ވޮޝިންޓަން، އެމެރިކާ (އޯގަސްޓު 22) - ކާބުލް އެއާޕޯޓުގެ ގޭޓުތައް ކައިރީގައި "ސަލާމަތަށް ނުރައްކާވެދާނެ" ކަމަށް ބުނެ، އަފްގާނިސްތާނުގައި ތިބި އެމެރިކާ ރައްޔިތުން އެއާޕޯޓަށް ނުދިޔުމަށް އަންގައިފި އެވެ.
މީގެ ހަފްތާއެއް ކުރިން ތާލިބާނުން އަފްގާނިސްތާނުގެ ވެރިކަމަށް އައުމުން ގައުމު ދޫކޮށް ދާން ބޭނުންވާ އެތައް ހާސް ބަޔަކު ވަނީ ހާމިދު ކަރްޒާއީ އިންޓަނޭޝަނަލް އެއާޕޯޓަށް ޖަމާވެފަ އެވެ.
އެއާޕޯޓަށް ވަދެވޭތޯ ގޭޓުތައް ކައިރިއަށް ގިނަ ބަޔަކު ޖަމާވެފައި ވާއިރު، ތާލިބާން ހަނގުރާމަވެރިން އެ މީހުންނަށް އަނިޔާކޮށް، ފުރައްސާރަ ކުރާ ކަމަށް ވަނީ ހަބަރު ފެތުރިފަ އެވެ.
"އެމެރިކާ ރައްޔިތުންގެ ކިބައިން އަޅުގަނޑުމެން އެދެނީ އެއާޕޯޓަށް ދަތުރު ނުކުރުމަށް. އެމެރިކާ ސަރުކާރުގެ އޮފިޝަލަކު އިރުޝާދު ނުދެއްވަނީސް އެއާޕޯޓުގެ ގޭޓުތައް ކައިރިއަށް ނުދިޔުމަށް،" ކާބުލްގައި ހުންނަ އެމެރިކާ އެމްބަސީން ނެރުނު އެލާޓުގައި ވެ އެވެ.
"ސަލާމަތަށް ނުރައްކާވެދާނެ" ކަމަށް ބުނި ނަމަވެސް އެކަމުގެ ތަފްސީލް އެމްބަސީން ހާމައެއް ނުކުރެ އެވެ. ނަމަވެސް ވައިޓް ހައުސްގެ އޮފިޝަލަކު ވިދާޅުވީ އިސްލާމިކް ސްޓޭޓް (އައިއެސް) ގްރޫޕް ހިމެނޭހެން، އަފްގާނިސްތާނުގައި ޓެރަރިޒަމާ ދެކޮޅު އޮޕަރޭޝަނެއް ތާލިބާނުން ހިންގަމުންދާ ކަމަށެވެ.
"މިއަދު ހެނދުނު ރައީސް [ޖޯ ބައިޑެން] ވަނީ ގައުމީ ސަލާމަތާ ގުޅޭ ޓީމާ ބައްދަލުކުރައްވާފައި... މަޝްވަރާ ކުރެއްވީ އަފްގާނިސްތާނުގެ ސަލާމަތީ ހާލަތާއި އައިއެސް-ކޭ ފަދަ ގްރޫޕުތަކުގެ ޓެރަރިޒަމާ ދެކޮޅަށް ހިންގާ އޮޕަރޭޝަންތަކާ ގުޅޭ ގޮތުން،" އޮފިޝަލް ވިދާޅުވި އެވެ.
އަފްގާނިސްތާނުގެ އައިއެސް ގްރޫޕް މަޝްހޫރުވެފައި ވަނީ އައިއެސް-ކޭ ނުވަތަ އިސްލާމިކް ސްޓޭޓް އިން ހޮރަސާންގެ ގޮތުގަ އެވެ. އެ ގްރޫޕުން ދަނީ އަފްގާނިސްތާނުގެ ރަށްފުށުގެ ހިސާބުތަކުގައި ދޭތެރެ ދޭތެރެއިން ހަމަލާތައް ދެމުންނެވެ.
ބައިޑެން ކުރިން ވިދާޅުވީ އަފްގާނިސްތާނުގައި ތިބި 15،000 އެއްހާ އެމެރިކާ މީހުން ގައުމަށް ގެންދަން ޖެހޭ ކަމަށެވެ. އޭގެ އިތުރުން އެންމެ މަދުވެގެން އަފްގާނިސްތާނުގެ 50،000 މީހުން ވެސް އެމެރިކާ އަށް ގެންދަން ބޭނުންވާ ކަމަށް ބައިޑެން ވިދާޅުވި އެވެ.
ޕެންޓަގަންގެ ތަރުޖަމާނު ޖޯން ކާބީ ވިދާޅުވީ އޯގަސްޓު މަސް ނިމުމުގެ ކުރިން މީހުން އަނބުރާ ގެންދިޔުމުގެ އޮޕަރޭޝަން ނިންމާލަން މަސައްކަތް ކުރާ ކަމަށެވެ.
މޭޖާ ޖެނެރަލް ހޭންކް ޓެއިލާ ވިދާޅުވީ އޯގަސްޓު 14 ވަނަ ދުވަހު އޮޕަރޭޝަން ފެށި ފަހުން މިހާތަނަށް 17،000 މީހުން އަފްގާނިސްތާނުން ފުރުވާލާފައިވާ ކަމަށެވެ. އޭގެ ތެރޭގައި 2،500 އެމެރިކާ ރައްޔިތުން ހިމެނެ އެވެ. އެ އެންމެން ވެސް އެމެރިކާ އަށް ދިޔުމުގެ ކުރިން މަޑުކުރަނީ ގަތަރު ނުވަތަ ކުވެއިތުގަ އެވެ.
އެއާޕޯޓުގެ ގޭޓުތަކާ ހަމައަށް ނުދެވި ތިބި އެމެރިކާގެ 150 ރައްޔިތުން ސަލާމަތް ކުރަން މިދިޔަ ހުކުރު ދުވަހު އަސްކަރީ ހެލިކޮޕްޓަރުތައް މަސައްކަތް ކުރި އެވެ.
