ބާލިން، ޖަރުމަނު (އޯގަސްޓު 22) - އެމެރިކާގެ އަސްކަރީ މަތިންދާބޯޓެއްގައި އަފްގާނިސްތާނުގެ އަންހެނަކު ވިހައިފި އެވެ.
އެމެރިކާގެ އެއާ ފޯސް އިން އާދީއްތަ ދުވަހު ކުރި ޓްވީޓެއްގައި ބުނީ ޖަރުމަނަށް ޖެއްސިތާ ކުޑަ އިރުކޮޅެއް ފަހުން ވިހާފައި ވަނީ އަންހެން ކުއްޖެއް ކަމަށެވެ.
އެ އަންހެން މީހާ އަކީ ތާލިބާނުންގެ ވެރިކަމެއްގައި އަފްގާނިސްތާނުގައި އުޅެން ބޭނުން ނުވާތީ ގައުމު ދޫކޮށް އިވެކުއޭޝަން ފްލައިޓެއްގައި ފުރި މީހެކެވެ.
އޭނާ ވިހަން ރިއްސަން ފެށީ މެދުއިރުމަތީގެ ސްޓޭޖިން ބޭސްއެއްގައި މަޑު ކުރުމަށް ފަހު ފްލައިޓު ފުރި ފަހުންނެވެ. އާއްމުކޮށް ފްލައިޓުތައް މަޑު ކުރަނީ ގަތަރު ނުވަތަ ކުވެއިތުގަ އެވެ.
އެމެރިކާގެ އެއާ މޮބިލިޓީ ކޮމާންޑުން ކުރި ޓްވީޓެއްގައި ބުނީ ވިހަން ރިއްސަން ފަށައި، މައްސަލަތަކާ ދިމާވާން ފެށުމުން، ފްލައިޓު ދުއްވަމުން ދިޔަ އެލްޓިޓިއުޑް ތިރި ކުރަން ބޯޓުގެ ކޮމާންޑަރު ނިންމި ކަމަށެވެ.
އެ ނިންމުމުގެ ސަބަބުން ބޯޓު ތެރޭގައި އެއާ ޕްރެޝާ އިތުރުވެ، އަންހެން މީހާ އަށް ނޭވާލާން ފަސޭހަވި ކަމަށާއި އޭނާގެ ފުރާނަ ސަލާމަތްވީ އެ ނިންމުމުގެ ސަބަބުން ކަމަށް ބުނެފައި ވެ އެވެ.
ޖަރުމަނުގެ ރަމްސްޓެއިން ބޭސްއަށް ފްލައިޓު ޖެއްސުމާ އެކު އެމެރިކާގެ ސިފައިންގެ ސިއްހީ އޮފިޝަލުން ވަނީ އަންހެން މީހާ ރައްކާތެރިކަމާއެކު ވިހަން އެހީވެ ދީފަ އެވެ. އޭނާ ވިހާފައި ވަނީ ފްލައިޓުގެ ކާގޯ ރައްކާކޮށްފައި ހުރި ބައިގަ އެވެ.
"މަންމަ އާއި ދަރިފުޅު ފޮނުވާލާފައި ވަނީ ކައިރީގައި ހުރި މެޑިކަލް ފެސިލިޓީއަކަށް. ދެ މީހުންގެ ހާލު ވެސް ރަނގަޅު،" ޓްވީޓުގައި ބުންޏެވެ.
އެމެރިކާ ސިފައިން އާއްމު ކުރި ވީޑިއޯ އާއި ފޮޓޯ އިން އަންހެން މީހާ ސްޓްރެޗަރެއްގައި ގެންދާ މަންޒަރު ފެނެ އެވެ.
ތާލިބާނުން ވެރިކަމަށް އައުމާއެކު އެ ގައުމުގެ އެތައް ހާސް ބަޔަކު ވަނީ ކާބުލް އެއާޕޯޓު ކައިރިއަށް ޖަމާވެފަ އެވެ. އެމެރިކާގެ އެހީއާއެކު މިހާތަނަށް 17،000 މީހުން ފުރުވާލާފައި ވާއިރު އޭގެ ތެރޭގައި 2،500 އެމެރިކާ ރައްޔިތުން ހިމެނެ އެވެ.
