ކާބުލް، އަފްގާނިސްތާން (އޯގަސްޓު 24) - މަސައްކަތުގެ އެކި ދާއިރާތަކުން ހުނަރު ހުރި އަފްގާން ރައްޔިތުން ގައުމު ދޫކޮށް ދާން އެހީވުން އެމެރިކާ އިން ހުއްޓާލަން ޖެހޭ ކަމަށް ތާލިބާނުންގެ ތަރުޖަމާނަކު ބުނެފި އެވެ.
ތާލިބާނުން ތުހުމަތު ކުރި ގޮތުގައި އެމެރިކާ އިން ދަނީ އިންޖިނިއަރުން ފަދަ "އަފްގާން ތަޖުރިބާކާރުން" ފުރުވާލަމުންނެވެ.
"އެކަން ހުއްޓާލަން އަޅުގަނޑުމެން އެދެން،" ކާބުލްގައި އޮތް ނޫސްވެރިންގެ ބައްދަލުވުމެއްގައި ތަރުޖަމާނު ޒަބީހުﷲ މުޖާހިދު ބުންޏެވެ.
ތާލިބާނުން ވެރިކަމަށް އައުމާއެކު ގައުމު ދޫކޮށް ދާން ބޭނުންވާ އެތައް ހާސް ބަޔަކު ވަނީ ކާބުލް އެއާޕޯޓަށް ޖަމާވެފަ އެވެ. އެމެރިކާ ސިފައިން އަފްގާން ފަސްގަނޑުން ފޭބުމަށް ކަނޑައެޅި ސުންގަޑި ކަމުގައި އޯގަސްޓު 31 ގެ ކުރިން އެ އެންމެން ފުރުވާލެވޭނެ ކަމަކަށް ނުބެލެވެ އެވެ.
ސުންގަޑި ދިގު ދަންމާލުމުގެ ވާހަކަ ހުޅަނގުގެ ގައުމުތަކުން ދައްކަން ފެށުމުން ތާލިބާނުން ވަނީ އެކަމާ ދެކޮޅަށް އިންޒާރު ދީފަ އެވެ.
"އެ މީހުން އަތުގައި ފްލައިޓު އެބަ ހުރި. އެ މީހުން އަތުގައި އެއާޕޯޓު އެ އޮތީ. ކަނޑައަޅާފައިވާ މުއްދަތުގެ ތެރޭގައި އެ މީހުންގެ ރައްޔިތުންނާއި ކޮންޓްރެކްޓަރުން އަނބުރާ ގެންދެވެން ޖެހޭނެ،" މުޖާހިދު ބުންޏެވެ.
ސުންގަޑި ހަމަވުމުގެ ކުރިން އެމެރިކާ ސިފައިންނާއި ރައްޔިތުން ގައުމަށް ގެންދިޔުމުގެ އުއްމީދު ބޮޑު ކަމަށް ރައީސް ޖޯ ބައިޑެން ވަނީ ވިދާޅުވެފަ އެވެ. ނަމަވެސް އެމެރިކާ އިން ބޭނުން ވަނީ ގައުމު ދޫކޮށް ދާން ބޭނުންވާ އަފްގާން ހުރިހާ ރައްޔިތުންނަށް ވެސް އެ ފުރުސަތު ފަހިކޮށްދިނުމަށެވެ.
އެމެރިކާގެ ފްލައިޓުތަކުގައި މިހާތަނަށް 50،000 މީހުން އަފްގާނުން ފުރާފައި ވާއިރު، އޭގެ ތެރޭގައި ގިނައީ އަފްގާން ރައްޔިތުންނެވެ.
