ވޮޝިންޓަން، އެމެރިކާ (އޯގަސްޓު 25) - ކޮވިޑް ވައިރަސް އުފެދުނު ގޮތް ހޯދަން އެމެރިކާ އިން ހިންގި ތަހުގީގަށް ޗައިނާ އިން އެއްބާރުލުން ނުދިނުމުން އިތުރު މައުލޫމާތެއް ލިބިފައި ނެތް ކަމަށް އެމެރިކާގެ މީޑިއާ ރިޕޯޓުތައް ބުނެފި އެވެ.
ކޮވިޑް ވައިރަސް އުފެދުނު ގޮތް ހޯދަން ކުރާ މަސައްކަތް ދެ ގުނަކޮށް އަވަސް ތަހުގީގެއް ހިންގުމަށް އެމެރިކާގެ ރައީސް ޖޯ ބައިޑެން ޖާސޫސީ އޮފިޝަލުންނަށް އެންގެވީ މިދިޔަ މޭ މަހު އެވެ. އޭރުން އަންގާފައި ވަނީ 90 ދުވަސް ތެރޭ މަސައްކަތް ނިންމުމަށެވެ.
އެ ތަހުގީގަށް ފަހު ބައިޑެން އަށް ހުށަހެޅި ޖާސޫސީ ރިޕޯޓުގައި ވެސް ޔަގީން ކުރެވޭ މައުލޫމާތެއް ނެތް ކަމަށް ރިޕޯޓުތައް ބުނެ އެވެ. އެގޮތަށް ދިމާވީ ޗައިނާއިން ތަހުގީގަށް އެއްބާރުލުން ނުދިނުމުން ކަމަށް އޮފިޝަލުންނާ ހަވާލަދީ ބައެއް ނޫސްތަކުގައި ވެ އެވެ.
"ބައެއް މައުލޫމާތު ފޯރުކޮށްދޭން ޗައިނާ އިން ދެކޮޅު ހަދާ ނަމަ މިކަމުގެ ހަގީގަތެއް ދުވަހަކު ވެސް ނޭނގޭނެ،" އޮފިޝަލަކު ވޯލް ސްޓްރީޓް ޖާނަލް އަށް ވިދާޅުވި އެވެ.
މި ވައިރަހަކީ ޗައިނާގެ ވޫހާނުގެ ލެބޯޓަރީން ލީކުވި އެއްޗެއް ކަމަށް ބައެއް ޖާސޫސީ އޮފިޝަލުން ބުނި ނަމަވެސް އަނެއް ބައި އޮފިޝަލުން ބުނަނީ މިއީ ގުދުރަތީ ގޮތުން ޖަނަވާރުންގެ ގައިން އިންސާނުންނަށް ވާސިލްވި ވައިރަހެއް ކަމަށެވެ.
އެމެރިކާގައި ހުންނަ ޗައިނާ އެމްބަސީން ބުނީ ވައިރަހުގެ ހަގީގަތް ހޯދަން ކަމަށް ބުނެ، މިކަން ސިޔާސީ ނުކުރުމަށް ގޮވާލާ ކަމަށެވެ.
ޗައިނާގެ ވޫހާން ސިޓީއިން 2019 ވަނަ އަހަރުގެ ފަހުކޮޅު ފެނުނު ކޮވިޑް ބަލީގައި މުޅި ދުނިޔެއިން މިހާތަނަށް ހަތަރު މިލިއަނަށް ވުރެ ގިނަ މީހުން މަރުވެފައި ވާއިރު، އެ ވައިރަސް ރަނގަޅަށް ދެނެގަންނަން ފުރިހަމައަށް ތަހުގީގެއް ކުރަން ޑަބްލިއުއެޗްއޯއަށް ދަނީ ޕްރެޝަރު ބޮޑުވަމުންނެވެ.
މިދިޔަ ޖެނުއަރީ މަހު ޑަބްލިއުއެޗްއޯއިން ވަނީ މިނިވަން، ބައިނަލްއަގްވާމީ މެމްބަރުން ހިމެނޭ ތަޖުރިބާކާރުންގެ ޓީމެއް ވޫހާންއަށް ފޮނުވާފަ އެވެ. ވައިރަސް ފެނުނުތާ އަހަރަކަށް ވުރެ ގިނަ ދުވަސް ފަހުން ޗައިނާއަށް ދިޔަ އެ ޓީމުން މަސައްކަތް ކުރީ ޗައިނާގެ ތަޖުރިބާކާރުންގެ ޓީމަކާ އެކު އެވެ.
ކޮވިޑް ފަތުރާ ވައިރަސް ދުނިޔެއަށް ފެތުރުނީ ވޫހާންގެ ލެބަކުން ލީކުވެގެން ކަމަށް ދެކެވޭ ވާހަކައަށް ލިބޭ ސަމާލުކަން ފަހަކަށް އައިސް ވަނީ އިތުރުވެފަ އެވެ. ނަމަވެސް އެއީ އެއްވެސް ހަގީގަތެއް ނެތް ކޮންސްޕިރެސީ ތިއަރީއެއް ކަމަށް ޗައިނާ ސަރުކާރުން ބުނެ އެވެ.
ޖެނުއަރީ މަހު ޑަބްލިއުއެޗްއޯ އާއި ޗައިނާއިން ހިންގި ތަހުގީގުގައި ބުނީ ވައިރަސް ފެތުރުނީ ލެބަކުން ލީކުވެގެން ކަމަށް ބެލުމުގެ ފުރުސަތު ކުޑަ ކަމަށެވެ. އެ ތަހުގީގަށް އިޝާރާތްކޮށް ޗައިނާއިން ވެސް ބުނަމުން ދަނީ އެއީ ދިމާވުން ނާދިރު ކަމެއް ކަމަށެވެ.
ނަމަވެސް ޖުލައި މަހުގެ ކުރީކޮޅު ޑަބްލިއުއެޗްއޯއިން ބުނީ އެ ތަހުގީގުގެ ދެ ވަނަ މަރުހަލާ ފަށަން ޖެހޭ ކަމަށެވެ. އެ މަރުހަލާގައި ކުރަން ޖެހޭ ކަންކަމުގެ ތެރޭގައި ހިމެނެނީ ޗައިނާގެ ލެބުތައް އޮޑިޓް ކުރުމެވެ. އެގޮތަށް ޑަބްލިއުއެޗްއޯއިން އިއުލާނު ކުރިއިރު، އެމެރިކާއިން ދަނީ ވޫހާންގައި ހުންނަ ބަޔޯޓެކް ލެބެއް ރަނގަޅަށް ބަލަން ބާރު އަޅަމުންނެވެ.
ޗައިނާއިން ބުނީ ޑަބްލިއުއެޗްއޯގެ ހުށަހެޅުމަކީ އެ ގައުމަށް "އިހްތިރާމް ކުޑަ" އަދި "ސައިންސްގެ ހޯދުންތަކަށް ނުބަލައި" ހުށަހެޅި ހުށަހެޅުމެއް ކަމަށެވެ.
