ކާބުލް، އަފްގާނިސްތާން (އޯގަސްޓު 24) - އަންނަ ހަފްތާ އަށް ފަހު އެމެރިކާ ސިފައިން އަފްގާނިސްތާނުގައި މަޑުކޮށްފި ނަމަ ފިޔަވަޅު އަޅާނެ ކަމުގެ އިންޒާރު ތާލިބާނުން ދީފި އެވެ.
އޯގަސްޓު 15 ވަނަ ދުވަހު ތާލިބާނުން ވެރިކަމަށް އައުމުން އެތައް ހާސް ބަޔަކު ވަނީ އަފްގާނިސްތާނުން ފުރުމަށް ކާބުލް އެއާޕޯޓަށް ޖަމާވެފަ އެވެ. އެމެރިކާ ސިފައިން އަފްގާނިސްތާނުން ފޭބުމަށް ކަނޑައެޅި ސުންގަޑި ކަމުގައިވާ އޯގަސްޓު 31 ގެ ކުރިން އެ އެންމެން ފުރުވާލެވޭނެ ކަމަކަށް ނުބެލެވެ އެވެ.
އެހެންވެ އެމެރިކާ އާއި ގުޅިފައިވާ އެހެން ގައުމުތަކުން އަންނަނީ ސުންގަޑި ދިގުދަންމާލުމުގެ ވާހަކަ ދައްކަމުންނެވެ. ގައުމުތަކުން ބުނީ ބޭނުމަކީ އަފްގާނިސްތާން ދޫކޮށް ދާން ބޭނުންވާ އެންމެންނަށް އެ ފުރުސަތު ދިނުން ކަމަށެވެ.
ސުންގަޑީގެ ކުރިން އަފްގާނިސްތާނުގައި ތިބި އެމެރިކާގެ ހުރިހާ ރައްޔިތުން އަނބުރާ ގައުމަށް ގެންދެވޭނެ ކަމުގެ އުއްމީދު ބޮޑު ކަމަށް އެމެރިކާ ސަރުކާރުން ވަނީ ބުނެފަ އެވެ. ނަމަވެސް ކޮންމެ ދުވަހަކު ފުރުވާލަމުންދާ މީހުންގެ ތެރޭގައި ގިނައީ އަފްގާން ރައްޔިތުން ކަމަށް ބުންޏެވެ.
ތާލިބާނުންގެ ތަރުޖަމާނު ސުހައިލް ޝަހީން ސްކައި ނިއުސް އަށް ބުނީ އެއްބަސްވެފައިވާ ސުންގަޑީގެ ފަހުން ބޭރުގެ އެއްވެސް ފައުޖަކުން އަފްގާނިސްތާނުގައި މަޑު ކުރުމަކީ "ގައުމު އަޅުވެތިކޮށްފައި އޮތް އޮތުން ދިގުދެންމުން" ކަމަށެވެ.
އަފްގާނިސްތާނުގެ އާ ސަރުކާރު އެކުލަވާލުމުގެ މަޝްވަރާތަކުގައި ތާލިބާނުން މިހާރު އުޅެމުން ދާއިރު، އެމެރިކާ ސިފައިން އަފްގާން ފަސްގަނޑުން ފޭބުމުގެ ކުރިން ސަރުކާރާ ގުޅޭ އެއްވެސް އެއްޗެއް ހާމަނުކުރާނެ ކަމަށް އޮފިޝަލުން ވަނީ ބުނެފަ އެވެ.
އިނގިރޭސި ޑިފެންސް ސެކެޓްރީ ބެން ވޮލެސް ވިދާޅުވީ މިއަދު އޮންނަ ޖީ7 ގައުމުތަކުގެ ވާޗުއަލް ބައްދަލުވުމުގައި ބޮޑު ވަޒީރު ބޮރިސް ޖޯންސަން ބައިވެރިވެވަޑައިގެން، ސުންގަޑި ދިގުދެންމުމަށް ހުށަހަޅުއްވާނެ ކަމަށެވެ.
ޖަރުމަނުން ވެސް ބުނީ އޯގަސްޓު 31 އަށް ފަހު ވެސް އަފްގާނިސްތާން ދޫކޮށް ދާން ބޭނުންވާ މީހުންނަށް ކާބުލް އެއާޕޯޓު ހުޅުވާލާފައި ބޭއްވުމަށް އެހެން ގައުމުތަކާއި ތާލިބާނުންނާއެކު މަޝްވަރާ ކުރަމުންދާ ކަމަށެވެ. ފްރާންސުން ބުނީ މިހާރު ކުރިއަށްދާ އޮޕަރޭޝަންތައް ނިންމުމަށް އިތުރު ވަގުތު ބޭނުންވާ ކަމަށެވެ.
ފާއިތުވި 12 ގަޑިއިރު ތެރޭގައި އެމެރިކާ އިން ވަނީ 10،900 މީހުން ފުރުވާލާފަ އެވެ. އެއާއެކު އޯގަސްޓު 14 ވަނަ ދުވަހުން ފެށިގެން އެމެރިކާ ފްލައިޓުތަކުގައި ފުރި އަދަދު ވަނީ 48،000 އަށް އަރާފަ އެވެ.
