ހޮޓެލް ޖެންގެ އެންމެ ފުންނާބު އުސް ޝެފުންނާއެކު ކުޑަކުދިންނަށް ހާއްސަކޮށްގެން "ލިޓްލް ޝެފްސް އިން ދަ މޭކިން" ގެ ނަމުގައި ކައްކާ ކްލާސްތަކެއް ތައާރަފުކޮށްފި އެވެ.
މި ކްލާސްތަކުގެ އެންމެ ފުރަތަމަ ސެޝަން ބޭއްވީ މިމަހުގެ ފުރަތަމަ ހަފުތާ ބަންދުގެ ތެރޭގަ އެވެ. މި ކްލާހުގައި ބައިވެރިވި ކުދިންނަށް ލިބުނު ފުރުސަތުގައި އެކުދިން ވަނީ ޖެންގެ ޗެފް ޑި ކުޒީން ޕްރަބޫ ވިޖަޔަން އާއި އޭނާގެ ޓީމާ އެކު ޕިއްޒާ ތައްޔާރުކުރާނެ ގޮތް ދަސްކޮށްފަ އެވެ.
ލިޓްލް ޝެފްސް އިން ދަ މޭކިން ކްލާހުގައި ޖެންގެ ޝެފް ޑި ކުޒީން ވިޔަޖަން ޕިއްޒާ އަޅާނެ ގޮތް ކިޔައިދެނީ. -- ފޮޓޯ: ހޮޓެލް ޖެން
މި ކްލާހުގައި ވަނީ ޕިއްޒާގެ ފުއްގަނޑު ހަދަން ބޭނުންވާ ތަކެއްޗާއި، އަޅާނެ މިންވަރާއި، ފުއްގަނޑު މޮޑޭނެ ގޮތް ދަސްކޮށްދީފަ އެވެ. އަދި އެ ކުއްޖަކު ހިޔާރުކުރާ ޕިއްޒާ ޓޮޕިންސް އަޅައިގެން ޕިއްޒާ ތައްޔާރުކުރަން ފުރުސަތު ދިނެވެ.
ޖެންއިން ބުނީ ބެލެނިވެރިންނާ އެކީ ކުރިއަށް ގެންދާ މި ކްލާސްތަކަކީ ރައްކާތެރި މާހައުލެއްގައި ކައްކަން ދަސްކޮށްދޭން ފެށި ސީއެސްއާރް ހަރަކާތެއް ކަމަށެވެ. އަދި ވިސްނުމަކީ ކުރިޔަށް އޮތް ދުވަސްތަކުގެ ތެރޭގައި ވެސް ކޮންމެ ކުއާޓާއެއްގައި މިފަދަ އެހެން ކްލާސްތަކެއް ކުރިޔަށް ގެެންދިއުން ކަމަށް ބުންޏެވެ.
ޝެފް ވިޔަޖަން ވެސް ބުނީ މިއީ ފެށުމެއް ކަމަށާއި މި ތަޖުރިބާގެ ކާމިޔާބީއާއެކީ ކުރިޔަށް އޮތް ދުވަސްތަކުގައި ކުޑަކުދިންނަށް ހާއްސަ ކައްކާ ކްލާސްތަކެއް ބާއްވާނެ ކަމަށެވެ.
ބައިނަލްއަގުވާމީ ޒުވާނުންގެ ދުވަހާ ދިމާކޮށް ބޭއްވި މި ހަރަކާތަކީ އެ ދުވަހުގެ ޝިޔާރު "ޓްރާންސްފޯމިން ފުޑް ސިސްޓަމްސް، ޔޫތް އިނޮވޭޝަން" އާ ގުޅުވައިގެން ބޭއްވި ހަރަކާތެއް ކަމަށް ޖެންއިން ބުނެ އެވެ.
