ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މީޑިއާ ޕާޓްނަރަކަށް "އަދަދު" ހަމަޖައްސައިފި އެވެ.
ރޭ އެފްއޭއެމް ހައުސްގައި އޮތް ރަސްމިއްޔާތެއްގައި، ޕާޓްނާޝިޕް އެއްބަސްވުމުގައި އެފްއޭއެމްގެ ފަރާތުން ސޮއިކުރެއްވީ ރައީސް ބައްސާމް އަދީލް ޖަލީލެވެ. "އަދަދު" ގެ ފަރާތުން ސޮއިކުރެއްވީ ސީ.އީ.އޯ ހުސެއިން ފިޔާޒް މޫސާ އެވެ.
ބައްސާމް ވިދާޅުވީ "އަދަދު" ފެށި ފަހުން މިވީ ކުޑަ ދުވަސްކޮޅުގެ ތެރޭގައި އެ މީޑިއާ ފެނިގެން ދަނީ ވަރަށް ހަރަކާތްތެރިކޮށް އަދި ފުޓްބޯޅައަށް ބޮޑު ސަމާލުކަންދޭ މީޑިއާއެއްގެ ގޮތުގައި ކަމަށެވެ.
"ފުޓްބޯޅަ އާއި ފުޓްބޯޅަ ކޮމިއުނިޓީ އަށް "އަދަދު" ގެ ފަރާތުން ވަރަށް ރަނގަޅު ކަވަރޭޖެއް ދޭކަން ފާހަގަކުރަން،" ބައްސާމް ވިދާޅުވި އެވެ.
"އަދަދު" ގެ މެނޭޖިން އެޑިޓަރު މުހައްމަދު ހަމްދޫން ވިދާޅުވީ ފުޓްބޯޅައަކީ ރާއްޖޭގައި އެންމެ ގިނަ ބަޔަކު ބަލާ ކުޅިވަރު ކަމަށްވާތީ އެ ކުޅިވަރާ ގުޅޭ ހަބަރުތައް ވީހާ ވެސް ތާޒާކޮށް ތަފްސީލުކޮށް ގެނެސްދޭން "އަދަދު" އިން ބޮޑު ސަމާލުކަމެއްދޭ ކަމަށެވެ.
"ފުޓްބޯޅައަކީ ހަމައެކަނި ކުޅިވަރެއް ނޫން. ފުޓްބޯޅައިން އާމްދަނީ ހޯދާ އެތައް ކުޅުންތެރިން އެބަތިބި. އަހަރަކު މިލިއަނުން ހަރަދުކުރާ ކްލަބްތައް އެބައޮތް. ދެކުނު އޭޝިއާގެ ދެ ވަނަ އަށް އެންމެ ވަރުގަދަ، ބޮޑު ލީގު ސިސްޓަމް އޮތީ ރާއްޖޭގައި. މިއީ ބޮޑު އިންޑަސްޓްރީއެއް. އެހެންވެ ފުޓްބޯޅައިގެ ކަވަރޭޖް އޭގެ ޒާތުގައި ބޮޑުވާނެ،" ހަމްދޫން ވިދާޅުވި އެވެ.
"އެކަމަކު މި އެއްބަސްވުން ހެދިޔަސް އެހެން ކުޅިވަރުތަކަށްދޭ ސަމާލުކަން ވަކި ކުޑައެއް ނުވާނެ."
"އަދަދު" ގެ ސްޕޯޓްސް ޑިޕާޓްމަންޓުގެ އެސޯސިއޭޓް އެޑިޓަރަކީ، ރާއްޖޭގެ އެންމެ މޮޅު ކުޅިވަރު ނޫސްވެރިޔާގެ އިނާމް ތިން ފަހަރު ހޯދާފައިވާ އައްޒާމް އަލިފުޅެވެ.
މި އެއްބަސްވުމުގެ ދަށުން އެފްއޭއެމުން ރާވާ ހިންގާ އެކި ފުޓްބޯޅަ މުބާރާތްތަކާ ބެހޭ ފުރިހަމަ މައުލޫމާތާއި އެ އެސޯސިއޭޝަނުގެ މަސައްކަތްތަކާއި ރާވާ ހިންގާ އެކި އިވެންޓްތަކާއި ޕްރޮގްރާމްތަކާ ބެހޭގޮތުން "އަދަދު" އިން ވީޑިއޯ ޝޯތައް ކުރިއަށްގެންދާނެ އެވެ. މީގެ އިތުރުން ފުޓްބޯޅައިގެ ޑިވެލޮޕްމަންޓަށް އެފްއޭއެމުން ކުރާ ހުރިހާ މަސައްކަތެއްގައި އިސް ބައިވެރިއެއްގެ ގޮތުގައި "އަދަދު" ބައިވެރިވާނެ އެވެ.
ތަޖުރިބާކާރު ނޫސްވެރިންގެ ޓީމަކާ އެކު "އަދަދު" ފެށީ މިދިޔަ އޭޕްރީލް މަހުގެ ތިން ވަނަ ދުވަހު އެވެ.
