކުރާ މަންޒަރެވެ.
އެމެރިކާ އޮފިޝަލުން ބުނީ އެހެން ގައުމުތަކުގެ ރައްޔިތުންނާއި ލިޔުންތައް ހަމައަށް ހުރި އަފްގާން ރައްޔިތުން ރައްކާތެރިކަމާއެކު އެއާޕޯޓުގެ ތެރެއަށް ވަންނަން ތާލިބާނުން އެހީވަމުންދާ ކަމަށެވެ.
އޯގަސްޓު 14 ވަނަ ދުވަހު ތާލިބާނުން ވެރިކަމަށް އައުމުން މިހާތަނަށް 109،000 އަށް ވުރެ ގިނަ މީހުން ވަނީ އަފްގާނިސްތާނު ދޫކޮށް ފްލައިޓުތަކުގައި ގޮސްފަ އެވެ.
